LAKFA A SI LOMI NIH CUN MIPHUN PARTY CNLD MEE KAN PEK HRIMHRIM DING ASI

Lakfa a si lomi nih cun kan chuahsemnak Miphun Party CNLD mee kan pek hrimhrim ding si. Tutan 2020 Kawlram thimnak kongah ruahnak, hmuhnak aa dang cio. Tanhmi party zong aa dang cio. Miphun sinak a fiang huaha lo mi poh nih mah unau naihniam in mee pek kan i tim. Chin thisen a kengmi nih CNLD mee pek kan i tim ve. Cu lak ah lu le taw hngal lomi nih Kawl party mee pek kan i tim ve.

Chin ka si a timi nih cun mah le Chin party te mee kan pek ding hrimhrim a si. Lai phungthluk hmanh ah ” mising dawt le ram hram cheih,” an ti. Mah mahro, mi miro tiah kan pupa phungthluk ah a um. Kan fian a herhmi cu Chin Party tluk in Chin Ram le Chin Miphun a dawmi Vawlei chuak ah an um lo tihi a si.

Kawl Party tanh le dawt cu zei he dah aa lawh ti cun mipa pakhat a pa ei sin ah a um bantuk khi a si.Fa tak le lakfa cu pa thinlung ah zeitikhmanh ah dawtnak khing aa tluk bal lo. Party dang mee pek cu Nu ei , Pa ei kuttang va um khi a si. Hmuh temnak a um tikah ah Pa nih cun amah chungchuak le fa ei cu a thleidan zungzal hna ti philh hlah.

Cucaah kanmah Chin minung te nih kan Chin ram hruai hna seh law sersiam hna seh ti na duh ko cun CNLD party lengah mee pek ding party dang an um lo. Lungfim ko bu i Kawlpa hmai ah lu khun peng na duh lo cun CNLD mee pe. Miphun kan sinak, kan nunphung, kan holh le kan caa tlau hlah seh ti na duh cun CNLD mee pe.

Mah nu le pa dawtnak a thlum na theih ko i mah hringtu nule pa sin te thut um na duh cun CNLD mee pe. Chin ram, Chin miphun nih kan herhmi a theibik mi cu CNLD lawng an si caah CNLD mee pe. Chin Miphun caah policy dikhman aa tlaihmi le Chin Miphun a kan huap khotu cu CNLD lawng an si caah CNLD mee pe. Chin dik tak na si ko cun na chuahsemnak na Miphun Party simi CNLD mee pe. Atu hi caan tha a si. Thim i palh hrimhrim hlah. Faktak maw na si, lakfa dah ti cu nangmah tein rak i ruat law Chin na si bak ko cun CNLD mee rak pe tiah kan sawm.Credit: Tluang Ceu Thang

Be the first to comment

Leave a Reply

Your email address will not be published.


*