LAIMI KANPA CU CNLD LE CNF CUNGAH ALUNG TLING TI LO

JP Biak Tin Sang:CNF/A Le CNLD Hruaitu Upa Hna Ka Lung An Tlinglo Tuk: A tu lio kan kawlram ah minung a simi paoh hngakchia upa, miphun zakip nih buaipimi le mah le si khawh tawk in ttan lak cio in ralkap nih ram uknaak aanaa an laakmi duhlonaak a phunphun in langh ter in ca zong an chuah cio lio ah kan nih Chin miphun aiawh tu kan ralkap CNF/CNA nih Kawl ralkap duhlonaak ca an langh termi ka hmu ruam lo.CNDP upa hna nih an langh ter vemi a tanglei ca thanh zong hi miphun party tling ca thanh ca ah cun a phung men te a si ka ti.

Duhlonaak ca kan chuah ve ko hei ti sawhsawh a si i ral ttha dir hmun tling taktak le miphun aiawh party pical ca thanh ding ah cun a tlaak lo. A phung men a si i mi nih nihsawhawk men ca thanh a si tiah ka ruah ka lung a tling lo tuk.Myahwadi khua hna i DKBA Karen ralkap an cawl cangh le mipi an runvenning hna cu tuksapur bak an si. Ziah khoi a herh tuk lio ah CNF/CNA ralkap hna khoika ah dah nan um kun,

Zungkai lo in duhnaak a langh ter i tlerhkhonh a tongmi fanau vialte hna zeihmanh nan chanh ve kun hna lo. Teinaak puan rang zonh tik ceu ah maw hmai suang dir nan i cuh tthan te kun hnga. Ka lung nan tling lo tuk! Kan hawi miphun cu nu hngakchia mino te hmanh nih nizan ah a nunnaak thap in kawlram miphun dihlak ca ah tuanbia
dawh a ttial cang hi mu. By. JP Biak Tin Sang.

Kawl Ralkap Thlaknak Lam Pakhat Lawng A Um. Ralkap uknak thlak i nawlngeihnak lak ding hi cu a fawi lai lo. Thlapa kan lak lai tbk a si. Ralkap nih mipi sinah nawlngeihnak a pe hrimhrim lai lo.An pek ahcun anmah tein an i ap zong a si lai i, nan duh poah in kan tuah ko u ti he zong aa khat. A sullam cu anmah le anmah tein thah (suicide) bantuk si.Mipi cungah sualnak an tuahmi a tam tuk cang tikah kan caah luatnak ding lam a um ti lo timi an theih tuk.

An nawlngeihnak chub ding dirhmun ah phan hna seh law a zam ding lawng te an si.Cucaah a nunnnak ding le a himnak dingmi lam cu hriamnaam in runveng lawnglawng a si. Mipi zeitluk in an thih zong ah an himnak a si poah cun a poi ah an chia lai lo. Kawl ralkap bantuk in a chiahrumi Libyan hruaitu Muammar Gaddafi a thihning kha an caah cawnpiaktu tha tuk a si. Mipi nih an celh ti lo hnuah tutan bantukin an chuah hnawh i an au hnawh ve. Daite in sandah a piahmi hna cu an kah hna. Cuticun hriamnan in an doh colh ve hna.

Cozah ralkap cu an thawn deuh caah an tei ngai hna. Tam tuk an thah hna, an hren hna, an hrem hna. An inn chung, khur chung le ram tang tiang an dawi hna. Khuacimui in a tuah hna hnuah NATO ralkak nih an rak bawmh hna. Thil sing a vun i thleng thluahmah than i, thing kua le lung kua tiang a dawimi hna cu amah tu kha dawimi ah a cang. An tei i an tlaih cu sau zong a nung manh lo. Mipi thinhun nih a kangh in a kangh dih colh. Zohchia in a thi.Kawl ralkap zong a dihdongh tiang an tuah dingmi cu hriamnam thlah lo; uknak thlah lo hi an nunnak lam pakhat te a ummi a si.

Cucaah mipi nih fawi tein tei khawh dingmi an si lo.Fawi tein uknak a hlonh ding an si lo. Dictatorship uknak cu khawika hmanh ah a hmunmi a si lo caah an tlak caan cu a phan te ko lai. Asinain thisen tampi a luan ta hau; ram zong a rawh len hmasa hau.Hi tiang tiang dirhmun phak taktak maw a hauh ko kan ti men lai. Thisen a luan lo ahcun ram thlen hi a fawi lo. Hi tiang dirhmun phak cu aho ca hmanh ah kan duh lo. Asinain dictatorship uknak thlak khawhnak ding ah cun thisen luan a hau. Kawram ah mipi thisen a luan a tlawm ti lo.

Hriamnam loin doh khawh ding an si ti lo; international bawmhnak hrimhrim kan hau cang. Uknak maw cozah maw thlak kan duh taktak ahcun mipi thazaang menmen sawhsawh cun a si kho lo.Uknak tha lo nih an thazaang ah hman cemmi cu ralkap le police an si. Police hranning kha Hong Kong mipi zong an ceih lo. Hong Kong nih tampi a kan cawnpiak fawn. Hong Kong cu Taluk chungum si ko nain amah tein democracy phung in a ukmi ram a si. Judicial lei a siah legal system lei a siah mah tein tlaang aa tlami an si.Media freedom an ngei;

Taluk bantuk si loin zalonnak tling an ngei.Asinain Taluk nih rengh a vun timh thluahmah hna. Mi sual lunghrinh poah cu Taluk ah kuat an si cang lai tiah upadi a chuahpiak hna. Taluk ah kuat an si ahcun an mi tuahto le hran kha celh ding an si lo; nuhrin covo an pe fawn hna lai lo. Mipi leiin fak tuk duh lonak a chuak. An turu kho tuk hna. Minung zong an thi len ve hna. An let than. An tei. Asinain Taluk nih National Security law a serpiak than hna. Rengh chin lengmang a timh. Media zalonnak a rengh chin lengmang.Mi lian pawl an tlau lengmang.

A hnuah Taluk cozah nih a hrenh khumh hna tbk theih than an si. Cu bantuk na tuah ahcun nuarbuar ah chiahpiak nan si lai tbk phunphun in NSL a ser. Pro democracy pawl nih an duh naisai ve lo. Asinain Virus a ser i mipi tonpumhnak a zorter ngaingai. Virus a tlau cun an linsa thiamthiam ko lai tiah zumh a si. Cun mipi nih an doh ngaimi pakhat cu police pawl hran ning hi a si. Hriam an tlaih tikah cunglei in nawlpek an si cang ahcun mipi fah le din kha bispi an chia lo.

Atu lio kan ram zong ralkap le police runvennak phaw ah an hman tikah mipi nih cil le tei hna ding cu a fawi lo.Kan teinak ding lam cu mipi zong hriamnam tlaih; Tlang Cung hriamtlai he i bawmh, cun NATO ralkap nih dirkamh a hau. Thisen a luan hau.Cu lo cun ralkap kut in nawlngeihnak lak khawhnak lam a um lo. Zungzal in an tlaih peng ko lai. Nai i Min Aung Hliang biachim hna kha zeitluk zer dah an si ti a fiang. NCA minthu pawl aa sawmter thulh hna; party dang pawl a hei tluanh luklak hna. Mipi hlennak bia pawl a hei chim hna. Thenthek dih hna law na uk khawh hna lai timi lam an i tlaihmi fiang tuk in theih khawh a si. Tutan ah mipi an fail than ahcun hmailei caah ruahchannak a um ti lo. Credit:Luther Tinhre.

Be the first to comment

Leave a Reply

Your email address will not be published.


*