LUNG A FAKTUK AN MAWH BAK LO, CHIM PHUAN LO AWK HRIMHRIM ATTHA LO

Hakha khua ah siseh, Chin ram kulh chung khuakip ah siseh, inn hlan man a kai tuk. Sifak santlai lomi inn hmun kan sawk tikah kan hmu kho fawn lo. Hakha cu Chin ramkulh khuapi an ti bantuk in a khuakip in rat i umthut an duh cio. NLD nih nan tuah mi hnihkhat te hi misifak nih cawk khawh lo ding tiang in a man a fak.

Mirum ca thiamthiam a si. Hi kong hi NLD a cozah nih mi zaapi caah tlangtlak nan i tim lo. Pyine budget 150 Billion chung ah Chin khualipi sersiamnak inn hmunthar man pek hau loin 2Billion ti bantuk budget chiah piak ding tuah sehlaw zeitluk in dah kan i lawmh lai. A tu cu budget zong mipi ai awh tu thimmi hna nih nan kan hal piak duh lo i, kan mah mipi sin tu ah tangkaa nan kan hal than.

Hihi mi zaapi zawn a ruah lomi NLD nan si caah a si. 2, Hakha khua chung i mi inn hlang, kum 10 leng a um mi cu inn hmun kan i pek hna lai tiah nan biakam a sinatein a tu ahcu kum 30 le kum 40 um mi hmanh kha inn hmun pek an si lo. A tu tiang inn laisen nan kan tuah piak duh lo. Hihi NLD Cozah nih mipi zawn nan kan ruah lo a si ko lo maw?

Pathumnak. Pupa rawlci hi a ngeitu zeihmanh theihter loin NLD a Cozah nih nan duh poah in nan hman. Pupa vawlei a um lo tiah nan aupi. 2008 phunghrampi relnak pohmah 37 (A) i a tialmi nan i tleih i a Cozah nih zei zong vialte a ngeih mi a si caah kan duh poah in kan tuah khawh nan ti. Nai-ngai-daw timi biafang hi a Cozah lawng maw a si. Rammi vialte kan i tel dih ve.

Kan mah ta, Rammi ta a si ve ko lo maw? Nan mah nih kan ta tiah ziah nan ti khawh? Chin ramkulh Cozah nih biatiam a pek hna ning le hlen bantuk an si ning kong pawl. Pakhatnak Kum 2015 in NLD nih cozah an tlaih sin in ram thumnak zong a phan kho lomi kan ram thatlo ruangah a um mi Chin (Lai) kan fa kan naule vialte hna a kir duh mi hung kir ulaw innhmun, loram kan in pek hna lai tiah, ram kip ummi (Lai) Chin mi sinah thawng a kan thanhter.

Pahnihnak. Cutin cun thawng kan theih sin in mizo ram ummi Chin (Lai) fa hna nih cun committee dirh in Hakha ah Pu Zo Bawi le Isaac Khen tong ding in Feb 22-23, 2016 kum ah khan 1nak Mizo ram Chin Relief Committee chung tel 4 nih kan hung ton hna. Mah ahcun hung kir than uh a kir khomi cu inn hmun le ram cu kan in pek ko hna lai an ti.

Pathumnak. Kum 2016 kum dongh nak lei in a pikpak in kan hung lut. Cuticun Hakha Chin cozah pawl cu kan tlunkal thawng theihter lengmang an si i, nihin ni tiang ah minung thongkhat le zathum (1300) kan hung phan cu hnu ah harsatnak tampi he Hakha khuachung ah mi inn tang hlang in khua kan sa ve hna.

Mah hnu ahcun Hakha khua ah khuasak aa harh tukmi zei mawzat chungkhar cu khuate lei ah le Falam lei ah kan i then dih hna. Palinak. Cun kan Chin cozah cu a hung kal cuahmah i nihin ni ramleng ummi fale le Chin (Lai) mi hna cu kan cozah nih cun inn hmun a kan pek lai tiah ruahchannak ngan pi he kan hngah lio ah Hakha Town committee nih kum 20-30 in mi inntang hlang in khuasa mi an um lio ah nan nih ramdang in a rak tlung mi hna cu inn hmun loram cu kan in pe kho hna lo tiah an kan ti.

Panganak.A tu kan Lairam (Chin) cozah a kan tlaihpiaktu nih hin vawlei cung ramkip ummi Lai (Chin) mi vialte cu lentecelh nak ah an kan hmang tu hi an rak si. Hlen le rawi ding ca le voikhat minthatnak laknak lawng ah Chin Miphun kan Laimi a kan duh si tihi kum (5) chung an riantuan mi le an biakam mi vialte zoh tikah hi biatak pakhat hmanh a um lo.

Cucaah kan Chin (Lai miphun) vialte hna lungfim caan a za cang lo maw, lungfim tein i ruat tuah.(6). Chin ramkulh chung kan cozah cu sifak santlailo sintu ah inn-hmun cu a kan zuarh. Inn hmun hi a kan pek siloin cozah sin ah kan cawk mi a rak si.Cucaah cun kan nih Mizo ram in a rak kir mi, misifak khuasak har , kut riantuan mi kan caah cun inn hmun hi kan cozah nih hin hung kan pe hmanh sehlaw kan caw kho lai lo.

Cucaah cun a tu kan dirhmun ahcun kan mah le umnak ram cio ah um hi kan caah a tha deuh. Cun hi inn hmun le lo- ram kong i Hakha bawi pawl si hna seh, Mizo ram bawipawl he ai ton kho ding in phaisa an kan thawh piak tu tete nan cung ah thinlung tak in kan i lawm. Credit: SD Henry

Be the first to comment

Leave a Reply

Your email address will not be published.


*