KA NING A ZAK TUK HRINGHRAN, HAKHA LE TLANGLO KALNAK

Hakha peng Sipin nih Pi Van Bawi Hnem sin ah kawlram tangka tingkhat an pek mi hi ka ning a zak taktak. A ruang ka chim te lai atanglei ah a sining fiangte in mu. Pi Van Bawi Hnem le Hakha Sipin karlak ah remhdaihnak or lungtlinnak an tuahmi cungah Chinmi vialte kan i lawmtuk cio lai tiah ka ruah. Aruang cu keimah pumpak hrimhrim kai lawmhtuk caah asi.

Pi Van Bawi Hnem hi khuate tiah kan serhsat in kan thlanglamh ding asi lo. Aho paoh si uh sih, Mei zeipaoh si uh sih, a phan tuan le a phuan tlai lawngte kan si. Khuapi kan ti lengmang mi zonghi khuate kan um thawngin khuapi a can tihi zeitik hmanh ah kan philh lo dingmi a si. Hakha khuapi kan ti lengmang mi zong hi ruah kiarmar ahcun khuate hna thawngin dakaw khuapi asi ko cuh.

Khuapi le khuate karlak ah pakhat hmanh thleidannak a um ding asi lo. Zeicaah tiah khuapi kan timi zong hi a cung kan chimcia bangin khuate kan um thawngin khuapi ah a cangmi a si. Tahchunnak ah Hakha kek lawng khi hakha um hna sehlaw Hakha khualipi dirhmun a phan kho lai lo. Cucaah Kan khualipi Hakha kan ti a si ahcun khuate zong kan i tel or an itel ti kha philh hlah uh sih.

Hakha khualipi mirum mi tthawng kan timi hna zong khi Hakha kek a simi hohmanh an um lo. Khuate in a rami lawngte an si ti zong hi kan philh lo dingmi asi. Hakha cu khuate mi zong nih kan khua kan ti ah kan palh lai lo. Hi kong cu zapi nih kan theih dih mi asi ko caah tampi chim ahau lo. Tutan ah langhter le Laimi i fiang hna usih ti ka duhmi cu kan u asimi Pi Van Bawi Hnem kong hi asi.

Tthenkhat hmur le ka bia theih tikah Khuate in a rami a si tiah a chimmi tampi an um. Thatein tuak ahcun Pi Van Bawi Hnem khua zong asi tihi kan philh lo ah a ttha. Tutan a sining a dirhmun kan theih dih. Cun a hnu bik ah Hakha Sipin he remnak an tuah khawh cang timi kan theih dih kan i lawmtuk cio hna. Aruang cu Laimi hi pakhat le pakhat karlak ah remnak a duhmi kan si caah asi.

Hi lio caan thil pakhat ruah lo awk attha lomi thil a um. Cucu a zeidang ah siloin Pi Van Bawi Hnem cu Hakha sipin nih kawlram tangka in tingkhat an pek timi hi asi. Khah vuntuak cio uhlaw, Hakha sipin nih tangka tingkhat an pek mi hi zeiltuk in aman atlawm i, zeitluk indah san atlaih lo timi kan i fiang dih cio hna lai tiah ka ruah. Laitlang sining zoh ahau.

Pi Van Bawi Hnem cu Thantlang peng Tlanglo khuami asi. Tlanglo khua le Hakha hi a tlawmbik Meng 50 a si. Tthal mangdara lio hmanh ah Tlanglo khua in Hakha kalnak dingah Motorcycle hlan mi hi a tlawmbik kawlram tangka in thong 40 a si. Updown in vun tuak ahcun an lakphakti dinnak he cun tingkhat hi a dih mi a si.

Tulio caan furpi lailei lam le suul tthat lo he cun Tlanglo kHhua in Hakha tiang motor cycle hlannak lawng hmanh ah kawlram tangka in tingkhat a dih cang. Lampi rawlttam tihal he vun tuak le bang ahcun a tlawmbik tinghnih deng khi adih mi asi. Asinain Pi Van Bawi Hnem cu dawtnak lungthin he zingka suimilam pali in aa thawh.

Hakha Peng sipin nih an auhnak bantuk tein Pi Van Bawi Hnem cu furpi le ruahsur khua al lak ah Hakha a phan. Sihmanhsehlaw Hakha Sipin hna nih Kawlram tangka in tingkhat an pek mi hi a zako maw? A cunglei ah thil sining ka rak langhter cang ko khih. Kawlram tangka tingkhat Pi Van Bawi Hnem nih remdeihnak caah tiah a cohlangmi thangthat aphu taktak mi asi.

Azin a sung dih, a kal umnak vialte a sung dih cikcek. Culawng siloin kumkhat chung attuan kawlmi vialte a sung dih cikcek ti usihlaw kan palh lai lo dah. Upat a tlaknak le zohchuntlak a sinak cu a zin sung dih hmanhseh, remdaihnak a duh caah a cohlan timi hi fiangtein theih khawh le ruahdamh khawh asi. Zeicaah tiah laksawng cu ka cohlang lai lo.

Hmailei ka ttuan kawlnak tu ah Pathian thluachuah ka hmuhkhawhnak dingtu ah thlacamnak tu in ka bawm ko ulaw tiah a timi asi. Tutan ah Pi Van Bawi Hnem cungah Hakha Sipin nih kawlram tangka in tingkhat te an pek mi hi cu Lailei sining an theih lo ruang ah maw asi? Pi Van Bawi Hnem lungput a tthatuk ruangah dah a si timi hi vun langhter le mipi ruah dingah ka vun ttialmi asi.By Saya Thang

Be the first to comment

Leave a Reply

Your email address will not be published.


*