BOCHANMI DR. SASA NIH LAWMHNAK BIA HE CA A VUN TTIAL CANG

Kawlralkap Bawizik Min Aung Hlain nih Aa na hmangin uknak a lak caah kawlram kan buai ning vawlei cung ramkip nih an kan thei pi cang. G-7 an ti mi, Ram thawng an ti mi pawl nih kawlram cu heh tiah dantat ding in lam an kawl thluamah cang. Min Aung Hlain nih aa na hmangin uknak a lak hnuah Dr. Sasa kong thei ding a um ti lo, social media ah heh tiah a kong tial a si.

Atu cu amah bak nih facebook hmangin thil sining a vun tial cang. Dr. Sasa nih a tial mi, ” Ka hawikom tha le ka miphun hawi vialte hna, thla fakpi nan ka cam piak caah nan cungah lunglawmnak tampi ka ngei. Atu cu ka him i, tha tein ka damthan cang. Kan mipi nih harnak le buainak an tawn mi a sau ngai cang, mah bantuk thil kan tuar mi hi cu a fak ning cu holh in chim khawhlomi thil bantuk si cang. Mah bantuk muinak hi ceunak nih a vun tei te lai i, mah bantuk thil tha lo hi thil tha nih a vun tei te lai. Atu hi teinak lam kan zul lio’ tiin Dr. Sasa nih a facebook ah a tial. Credit-Dr. Sasa

Apoitukmi Thawngpang:Kawlralkap bawizik Min Aung Hlaing ruangah tuchun ah thil acangmi cu apoituk hringhran ko muu,, zeisualnak ngeilo mipi cungah hibantuk nunnak tiang aliam hi cu Min Aung Hlaing ruang bik ah asi ko tiah vun ti usihlaw zakhat ah sawmkua cu kan palh lai lo dah. Kan theih cio bangin ralkap lutlai Min Aung Hlaing nih February nikhat in uknak rampi nawlngeihnak alak.

Cu Min Aung Hlaing nih uknak alak hnu ah rampi vialte buainak in akhat dih. Chinmi nih bochanmi kan i ngeihmi minung sawmli renglo an tleih hna. Cu lawng siloiin hmunkip kaakip in ralkap khuakhan lairelnak vialte an doh dih hna, tuchun nitiang ah roling in nunnak aliammi hi minung pathum an si cang, cucu oficial in an thanhmi chungin theih asi. Ralkap uknak dohnak ruangah nizan kan naunu nunnak aliam cang.

Culawng siloin, Tutan ah khuaruahhal taktak mi thil a chuak hoi. Tutan thilcang zong hi ralkap uknak alatu Min Aung Hlaing ruangah asi hoi. Tuchun ah nunnak aliammi hi minung pahnih an si tiah thawngzamhnak nih alanghtermi chungin theih asi. Cucu acung kan chimcia bangin ralkap uknak lakmi adohmi hna cungah a cangmi thil asi. Hi konghe pehtlaiin tuchun a cangmi cu atanglei bangin in a si.

Kawlram thilcang cu lung attha hrimhrim lo e, Mandalay ah meithal kahnak a chuak i, minung pahnih an nunnak aliam tiah an langhter. Tuchun ah Kawlram khuapi pahnihnak a simi Mandalay ah kawlralkap nih uknak an lakmi duhlonak a langhtermi hna cu ralkap le palik hna nih tthawl dawi an timh hna caah meithal tiangin an hman i, minung pahnih an nunnak a liam tiah VOA nih alanghter.

Hi konghe pehtlaiin VOA nih video record in tehteh an langhtermi chungin alanghning ah cun meithal in an kahnak fak minung pakhat alu zong fak ngaiin kah hliamnak siseh minung apaw ah meithal in an kahmi le an nunnak aliam colhnak kong an langhter. Hi hliamhma atuarmi konghe pehtlaiin a zohkhanhtu sibawi hna nih an chimmi cu a tanglei bantuk in hin a si.

Sibawi pa nih a chimmi cu alu ah an kahmi cu a thi cang e tiah a chim. Asinain an kahnak kuan hi, meithal kuan taktak maw asi? khairiat kuan dah a si timi cu theih khawh asi rih lo tiah a chim. Sihmanhsehlaw hi meithal kuan in a nunnak aliammi konghe pehtlaiin mit hmutu hna nih an chim mi cu, an kahnak hmun le hma ah hin meithal kuan bak in kahmi a si ko tiah tehteh an langhter ve.

Culawng siloin meithal kahnak ruangah minung pakhat lamzawhtu cu ake zong tan dengin hliam a tuar rih pin ah nu pakhat zong aruh kiak lak in kah hliam a si tiah an langhter tthan. Cun mah nu cu a hliamhma hi voitam ngaiin an tthit rih ti asi tiah a cunglei vun langhter cang bangin VOA thawngzamhnak nih an langhter tthan. Tutan ah hliam a tuarmi hi minung 30 nak tlawmlo an si tiah an langhter chih. Credit: VOA

Be the first to comment

Leave a Reply

Your email address will not be published.


*