DR HMUH THANG NIH USDP AN SUNGHNAK ARUANG ACHIM CANG

2020 kum Myanmar ram Party tling Democracy thimnak ah USDP party in Thantlang Peng, Ramkulh Hluttaw No.2 ah aa zuam mi Dr. Hmuh Thang nih, teinak pakhat hmanh kan co lonak a ruang bik cu a kan zuamcawhtu party hna nih mizapi sin ah ralkap party an si an kan ti ca ah a si tiah a chim. Mara Area, Lautu Area ah mee ka hmu lo ti awktlak a si.

Lautu Area ahhin Tisen (A) lawng ah mee ka hmuh. Cun, Mara Area ahhin Lungcawite lawng ah mee ka hmuh. Zephai A he B he mee tlawmpal te taktak ka hmuh. Cun, Hlamphei ahhin mee khat hmanh ka hmu lo. Hi bantuk dirhmun ka phak ca ah sungh lo awk hrim ka tha lo,” tiah The Hakha Post ah a chim. Chin Ramkulh chung ah mee hmun 39 a um i , USDP party lei in Matupi Peng Ramkulh Hluttaw,

Falam Peng Ramkulh Hluttaw le Hakha Peng Amyotha Hluttaw-3 ah an i zuam lo. Cun, Dr. Hmuh Thang nih, “Mara Area lei ahhin cun, a dang Hluttaw candidate pawl nih lam le hlei kong ah ningcang loin an rak ka ti mi a um rua. Cu lawng si loin Candidate cheukhat nih khuate i meepek sawmnak an kal ahhin ralkap party an si tiah an aupi.

Lai lei ummi nih le zeibantuk bia chim ko zong ah an kan zum ti lo nain, ralkap ti an theih in cun an zumh dih hna. President Thein Sein chan lio in ralkap nih tukhremnak le thilphurhter a um lo ti zong hi an theih ko nain, hi ti tiang mee hmuh duh ah ningcang lo an chim hi cu ka lung a nuam lo ngai, tiah The Hakha Post ah a chimchap.

November 8 ah tuah mi Myanmar ram thimnak, Chin Ramkulh chung ah NLD party nih 36, ZCD nih 2 le CNLD nih 1 tiin teinak an co hna. USDP party hi a liamcia kum 2010 thimnak lio ahkhan Chin Ramkulh chung ah teinak an rak co i, Cozah a rak tlai mi an si ko nain 2015 kum ahcun hmun 5 chung lawng ah teinak an rak co tiah theih a si. Credit: The Hakha Post

Pu Zobawi nih a chimmi: Interview tete an ka tuah mi ah ka chim lengmang mi tutan thimnak ah a tlawm bik zatuak 80% in kan tei lai, ka ti mi kha zatuak 94% in Chin Ramkulh ah NLD nih kan tei taktak, tiah Chin Ramkulh NLD Chairman le atulio Hluttaw Speaker Pu Zo Bawi nih November 9 ah a chim. Kei cu ka chim tawn ko kha. Kaa lawng in chim tham cu a fawite.

Tuahsernak hi a biapi ka ti lengmang. Thimnak result a chuah tik ah nan fiang te ko lai, ka ti mi kha a si ko. 2015 kum thimnak lio ah khan zatuak 78% in kan rak tei. Tutan cu zatuak 94% in kan tei ko. Hakha le Tonzaang lawnglawng ah thutdan 3 kan sung. A dang poh kan tei dih ko. Chin Ramkulh huap lawng si loin Myanmar rampum huap zong in kan tei thiamthiam ko lai (Rampum huap hi news kan tial tiang ah an rel dih rih lo).

2015 kum nakin kan cak deuh thiamthiam ko lai,” tiah Pu Zo Bawi nih The Hakha Times ah a chim. Tutan thimnak ah Chin Ramkulh Hakha le Thantlang in teitu hna cu; Hakha in Pyithu Hluttaw Palai ah Pu Tial Ling (NLD), Amyotha No. 11 ah Prof. Dr. Aye Aye Ngun (NLD), Amyotha No. 12 ah Pu Ngun Vung (NLD),

Pyine No. 1 ah Pu Sonny Thang Cung (NLD), Pyine No. 2 ah Pu Siang Mang (CNLD) hna an si i Thantlang in; Pyithu ah Pu C. Za Cung (NLD), Amyotha No. 10 in Pu Henry Van Thio (NLD), Pyine No. 1 in Pu Chan Ham (NLD) le Pyine No. 2 in Pi Ni Sui Lian hna an si, tiah kan theih. Credit: The Hakha Times.

Be the first to comment

Leave a Reply

Your email address will not be published.


*