HAKHA UM KAWL PAWL BIACHIM CU AN MAWH BAK LO, LAIMI CAAH LUNG AFAK KO

Halkha um Miphundang pawl nih CNLD an vote lai maw? Miphun Party dir hi a herh/palh maw? Halkha khuachung ahhin milu 30,000 (thongsawmthum) kuakap an um. Cu ahcun thongnga (5,000) hrawng hi miphundang (atam-u Kawl) an si lai tiah ruahdomh a si, cozah riantuan, ralkap le company riantuan an tam.

Tuchun NLD Halkha khuachung an ichawhnak zongah miphundang an tam tiah theih a si. Phundang in chim ahcun NLD le USDP cu Halkha ah campaign tuah hau loin vote 3,000 (thongthum) hrawng an i hum cia cang tinak a si. Kannih cu Chin kan si lo le zeitindah kan in vote rua hna hnga an kan ti.An palh hrimhrim lo. Zeitindah an miphun a si lomi party cu an vote duh khe lai.

Asi kun ah Chin mipi nih teh Chin party cu vote an pe kun lai maw? An pek kun lo ahcun (pek a herh lo kan ti ahcun) Chin party cu kan hrawh lawlaw kun ne lai maw? Pu Lian Uk nihcun CNF le CNLD hi um hlah sehlaw miphun dang hmai hmanh zeitindah kan khah lai ati ko khah. Kan Bawipa Jesuh nih hi vawlei ah riantuan hram a thawkka ah Sifakmi hna sin i thawngtha chim awk ah saltangmi hna sin i luatnak thanh awk ah le hremmi hna luatter dingah a ka thlah” ti hi a chim hmasa bikmi thawngtha a si (Luka 4:18).

A ngaingai ahcun miphun le biaknak ah thleidannak fak bik a tuartu, hrapcheu tiang dolh cangmi le a sifak bikmi Chin miphun kan himnak ding, luatnak ding le damnak tling kan hmuh khawh nakding hi Bawipa Jesuh hi vawlei a rak rat hnawhchan pakhat a si.Cucaah miphun ah fek tein dir hi ilaklawh hrimhrim hlah usih. Khrifa hna kan rian a si. Na ke hnih tein miphun ah chia ko. Teinak kan hmuh hrimhrim ko lai. Bawipa pei kan lei ah a ttang cu. Credit: Salai Ceu Bik Thawng

Relchih ve hmanh afiang ngaingai. Henry Van Thio Cu NLD Thawngin VP2 A Tling An Ti Maw Cu. Chin World nih Chinram NLD lamkaltu Dr.Sa Sa interview an tuah mi ah NLD party hi Chin mi a kan daw bik tu (Cezushin) an si. Zeicatiah anmah thawngin Henry Van Thio zong VP2 a kan pek a ti. Fact Check: Henry Van Thio cu vote 79 in VP2 a tling. Hi lakah NLD party vote cu 30 lawng a si i a tangmi 49 cu tlangcung mi party hna i MP vote an si.

Nominate a tuahtu cu NLD party an si nain VP a tlinter tu cu tlangcung mi party an si.Hi hmanh ah tlangcung mi party zeitluk dah a bia pit? Kawl party nih hruaimi party tang na um chung poah cu na miphun party nih hnu lei in an bawmh lo ahcun zeihmanh a si lo ti hi VP2 kongah tehte zoh ko uh! Atu ah UEC nih tlangcung mi party thawnnak hmun poah ah thimnak tuah lo ding an ti.

Tlangcung mi party an hrawh. Candidate pawl zong disqualify an ti hna.NLD nih tlangcung mi party thazang thawn lai hi an duh lo ee tiah tuan pi ah ka tial cang. Atu ka chim bantuk tein kawl le kawl cu buu dangdang an si zong an lung an i hmu i anmah le anmah cu an i dirkamh thiamthiam. VP2 pakhat te kan ngah ruangah kan i lawm ko.

Amah zong aa timh lo mi pi party NLD ah ai pe. Ai ruah lo tuk mi VP2 dirhmun hna a phan. Awngbali (lottery) cawk loin a ngah (a Poh) bantuk a si caah Pathian nih kan miphun a kan cawisan tiah ruat ko u si. Nain amah a cawisang tu hi miphun party an si ve caah miphun party CNLD ahhin kan lung i hmu in tangti hna u sih.Atu ahcun 2008 phunghram tharchuah mi ah tlangcung mi covo kong he aa pehtlaimi tete zong upadi an ser mi tete an um.Cauk hring ahcun a kan pek i a ngah cu kan ngah tak rih lo.

Hi pawl kong hna ceih ahcun miphun party he dakaw ceih a hau te lai cuh.Cucaah kan miphun nih kan pal ding bingbo le horthuk le tlangsang an tam tuk rih.Hi bantuk lio te ahhin kan lung ai rual a hau khun caah miphun aiawh CNLD party ahhin aw khat in chuah hna u si.Kanmah le kanmah kan i upat i kan thazang kan funtom hmasa lawng ah miphun dang upat zong kan tong ve lai i timi hi vote hlan ah biatak tein ruat hna u si. Credit: Salai Tin Maung Win

Be the first to comment

Leave a Reply

Your email address will not be published.


*