CNA NIH KAWLRALKAP AN TLERH HNA HNU AH AN I THAWN TTHAN

CNA nih Kawl Ralkap an tlerh hna hnu in hnu an i thawn than. Chin National Army/Front (CNA/F) umnak Camp Victoria ah Lungler le Vuangtu ah hrambunh mi Kawl ralkap Kha-la-yah 269 in ralkap 35 cu March 10 zanlei ah an phan i CNF/A nih kan in kah cang hna lai tiah an tlerh hna hnu March 11 chun ah an kir than tiah kan theih. The Chinland Post nih a fiang mi sin in kan theihning ah palek in CDM a lut i a zammi an tlaih mi hna minung 5 renglo an um.

Tlaih a tong mi bia an hal hna tikah CNF Camp ah kal kan i tim tiah an leh hna caah atu bantuk in CNF Camp ah an rat hi a si. Ralkap lei nih tuante in [ a hlan kan ni 5 chung ah] thawng kan in thanh lo mi hna cung ah kan theithiam hram uh. Timh cia lopi in Nay Pyi Taw lei nih palek CDM pawl va dawi hna u an kan ti caah a si tiah CNF/A upa an ti hna.

CNF upa lei nih Mipi cu an i chawk tung ko i mizei an si kan thei hna lo tiah Tio tiva hram i a rami Kawl ralkap cu biaruahnak ah an ti hna. Tio hram i biaruahnak an ngei lio ah khat lei Mizoram lei ah India ralkap zong an um tiah kan theih. CNF lei nih zeihmanh um lo. Va lawi cang uh tiah Kawl ralkap an leh hna tikah Kawl Ralkap lei nih, Nay Pyi Taw lei nawl chuahnak in ratter mi kan si caah kir uh an kan ti hlan chung cu rak kan umter ko uh tiah an nawl hna.

Nain CNA nih kir uh tiah an ti chihmi hna cu Kawl Ralkap lei nih kan bat tuk caah Tlanglo ah zan khat kan riak lai tiah an hal hna i CNA lei nih thaizing tu ah nan kir ding a si ahcun riak ko uh an ti hna tiah kan theih. A thaizing March 11 ah Tlanglo in an chuah hlei lo pin ah Nay Pyi Taw lei nih kir uh an kan ti lo caah Tio lei ah kan ra than lai tiah Kawl ralkap nih an timi cu CNA nih kan nih cu biachim ding kan ngei ti lo kah ding lawng a tang cang tiah an leh hna.

I, meithal zong zun tamlak an puah hnawh hna tiah thawng kan theih. Cu hnu March 11 zanlei sml 2:00 tluk ah Kawl ralkap cu an kir tiah kan theih.CNF nih a ralkap kahnak nawl a pek hna ti thawng an theih caah Tlanglo khuami tampi le Tlangpi khuami cheukhat cu khuapi lei le Tio lei ah an zam tiah kan theih. Credit: The Chinland Post.

Relchih Thawngttha Si. Kawlram ralzam kongah India lei in thanhnak an tuah cang. Kawlralkap ai awh in Falam uktu nih Mizoram Champhai lutlai sin ah Mizoram Champhai ah a ummi Kawlram palek minung pariat a rak zammi hna cu kawlram ah rak kua hna uh tiah cakuat a rak ttial. Asinain India Union Home Minister Amit Shah nih Kawlram ralzam caah thawngpang ttha taktak thanhnak fiang ko in a chim. India Union Home Minister Amit Shah nih a timi cu ralzam hna hi kuat an si lai lo tiah fiang ko in Mizoram Chief Minister Pu Zo Ram Thang sin ah theihternak a tuah cang.

Kawlralkap nih february nikhat ah rampi cu phungning loin uknak an lak ruangah ramchung mipi hna nih kawlralkap hna cu biatak tein hmun kip le kaakip an doh hna.Cutik ah kawlralkap le palek hna nih duhlonak alanghter mi ramchung mipi hna cu biatak tein an kah hna in an tleih hna. Minung tampi nunnak a liam cang. Hi ralkap tuahsernak ruangah palek tthenkhat hna cu CDM ah an lut i, mipi lei ah an ttang hna i, an rian vialte an chuahtak hna. Palek tthenkhat CDM atuahmi hna cu ramchung ah an him ti lo caah an zam hna.

Minung tthenkhat hna cu Thailand ah an zam hna i, minung tthenkhat hna cu India ah an zam hna. Hi a zammi chungah Falam palek uktu nih india ah a zammi palek minung pariat hna cu rak kan kua tthan uh tiah Mizoram Champhai lutlai sin ah cakuat an ttial. Cu kong cu Champhai uktu nih India Home Minister sinah theihter nak an tuah.Sihmanhsehlaw India Home Minister nih Mizoram Cozah Chief Minister sin ah ralzam pawl hna cu kuat tthan an si lai lo tiah theihternak atuah cang tiah Mizoram thawngzamhnak ngan asimi Zonet nih a langhter.

Theihcio bangin Falam uktu ralbawi nih Cakuat arak ttialmi kha aliamcia kan hnu zarh march ni 5 ah khan a rak si.Sihmanhsehlaw tutan ah thawngpang fiang tein India cozah nih kawlram ralzam kongah thawngfiang athanh cang. Tuan deuh ah khan India cozah nih Kawlram ralzam hna hi kan cohlang hna lai lo tiah an rak langhter hnu ah kan Unau a simi Mizoram Lawngtlai zong nih thanhnak an tuahmi an rak letnak kha asi. Atu ahcun mizoram cozah nih kan sikhawh chungin kan in zohkhanh cang hna lai tiah an thanh pin ralzam zong kuat an si lai lo tiah an chim.

Be the first to comment

Leave a Reply

Your email address will not be published.


*