MP KA LUT LAI NA TI CU THONG 20 IN SIFAK NA HLEN ASI: MAI DAWT CHIN SUNG

MP cuh dingin timh lamhnak na ngeihtak komi a si cun kan lawmhpi tuk. Mino tein ramrian luh cu a fawi lo nain duh a nung i ram caah a thami thil a chuah pi khawh. Pakhatnak. Khuate lei phaisa na bawmhmi hna ruangah a tinhmi a um ko lai tiah an rak ruah dihdiam cang. Atu ah MP ka lut lai na timi cu phaisa 20000 in Sifak pawl na hlen hna tinak a si.

Pahnihnak. Vawlei cung ramtha bik England zongah sianginn kai na si bantuk in ” Business man nih ram mipi le cozah influence ” tuah a tha lo timi na theih tuk ko bu ah Thantlang le Hakha peng mipi phaisa 20000 in influence tuah na timh mi hna hi a tha bak lo. Democracy phung he a kalhmi a si.

Pathumnak. USDP le CNLD an sunghnak dingah tiah Hakha le Thantlang peng khuate tiang cathanh na chuah peng. Atu cu an sungh cang tiah na ruah hnu ah MP ka cuh ve lai na timi cu mi lihchim lungput that lo taktak na si. 4. Mipi cu MP ka tlin cun ka thlahlawh in Sifak kan bawmh hna lai tiah na hlen khawh men hna lai nain mifim cu na hleng kho hna lai lo.

MP na tlin taktak cun Business tuah na ngah ti lai lo. Na tuah ko a si cun Democracy na duh loin pumpak caah na tuan sawh bia tinak si lai. Ramdawt lo cu mah dawt lo nakin a fak deuhmi a si. MP na cuh tak ding a si lo cun ka comment hi ka palh. na cuh tak cun ka comment a dik. Credit: Mai Dawt Chin Sung

Salai nih attialmi:Fimcawnnak le rum kawlnak hnu in ram le miphun ca pumpeknak lamthluan lei ah Caan sau ngai khua ka ruah hnu ah tukum thimnak ah Thantlang peng Pyine No.2 in luh ve ding biachahnak ka tuah, ka nu le ka pa zong nih thluachuah an ka ham piak cang.Fimcawnnak ah India college tha bik a si vemi Loyola College in bachelor ‘first class’ ka dih, ka chunmang a simi England zong ah MBA ka dih fawn.

Pumpak rumnak chawva zong ka kawl than i ka tinhmi dirhmun cu ka phan cang. Atu hi ram le miphun caah ka sining dihlak ka pek caan a si cang tiah ka ruah.Ram le miphun caah saduhthah tampi ka ngei ve, nain ka saduhthah tlinter ding ah midang rinh awk an tha lo timi fiang tein ka theih. Hi ruang ah keimah pumpak hrimhrim luh ka tim hi a si.

Independent in ka luh lai caah MP ka tlin ahcun vuanci le CM tibantuk cu tutan ah ka ngah lai lo a fiang. Nain, MP pakhat dirhmun in ka si khawh tawk Chin miphun dihlak caah riantuan kaa zuam lai. Khuate ka kal tik zong ah ka tuah khawh ding lawnglawng bia ka kamh hna lai.Kaa tinhmi hi tuhnu kum 5 ca lawng ah a si lo, MP sawhsawh va tuan lengmang ding zong a si lo.

Chinram caah ka saduhthah ka tlinter khawhnak ding caah cun Chief Minister tal ka si te hrimhrim a hau. Kum 15 maw kum 30 tiang a rau kho.Suu Kyi cu ka uar tuk, ka thih hnu tiang zong ah ka upat ko lai. Nain, ‘central power’ a tam tuknak party NLD ah cun zeitik hmanh ah luh kaa tim lo. Doh zong ka tim fawn hna lo, an tlamtlin lonak belte cu ka phuan pah te ko lai. Bawmh khawh tawk zong bawmh ka timh fawn hna.

Cun, CNLD bantuk in thutnak ngah duh ah miphun min zuar kaa tim bak lo. Ka party ah Chin ka telh(te lai) ruang ah vote pek ding ka si lai lo, ka tuahsernak tuanbia le miphun ka dawt le dawt lo ruang deuh ah vote pek or pek lo ding a si lai.Pumpak hlawknak caah si loin miphun caah riantuan a duhmi poahpoah he rian ka tuanti lai, hawikom ka ser hna lai. Nain,pumpak hlawknak a duhmi belte cu hrial an si lai.

Keimah meehmun ah aa cuh ding hi Dr. Hmuh Thang, Saya Rung Kaw le MP Ni Sui Lian an si. Miphun a dawmi lawngte an si ve. Keimah caah harnak tampi a um lai, nain a dikmi zumhnak a um ko ahcun teinak a um hrimhrim lai tiah ka zumh. A donghnak ah, MP ka tlin ahcun ka ngahmi hlawh fangkhat hmanh kaa lak lai lo. Keimah nak a herh deuhmi sifak harsa bawmhnak caah a dihlak in ka hlut lai. Pathian nih lam ka hruai hram ko seh.

Ahnubik Salai nih attialmi: Midang caah keimah phaisa ting thongkhat leng ka hman cang.Zahan zaan cu midang caah bawmhnak ka pekmi le kan nunphung thanchonak caah keimah pumpak phaisa ka hmanmi cazin ka tuah, hringtu ka pa motor ka cawk piakmi telh ahcun ting thongkhat leng a si cang. Langhter awk a tha lomi zong tampi a um.

February 12, 2014 London ka phak lio ah phaisa ting thongkhat ka ngei kho te lai timi ruahnak ka rak ngei rih lo, nain tuchun ah cun midang caah keimah phaisa ting thongkhat leng ka hman khawh cang. Pathian nih ka ruah lo leng in thluachuah aka pek.Bawmhnak ka tuah hi tukum lawng in aa thawkmi a si lo, bawm khotu dirhmun ka phak 2016 thawk in ka si khawh tawk bawmhnak ka tuah cang.

Atu cu kum 4 leng a si cang. Ngah than ding ruahchannak ka ngei ruang ah bawmhnak ka pek zong a si lo, midang lunglawmhter hi kaa lawmhnak sang bik a si caah ka ti khawh tawk bawmhnak ka tuah theu hi a si.Atu cu Chin miphun caah kau deuh in le hmual ngei deuh in rian tuan ka duh i kaa tim fawn, Thantlang peng mipi nih nan caah riantuan ding nan ka duh le duh lo biachahnak tuah ding ni caan a phan cang. Hi lamthluan ah cun mipi lungtlinpinak(mandate) ngeih hmasa a herh. Khua fak piin tuak hnu ah vote pe hram u.Credit: Salai Lungthlitum