MIZORAM APHAN MI RALZAM CAAH MP LALROSANGA A CAWLCANG

Mizoram ah a ummi ralzaam hna covid zawtnak lak in an him khawhnak ding le zawtnak an ngeih sual i, i zohkhanhnak dingah Mizoram MP C.Lalrosanga nih bawmhnak a halpiak hna. Mizoram MP Pu C Lalrosanga nih Kawlram ralzam mizoram ah a ummi hna covid zawtnak in an him khawhnak dingah sii-ai siseh zawtnak an ngeihsual i Oxygen le aharhmi dang tawlrelpiak dingin Minister of State for External Affairs RK Ranjan Singh sin ah a chim.

RK Ranjan Singh le Pu. C Lalrosangah cu nizan tihni ah khan chawnhbiaknak an ngei. Cu an i chawnhnak ahcun Kawlram ralzam pawng caah External Affairs hmangin tuah khawh dingmi cu tuah ding in RK Ranjan Singh nih lehnak atuah tiah Mizoram LPS nih thanhnak atuah. Mizoram ah kawlram ralzam a ummi cazin an lak khawhmi ah thonghra hrawng an si.

Tthenkhat cu chungkhar sin ah an um hna i, tthenkhat cu inn an hlang hna. Cutikah cazin lak zong hi a har ngaingai i, a cunglei langhtermi nak leng zongin ralzaam hi an tam kho tiah an chim. Ralzam umnak camp ah a ummi hi tutiang rih ahcun an dam lio hna asi tiah tuanvo ngeitu pakhat nih a chim, Atu hrawnghrang ah Mizoram ah a ummi kawlram ralzam chungah a bik in CDM pawl hi an harsa ngaingai tiah theih asi.

Thawngpang dang:Nizan Yangon thonginn ah khuaruahhar thil a chuak. Vawleipi theih tiangin langhter asi. Yangon insein thonginn chungah duhlonak au thawng fakpi in a chuak. Dothlennak ah teinak kan hmuh hrimhrim lai tiah an au hna. Faktuk in authawng a chuah ruangah ralhrang tampi hna nih hriamnam he an kal hnawh hna i, thongchung ahcun an luh hnawh hna.

Duh lonak a langhtermi hna cu ralhrang kawlralkap hna nih an hrem an vuak hna i, a nunnak aliammi zong an um tiah thawngpang langhter asi. Hi konghe pehtlaiin kawlram thongtla pawl abuapitu buu chungah lutlai pakhat nih a chimmi cu Insein thonginn chungah thongtla tthenkhat hna cu duhlonak an langhter i, cu an au mi hna cu a tanglei bantukin a si.

Kan thisen a dai lai lo tiah an au, ram buainak ruangah thongtla pawl chuah dih hna uh, thongchung ah a dam lomi thatein zohkhanh hna uh tiah an au hna, Thonginn chungah covid zawtnak akarhtuk cang i, thatein zohkhanh an si lo timi hi thil acanning in theih khawhtuk a si. NLD chungtel U Nyan Win cu covid zawtnak in a nunnak aliam, Cun a sihni Kyaw Hu, Han Thar Myint le Min Twin Thit hna zong an ngei.

Thatein zohkhanhnak an tuah hna lo caah halnak tuah asi, cun thonginn tuanvo ngeitu hna zong thongtla pawl duhning in tuahpiak dingah kan hal rih i, kan tawlrel lai tiah a chim. Sihmanhsehlaw zanlei suimilam panga hrawngah ralhrang kawlralkap pawl motor 7 in an hriamnam he thongchung ah an lut i, duhlonak angeimi hna cu an hrem hna. Hliam faktuk in a tuarmi tamtuk an um i, a thi dingmi zong minung 8 an um, fiangtein thilsining theih dingin kan i zuam lio asi tiah RFA ah a chim.

Be the first to comment

Leave a Reply

Your email address will not be published.


*