NLD LE HMAWNGTLANG NIH NI SUI LIAN AN REPORT NAK ARUANG

A Ttale CNF le Chin Refugee Caah Riantuanmi Ansi Caah MP Cuhter Hlah Uh Timi Report Nih Khua Tampi A Ka Ruahter.Upatmi careltu hna kei hi ramkhel kong zeihmanh a hngalmi ka si lo. Party Politics timi zong hi pakhat hmanh ka fiang lo. A sinain Pi Ni Sui Lian cu ata pakhat CNF upa a si caah siseh, A dang ata pakhat CACC GS a tuan lio cuahmah ah CNF na bawmh hna timi ruangah ralkap nih kum saupi innthong an thlak timi ruangah siseh,

A dang ata pakhat cu Malaysia Chin Refugee caah rian a tuan timi ruangah Chin State NLD upa Cheukhat le Hmawngtlang khuami i bawm riangmang in report an tuah tikah ka khuaruah a har i, Ka lung a that lo caah a tubantuk in catial hmanh ka thiam lo bupi in ka rak tial venak hi a si. A relzia nan ka thiampiak nakhnga zaangfah kan nawl hna.

Pi Ni Sui Lian cu 2015 Kawlram thimnak ah NLD in Pyithu Hluttaw aa cuh i Thantlang Peng mipi nih an dawtnak thawngin MP a tlingmi a si. Atu zong MP cu a tuan cuahmah ko i, A tuanchung zongah minchiatnak a ngei bal lo. MP asi hlan hrim in miding mifel a si i kan theih tawk ah minchiatnak a rak ngei bal lomi a si. Minung cu a tlingmi kan um lo caah a chanbaunak cu a tampi ve ko lai nain a chambaunak hngalh in remh aa zuammi nu pakhat a si.

2020 thimnak luhthan dingin Thantlang Peng NLD EC nih buaibainak um lo tein an thim than caah Pyine Hluttaw No.2 in icuh than dingin timhtuahnak a ngeih lio cuahmah a si. Nain apupa ram ah a rak pemchommi Hmawngtlang le NLD upa cheukhat nih aa pehtlai lomi ata le an riantuannak kong tiang an coih i an report tikah khuaruah har cu a si ko.

Zei ruangah Hmawngtlang nih an report? A liamcia thlahnih hrawng ahkhan MP Ni Sui Lian nih Cozah cu thatein rian nan tuan lo caah Hmawngtlang le Leitak nan buaiter dih hna tiah a mawhchiat hna. Cucu NLD Cozah nih an ifahsak i Hmawngtlang khuami kha an forh hna caah a tu bantukin report ca an chiah nak hi a si. A taktak lo ahcun MP i an rian cu Cozah nih an rian an tei maw?

An riantuannak ah kaptanh an ngei maw? Cozah a riantuannak a fel lo ahcun mawhchiat tibantuk khi an rian biapi cu a si ko. Cucaah MP Ni Sui Lian hi a rian bak te a tuanmi a si ko caah a palhnak a um hrim lo. Nain NLD Cozah ttih an nunnak cu anmah NLD MP pawl nih an mawhchiat hna ahcun an party in an chuah hna. NLD MP lakah raltha tein Cozah a mawhchiat ngamtu cu MP Ni Sui Lian le Dr. Thet Thet Khine lawng hi an si lai dah.

Dr. Thet Thet Khine hoi cu NLD zongin a chuak beh i Party thar zong a dirh khah. Tukum hi hmunrawn ahcun zumh bakmi Party ah an ichuah ve.Nata le CNF Upa, CNF bawmtu le Chin Refugee Bawmtu ansi timi report nih zei sullam dah a ngeih? Hihi direct bakin Chinmi vialte an kan doh bantuk a si ti’n ka ruah.

A ruang cu CNF cu kan Chinram le Miphun nih zalawnnak le nunduhdim kan hmuh khawh nakhnga caah nunnak pek in a tuanmi an si. Chinmi vialte kan ta a si. Cun nan theih cio bang Chinmi cu kan ram buaibainak le harsatnak phunzakip ruangah Malaysia, Thailand le Delhi kan phan. Cukaa cun refugee kan sawk hnu ah Vawlei cung ram thatha kan phan i sianginn thatha ah kan kai, Chawva kan kawl i, Ka hlawhmi tein Chinram i kan chungkhat kan zoh hna.

Kan sinpit deuh caan ah sang le veng caah kan ti, Miphun le ram caah kan ti i, Cuticun ngeih lo chun te cun kan kaltakmi Kan khua le kanram te cu kan siaherh cio. Cubantuk sikhawh dingin ramtha phak a herh. Ramtha kan phak khawh nakhnga ramhnih nakah bawmtu kan herh caah kanpa le hna nih CRC le ACR hna an kan dirh piak i , Ramtha kan phak khawh nakhnga le ramhnih nak kan idor chungah kan tonmi harnak vialte zong an kan tlangtlakpi.

Lungre an kan theihpi. Cucaah a tubantuk in CNF, CRC le ACR ah rian an tuan ruang i report ansi cu kan Miphun caah ngaihchia taktak a si ko. Kan Miphun ningin an kan doh bantuk khi a si ko. Kan miphun ningin an kan tthihpheih bantuk khi a si ko.Khat lei ah CNF le Refugee Committee pawl riantuannak zong a hnursuan dih kho.

Hmai lei ah hi bantuk ruang ahhin CNF le Chin Zatlaang bu pawl ah riantuan zong mino nih an ngamh te lo kho mi a si. Cucaah Chinmi kan him nakhnga Chinmi vialte nih doh a herh mi tuahsernak a si. Doh ding zongin kan sawm hna.Careltu nan dihlak cungah kaa lawm. Bawipa nih kan Chin Miphun himter ko seh.

Theihtlei : Pi Ni Sui Lian te chungkhar hi Kan Chin Miphun caah an chungkhar ningin harsatnak an tuarmi a tampi rih nain ka tial chih ti lo. Hmawngtlang belte cu Kawlram mi vialte nih kan dohmi Kawlram hrawktu Newin Cozah lungton aa zuammi an rak si, Tlangcung mi vialte nih hriam tlaih in kan dohmi Kawl Ralkap Cozah Lungton a rak izuammi an si.

Cun khuaruahhar pakhat rih cu 2008 phunghram cohlan lo dingin CNF le tangti pawl nih a thli tein campaign an rak tuah lio ahkhan an nih Hmawngtlang khua cu an khua luhlai bakah Sanpiah-Pyi-Khan-Phyu- Zua tiah an rak itar i Ralkap lungton an rak izuam salam ko. Cun mirang zong an rak do bal lo. Chin Miphun nih revolution a tuah mi paoh ah an rak itel bal lo.Note : Khua pakhat nih aduh paoh in atummer kho mi NLD cu maw na vote ko rih lai. Vote for CNLD. Credit: Salai S Thlasling