CNLD VOTE PEK LO RUANGAH LAIMI CHUNGKHAR AN BUAI RUANGMANG

US um kan fanu nih CNLD ruang ah a kan block dih. Kan hnu November 8, 2020 thimnak ah khan Falam ah kan chung tein vote kan thla ve.Kan chung tein vote thla kho hi minung kan si. A nulepa le a u nu tiin kan si. Kan pathum in NLD ah vote kan thlak dih. Vote kan thlak hlan ah khan US um kan fanu te nihcun CNLD vote nan rak thlak dih lai tiah a kan ti.

Aw ee kan rak thlak ko lai tiah kan leh. Sinain kan chung tein CNLD ah vote thlak cu kan i timh mi a si lo. Vote thlak lai lai zan cu a hung phan i cakuat in kan i chawn hna. US um kan fanu te nihcun CNLD ah vote nan rak pek hrimhrim lai tiah a kan ti than. A nulepa nihcun kanmah duhnak ah kan rak thlak kai lai tiah an ti ve. Cuticun vote thlak ni cu a hung phan i an chung tein NLD ah vote an pek dih.

Zan ah kan fanu te nih vote pek kong cu a van kan hal i NLD ah kan thlak ko khah tiah kan ti. Cu zan thawk te cun kan fanu cu a thinhung i Facebook a kan block dih. A tu tiang a chawnh zong a kan chawn ti lo caah chungkhar thinlung nuam loin kan um ko. A tanh tukmi party a chung le nih kan rak tanh ve lo ruang ah a thin hung ti cu kan theihthiam ko.

Sinain chawn lo hna in sau tuk a kan um sual lai ti kan phang tiah Falam um hringtu a nu nih a chim. Ramleng ummi mino hna nih CNLD maw NLD maw kan tanh tikah hin Laitlang ah a ummi nulepa le ulenau tiang an cung ah nawlngeih kan i timh awk a si lo. An mah duh mi te vote an thlak awk a si ko.

Ka duh mi nan vote lo ruang ah tangka kan kua ti hna lai lo, kan chawn ti hna lai lo ti hna cu a phung a si lomi a si. Fa le nih nulepa cung ah thinhunnak le ngaihchiatnak cu a can ah a um tawn ko lai. Sihmanh sehlaw party kong ahcun mah bantuk in kan um awk a si lo. US ah a ummi an fanu te zong a luan ngai. A duh mi party kha tanh ko sehlaw a za ko.

A nulepa chungkhar tiang in fial chih le hnek chih kha a herh mi a si lo. Thimnak zong a dih ko cang caah thinlung zong a thumh awk a si. Falam ah a ummi a nulepa cu thinlung nuam ngai loin a tu hi an um ko. An lungre zong a thei. Share in rak bawm cio hna uh. Credit: Lalnunmawi. Note: Hmanthlak ah nu a cuangmi hi Thailand nu asi.

Relchih: Joe Biden Nih Donald Trump cu faktuk in a tthuat cang, Theihcio bangin US president thimnak konghe pehtlaiin Joe Biden le Donald Trump cu an karlak thawngpang alinsa ngaingai. Culawng siloin US minung lila zong nih ahodah kan president asi lai tiah an buai khim i, vawleicung vialte zong an baui dih hna. Aruang cu tuchun nitiang thilsining fiangin a um lo caah asi.

President thar dirhmun tlai dingah Joe Biden cu atuhi timhtuahnak biatak tein angeih lio asi. Culio caan ah Donald Trump zong president sinak in fawite cun ttumchuk aitim ve lo. Hi konghe pehtlaiin Joe Biden nih a timi cu US President, Donald Trump cawlcangh ning hi cu ningzak tuk le mual apho ngaingai mi asi ko tiah fiangpup in a chim.

Teinak a hmuh lomi, a sungmi asi timi hi acohlang kho hrimhrim lo, hi nih hin atawka ahlim bak asi tiah a chim. Zeitluk hmanh in Donald Trump nih duh lo hmanhsehlaw thil a si cang mi cu ai thleng kho lai lo. Nawlngeihnak ka ken dingmi hi ahohmanh nih an buaiter kho lai lo tiah a chim pin ah Donald Trump zong nih abuaiter kho lai lo tiah a chim rih.

Hi konghe pehtlaiin Biden transition office nih an timi cu President thimnak ah thimtlinmi nih hin British Prime Minister Boris Johnson, French President Emmanuel Macron, German Chancellor Angela Merkel le Irish Taoiseach Micheál Martin hna pin ah Canadian Prime Minister Justin Trudeau hna cu a chawnh cang hna i, “America is back” tiah achimh hna tiah an langhter.

Hi lio caan ah Donald Trump cu biatak tein aa hrocer ngaingai ti asi. Teinak a hmuhnak kongah siseh, vote relning cang a dik lonak kong achim lengmang, Donald Trump nih atimi cu tutan thimnak ah hin vote thatein rel siseh law cu Biden hi ka tei ko lai, WE WILL WIN tiah atu le tu tiin alanghter.

Theihcio bangin US thimnak kongah mipi zong an buai ngaingai, atuhi vote ningcang loin a um an timi tthenkhat ah vote an rel tthan i, cu ahcun Donald Trump nih teinak a hmuh thluahmah tiah an langhter. Tthenkhat state le bang ahcun vote hi minung kut bak in kan rel lai ti tiangin thanhnak an tuah. President hi adodah attuan te lai timi cu ahnu ah phungning tein an langhter te lai.

Vawlei cung thawngzamhnak kip nih tutan Trump le Biden dirhmun hi an chim in an zamh cio hna. Asinain an zamhmi chungah cun Donald Trump asunghnak le Joe Biden nih teinak ahmuh timi deuh lawngte an langhter cio hna. Culak ah atulio an buainak vote an reltthan mi kong zong an langhter hna i, an i lo cio lo. Ahnu bik ah thawngpang fiang cu a um te ko lai. Chirhchan: CB News

Be the first to comment

Leave a Reply

Your email address will not be published.


*