KHAH UAR AN UM BAK CANG HIH, MIPHUN AN VUN I LANGH KO CANG HIH

Nu Sui Hlei Tial Ruak Vuinak Kong Cathanh. Malaysia in a chuahsemnak Thantlang ah ruakvui ding in an rak tlunpi mi kan farnu Sui Hlei Tial (21) ruak cu Thantlang Covid-19 Main Committee nih Thantlang khua ah luhnak nawl le vuinak nawl pek loin Thang Hrim sia zuatnak, Hakha le Thantlang lampi kam, Thantlang in Khan 4 a hlatnak hmun ah an vuiter mi hna cung ah kan lung a fak i kan ngeih a chia.

Chin miphun cu Kan nunphung in kan thih ni le kan ruak cung ah aa tuarpi mi, ngaihchiatnak aa hrawmpi mi miphun kan si. Atu bantuk in kan farnu ruak cu kan nunphung le phunglam he aa kalh in le sipin upadi he aa ralkah in minung limhang ngeih loin lamkam ah an vuiter hi Chin miphun kan limhang le kan nunphung, kan phunglam zei relpiak lo le upatpiak lo a si, tiah kan ruah.

Pakhatnak, Thihnak a tong mi kan farnu Sui Hlei Tial le a chungkhat, sahlawh rualchan dihlak, Hakha – Thantlang CNLD nih nan tuarnak le nan ngaihchiatnak kan in hrawmpi hna. Pathian tu nih nan ngaihchiatnak le nan tuarnak in hnem ko hna seh, ti hi kan thlacamnak a si.

Pahnihnak. Hakha, Thantlang peng, CNLD nih kan farnu Sui Hlei Tial ruak he pehtlai in an tawlrelning le an cawlcanghning cungah Thantlang Covid-19 Main Committee cu fakpi in kan doh i kan cohlang kho lo. Chin miphun upat lo le kan nunphung, kan limhang zei relpiak lo a si, tiah kan pom.

Pathumnak. A tu bantuk in Thantlang Covid – 19 Main Committee nih khamhnak a tuah mi cung ah ramkulh cozah nawlngeihnak in khamh mi a si le si lo, ṭuanvo ngeitu hna nih Chin mizapi sin ah fianternak tuah ding le thil dik, thil hman (justice) a chuah nakhnga ṭuanvo lak ding in kan forhfial hna.

Palinak. Chin mino bu hna le Chin Sianghleirun bu hna nih 2020 October 7 ah cathanh an chuah mi cu Hakha – Thantlang CNLD nih kan dirkamh. Thanhca ah halnak an tuah bantuk in Chin ramkulh cozah nih rianrang in hma lak ding ah kan forhfial hna.

Panganak. Kan far nu Sui Hlei Tial ruak kong ah limhang ngei le dik tein tawlrelnak a um hlan chung poh Hakha – Thantlang CNLD nih Mino Bu, Chin Zatlang bu hna le thil dik a chuahnak ding ah a cawlcangtu dihlak he i bawm in hmai kan nawr ve lai tiah hi cathanh hi kan chuah. Executive Committees. Thantlang—Hakha, 2020 October (Tho) 8.

Hi konghi vun relchih: Kan farnu Sui Hlei Tial ruak tawlrelnak he pehtlai in pehzulh fianternak. 2020 October 08, zinglei suimilam 9 in hlei 11 ah Thantlang penguk zung ah cozah zunglei nawlngeitu, khua nu/pa le TYA/TSC upa tonbiaruahnak kan ngei. A biapi in kan lungfah, ngaihchiatnak le biakhiahnak ngeitu Covid-19 main committee ah khuami le zatlang phu telh le ruahnak hal ding ah chimh ruah a si.

2020 October 08, zanlei 1pm- 4pm ah Chin ramkulh cozah in Vuanci Pu Soe Htet, Upadi Choh Pu Sonny Thang Cung, Chin ramkulh uknak zung bawizik, Palik bawizik le khua nu/pa, biaknak lei, ngaihchiatnak tong mi chungkhar le TYA/TSC kan i tel. Tonnak a dih hnu ah Ramkulh cozah le TYA/TSC lawng tel in tonnak ngeih ding in hal a si i a dih hnu ah kanmah le Cozah upa lawng zalong tein kan i tong.

Chin ramkulh cozah sin ah kan hal mi cu pakhatnak, Hi kongkau ah mizapi lei teltumnak in a zalong mi hlathlai phu (Independent Inquiry Commission) dirh i hmuhchuah mi fianhnak le dantatnak ngeih ding, Pahnihnak. Peng huap Covid-19 Committee ah khuami teltumnak ngei ding in remhsiam ding. Pathumnak. Hihnu hmailei ah hi bantuk a um lo nakding le Covid-19 zulhphung he aa tlak in aho mithi zong nih thlaan hmunte ah an i vui khawh nakhnga tawlrelpiak ding. Hi a cunglei kan hal mi kong ah Chin ramkulh cozah nih ruahpiak ding le Statement siseh, thawngfianhnak tuahpiak ding in lehnak an kan ngeih. Credit: Thantlang Youth Association.

Be the first to comment

Leave a Reply

Your email address will not be published.


*