KA MITTHLI MAN HI PU NGUN SAN AUNG NA PHUR CAWK TE LAI MAW

Pu Ngun San Aung. Tuni cu Ralkap hna puai ah an member thar na va si kaw an puai ah an in sawm i na va mirh lio ahkhan zei lungput dah na ngeih ve hnga. Na hmai zohah nai uang tuk hi teh. Na hnu lei in na miphun nih a zaan fatin belkheng an cumh le lampi ah tihal le rawl ṭam in an aunak cu na hna nai chit, na mit nai huh.Laimi na si ko maw? Lai ruahnak na ngei ko maw?

Chinmi cu na si tak tak ko tih! Chinmi cu Ralkap lungput kan ngeih ka theih bal ṭung lo. Kan pupa phung lam ahcun ai kilh tukmi pei kan rak si kha! A hlan i tuanbia dawh na kan ttialpiakmi cu zahan in pei belnang na neh dih ko hi. Phaisa na duh tuk ca maw a si? Na biakmi na Pathian nih ei loin an chiah bal ttung lo.Kan mitthli man hi na phur cawk te lai dek maw? Credit: Nusung Htg- Nunu

Pu Ngun San Aung nih a chimmi: Ralkap ca ah ka tuan lai lo, Hakha ca le miphun ca ah riantuan ka duh i ka cohlan ko: Pu Ngun San Aung. Ralkap nih nawlngeihnak a lak hnu ah Pu Ngun San Aung cu Chin State Administration Council Member (Chin Ramkulh Ukhruainak Council Member) ah rian an pek i ralkap ca ah tuan kaa tim lo, Hakha le miphun ca ah tuan kaa tim i ka cohlan ko, tiah Pu Ngun Sang Aung nih February 12 ah a chim.

State Administration Council Member ti mi cu Democracy phungning ahcun State Minister (Pyine Vuanci) tinak a si i Pu Ngun Sang Aung le Tedim in Pu Go Suan Khai cu rian an pek hna nain Pu Go Suan Khai belte nih a cohlang lo, tiah kan theih. Social Media ah ‘Shame on you’ (Ka ning na zak) tibantuk in mi tampi nih an ka ti ko. An mawh hrimhrim lo. Ka theihthiam tuk ko. Asinain, khatlei ah kei ka ruah mi cu, atu ka rian hi ka cohlan lo ahcun miphundangpa kha rian an pek lai i kanmah miphun zawn a kan ruat ti lai lo.

Kei cu, ka thiam tawk in Hakha ca le miphun ca hi kaa hmaithlak zungzal mi a si ko. Ka u nih, na rian kan kaiter lai. Cunglei ah rak ra an ka ti zong ah Hakha ca ah riantuan ka duh peng ca ah ka um lan ko,” tiah Pu Ngun Sang Aung nih The Hakha Times ah a chim. Hi kong ah Pu Ngun Sang Aung nih a peh rih mi cu, “NLD Cozah chan ah an riantuan mi ka lungfahnak a um ca ah Hakha ca ah tampi rian ka tuan a hau ka ti ca ah ka cohlan.

Tahchunhnak ah acre 600 ti mi Sangthar samh mi zong khi felfai tein tlamtlin ka duh. Cun, dinti kong hi a chung ah thuk deuh in luh i tha tein hman khawh a si nakhnga papek ka duh ngaingai fawn. Cucaah, ralkap ca ah ka tuan lai lo, Hakha khua ca, miphun le ram ca hi a si ko. Keimah rian hmun ah miphundangpa a rak luh ahcun zawn a kan ruat bal lai lo,” tiah a chimchap. Ralkap Cozah thar cu February 15 khin cun riantuan hram an thok cang lai.

Pu Ngun Sang Aung hi USDP Cozah chan (2010-2015) ah Sakremhnak Minister a rak tuan mi a si. Atu hi Democracy phung kha ralkap nih a chuh cang ca ah State Minister ti si loin State Administration Council Member tiin an thlen i February 15 in rian a thok cang lai. Tedim ah siseh, Hakha zong ah Penguk-bawi a rak tuan bal mi Pu Go Suan Khai belte, rian an pek mi cu a ngandamlonak langhter in cohlanlonak ca February 9 ah khan a tial cang, tiah kan theih. Credit: The Hakha Times.

Be the first to comment

Leave a Reply

Your email address will not be published.


*