CHIN MI PAKHAT A NUNNAK ALIAM AHCUN KAN NGAITHIAM KHO HNA LAI LO

John Khaw Lian Thawng nih Kalay Towship Pastor pawl sin ah cakuat attialmi asi. Atimi dawtmi Kalay Township pastor pawl, Kan Chinmi pakhat a nunnak aliam sual asi ahcun Kalaymyo i Pastor duhlonak langhtermi ah aitelmi hna kha zeitik hmanh mawhphurtu nan sinak hi atlau kho ti lai lo. Nan mah cungah mawhphurhnak nganpi a um. Kan Chinmi nih cun adonghnak kan phak ah kan pastor pawl ih an kan ngai ringring ttheu.

Politician pawl nih ruahnak pekmi cu mipi zeite an ruat in an ngai duh lo. 88 lio hrawng boruak zong asi lo. A biahram zong ai khat lo timi nan theih ko. Pathian nih nan Turual pawl zohkhanh dingin fimnak an pek hna i, kan caah kan nu le pa ai awh dirhmun an pek hna. Pathian sin ah thlazacam ulaw nan turual pawl kha thatein zohkhanh hna uh, Cucu kan duh lo asi ahcun Kalay Towship ah mipi ngeihsan mi Politician pawl an tampi.Pehzawmawknak rak nei in thu reltlang au. Hihi zangfah kalo dilnak a si ih ka tongkam a mawi lo hmanah Pathian in in ngai dam hramseh! Tlingtein atangah,

Dear Kalay Township Pastor pawl, Kan Chinmi pakhatte a thih pang len Kalay Myo ih Pastor , duhphorhnak ih va tel pawl kha ziangtik hman ah kalo mawhthluknak a reh thei dah lo ding. Nanmah parah mawhphurhnak tumpi a um. Kan Chin cun thutawp kan thlen Cin ah kan Pastor pawl ih an kan ngai ringring theu. Politician pawl ih thurel le ruahnak pekmi cu langtang nei ah Mipi in an ruat men ih an thu an ngai duh nawn lo.

88 lai vek boruak khal a si lo. A thuhram a bangaw lo tikhal nan thei ko losawm. Pathian in nan turual pawl kilhim dingin Fimnak a lo pe ih kan parah kan nu le pa aiawh in dinhmun a lo pe. Pathian hnen ah Thlaza cam aula nan tuurual pawl kha kilhim sawn uh. Cumi kan duh lo ceng a silen Kalay Township ah Mipi ngaihsan mi Politician pawl an tampi ko. Pehzawmawknak rak nei in thu reltlang au. Hihi zangfah kalo dilnak a si ih ka tongkam a mawi lo hmanah Pathian in in ngai dam hramseh! John Thawng. Credit: John Khaw Lian Thawng (FTM)

Tluang Za Thang: Tlawmpal te ka ruahnak ka vun langhter ko lai. Atulio ca ttial cu i muaicawk lo ti zong a fawi ngai ko nain thil sining chim hi ka rian asi ve ko tiah ka ruah caah asi. Atulio Ralkap nih hramhram loin uknak an chuhmi kongah ahohmanh nih kan duh cio bak loh. Ralkap le Palik zong nih methal kahnak in nunnak zong an laak thluahmah kan hmuh tikah kan ngeihchia tuk cio.Atulio thil sining zoh tikah Non Violence Movement in Violence Movement ah a chuak lai tihi ka thin phang ngaingai.

Hakha/Thantlang dirhmun chim ahcun atu tiang cu nunnak le thisen luan tiang a pha rih loh i hnangam deuh asi. Atulio tiang cawlcanghnak dirhmun pin in cawlcangh ahcun Thisen luannak a chuah khawh caah atu cawlcanghnak level tu hi Control tuah khawh i zuam peng ah a ttha.Ralkap Lutlai pawl nih dai tein lamzawhnak, duhlonak langhternak zong an duh ti lo caah ningcang loin tlaihkhih le thongthlaak, meithal kahnak le thisen luannak, nunnak liamnak hi atulio Kawlrawn Khuapi dang ah tampi a chuah bantukin kan Chin Ramkulh ah a can lonak ding cu Mizapi kan rian asi.

Zeicah tiah Non Violence Movement le Civil Disobedience Movement nih cun Thisen chuahnak le nunnak liamnak, buaibainak chuahpi kha ai tinhmi asi lo caah asi. Kan mino hruaitu hna an thi a lin i an thin hannak a sang taktak cang ko nain zei kan ti hnga, daihnak in cawlcanghnak tuah ding hi i tiim peng ko uh tiah nawl kan duh hna. Ramdang ummi kan miphun hawi hna zong nih bawmhnak chawva nan peknak cungah kan i lawm i , daihnak le a nemnak in cawlcanghnak tuah ding lawng hi thazaang pek le chimrel ding asi tiah ka ruah.

Atulio sining kan zoh tikah, lamzawhnak le duhlonak langhternak hi UN le US,EU tibantuk hna nih kan thei hna sehlaw kan zuanhnawh hna seh ti khi i tinhbikmi aai ko caah cucu a tlamtlin khawhnak caah Mipi nunnak liamnak, Upadi an chuahmi buarnak in tlaihkhik le thongtlaaknak te hna hi asi khawh chungin hrial i zuam a hau ko.Hakha/Thantlang nih a zatawk cawlcanghnak langhternak hi a zaa ko tiah ka ruahning asi.

Hriamnam i tlaih in ral tuk caan a phaak tik i nunnak liam le thisen chuahnak phaak cu phundang asi te hnga i atulio caan ahcun fimkhur tein cawlcangh hi a tthabik asi ko rih tiah chim ka duh.CDM atuahmi hna Cozah Rianttuan pawl kha a thawk ahcun dai tein inn ah um ziar ko uh tinak in lamzawh le duhlonak langhternak ah sawm le telter asi pah tikah Ralkap lei nih tlaihkhih i thongthlaak an timh cang hna.(Uniform hruk hrim ahcun Decree san ngai dawh asi.

Upadi cu an kutcung ah a um viar cang cu mu). Cucaah, CDM tuahmi cozah rianttuan pawl zong ralring ngai in um thiam a herh ko. Kan nau le pawl an tlaih hna i zaankhat (24 hrs) thong chung an khumh hna ah zeitlukindah nu le pa, u le nau, mipi kan thin a phan ti cu mithmuh kuttongh asi. Pumpaak a tongmi chungkhar kha lungretheih chinchin asi. Atu cu, zaankhat(24 hrs) ti bantuk lawng asi ti lo kho men.

Cucaah ahcun, atu ah duhlonak langhter le lamzawhnak in kan i tinhmi hi zeitindah mipi himnak in kan kalpi khawh lai tihi hruaitu hna nih biatak tein ruah lo awk a ttha lomi asi.Laimi cu Cozah rianttuan upa zong kan tlawm tuk caah i dirkamh khawhnak zong a har ngaingai i fimkhur deuhin cawlcangh i zuam ko uh tiah ka ruahnak tlawmpal ka vun langhter. Credit: Tluang Za Thang

Be the first to comment

Leave a Reply

Your email address will not be published.


*