LUNGDONH AN TIM TI LO, AN PHUAN THAN HOI CANG

Thantlang CNLD (Miphun) Party Thanhca (Statement ) No 2. Pakhatnak. CNLD EC nih Thantlang CNLD Partu cu 11-7-2020 ni thla khenh in kan hrawh an timi cu hrawh khawhnak nawl an ngei lo. A sullam cu Thatlang CNLD Party cu members tampi le EC tampi in dirhmi a si cang caah phung ning loin hrawh khawh asi lo. Thantlang CNLD Party kan dir hmun thlen nawnna a um hlei lo.

Pahnihnak. Bahu CEC nih phung an buar tiin an langhter mi hi phung kan buarmi sualnak zong a um fawn lo. CNLD Party cu Bottom up ( tangin cunglei ah) ai hruaimi Party kan si. Cu caah cunglei CEC nih direct in hrawh khawnak upadi chuahmi zong kan ngei fawn lo. Pathumnak. Cucaah ning cang loin CEC nih phuahnak le hrawhnak an tuahmi hi party zulh phung chungah a um lo caah kanmah tein ( a thingning) kan i hruai ko lai tiah Thantlang Peng CNLD party vialte kan in theihter hna.

Palinak. CEC nih a um ciami Thantlang CNLD kha phung a buar tiah an hrawh hnu ah 12,7,2020 ni zan ah Thantlang No 3 Pu Thawng Hnin inn meeting a thlithup in an tuah i Committee an ser. An meeting ah CNLD party chungtel a si lomi he kan party chung in (3) hrawng an zapi pahra tluk nih meeting an tuah ti thawng kan theih. Hi hi CNLD party lungrualnak an hrawhnak asi.

Panganak. Thantlang CNLD party min put in Bahu CEC nih Committe thar kan set an timi cu Thantlang CNLD party thencheu lai kan sian lo caah kan cohlang kho lo. Cucaah a rak um cangmi EC le Members vialte hna nih theih loin a thli in meeting auhnak le sawmnak a um ahcun Thantlang khuachung CNLD party member chung in siseh khuate lei vialte zong rak in telo dingin thawng kan in thanh hna. Thantlang Miphun Party (CNLD).

Relchih hmah.Salai Mang Hre Lian nih Pu Lal Maung Cung le Pu Tum Sang an i thlak nakding lam a um ti lo tiah a chim.2020 July 13 ah Thantlang ah kan va kal, party chung thil umtuning siamremh ah a si i atu bantuk in cathanh an chuah than mi kong ah Pu Lal Maung Cung le Pu Tum Sang hi an i thlak nakding lam zong a um ti lo mi a si, tiah CNLD Campaign Specialist Salai Mang Hre Lian nih The Hakha Post ah a chim.

Pu Lal Maung Cung le Pu Tum Sang cu, party phung an buar ca ah CNLD CEC nih July 11 ah party tuanvo ngeitu sinak le party chungtel sinak in a dinhter cang hna. Atu cathanh No. 2 an thlah mi kong zong ah party EC dangdang kha phuah an si lo i an konglam chim ding a um lo. Anmah pahnih hi phuah mi cu an si. Atu bantuk in party seal hna hman i duhpoh in statement (cathanh) chuahnak nawl zong an ngei lo.

Hi thil hna sining ruang ah Thantlang ah kan va kal mi a si,” tiah Salai Mang Hre Lian nih The Hakha Post ah a chim.Hi kong hi Pu Lal Maung Cung nih July 14 zaanlei ah a facebook cahmai ah cathanh no.2 an chuah mi he a tarchih mi, “Thantlang Miphun Party hrawh ding in Hakha in a hong mi Salai Mang Hre Lian le Salai Ngun San Aung hna dirh mi CNLD party thar cohlanlonak,” tiin a tialchih mi kong ah atu bantuk in Salai Mang Hre Lian nih bialehnak a tuah hi a si. Ref. THP

Salai Ceu Bik Thawng nih attial vemi cu :Ka u Kawi Aung Pa (Pu LMC), Voihnih khengte candidate in hnawl a tuar cangmi ka si caah atu bantuk in party nih candidate hmun an in pek lomi le an in dinhtermi cungah na tuar dingmi hi kan theihthiam piak ngaingai. Kan tuarpi ngaingai. Azeikhom si ah buupi nih khuakhanmi cu pom khawh tu i zuam ko kun usih. Pathian khuakhan a si ko lai tiah pom ko usih. Kei zong cuh loin dawh ka um ve ko lai hih.

Na thachia hrimhrim hlah. Kan no tuk ko rih dakaw. Ramkhel ahcun caan tampi kan nei ko rih. Miphun rian cu MP si theng le party chungtel si theng lawngin ttuanmi a si lem lo i hmunkhat ah kan miphun caah kan ttuantti dih ko hna lai. Chin miphun cu kan tlawm tuk caah miphun rian ahcun aho hmanh kutsih ai thlah ding kan um lo. Rian kan ttuantti dih ko hna lai.

Na ca post mi kongah na dirhmun na tialmi pawl cu na hmuhning le na dirhmun si ko caah ka theihthiam ko. Keimah kong na hun chimmi tete zawn belte ah na ka ruah palhmi pa (3) te fianter ka duh ko. (1) Na ca i 4nak ah “CBT nih (candidate) sohluah a chiah i Thantlang EC upa nih voi 2 kan ceih le…” timi kha sohluah ca kha March thla ah voikhat June thla ah voikhat tiin voi 2 bak ka chiahmi kha nangmah Chairman le ka pa Tialawipa (Pu Tum Sang) nih nan ka hnawlpiak i EC ah nan ka chuahpiak duh lo cumu.

Nan ka hnawlnak ca zong cu a um ko. Cun, Central in Team thlahmi an rak rat zongah EC ko uhlaw CBT sohluah hi ceihpiak uh an ti i zongah nan duh lo cumu. Kum 2016 lio tein kan khiah cangmi a si nan ti. (2) Na ca i 7nak ah “CEC meeting ah CBT nih a chuahpi” na timi hi ka chuahpi hrimhrim lo. CEC nih thlahmi Team tu nih nan sin an rat i an hmuhmi– EC nan kawh duh lonak, nan rak hro hna nak, sandah kan in piah hnawh hna lai nan rak tinak tepawl— kha CEC meeting ah report (asiyinkhansa) an chuahpi i cucu action an lakmi a si. Kei cu meeting ah zeihmanh kai thlaak lo dakaw.

Pathumnak: Na ca i 8nak ah “CBT candidate hmuh khawhnak dingah khua an khan” timi zong hi purhdahnak sawhsawh a si. MP cuh duh tukmi kan lawh caah “Kai cuh lailo” tiah zapi theih in ka thanh cangmi a si.Pumpak le buu rian cawh hlah usih. Ramkhel le buu rian ah kan ruahnak aa danmi kha pumpak ah luhter hlah usih. Kei cu tii le chiti cawh ka duh ballo. Buu le ramkhel ah kan ruahnak aa dang nain pumpak in kan hua hrimhrim hna lo i kan upat peng ko hna. Kan tlaihchan peng ko hna lai.Miphun ah na ttuan hawi, Chinku Pa (TT)