BAWIPA VEL HI KAN CAAH A ZA KO. AMEN: F BAWI KHAMH

Donald Trump nih president kum 4 a peh thannak dingah Krifa mi vialte nih Pathian sinah thla an cam cio nain a sung. Nu le nu Pa le pa thitumnak a pomtu le Pathian sermi Fa thahnak a cohlangmi party tanh in Trump a sung ruangah lungawi an um len. Khoi ne nan thlacamnak cu a si ne?, tiah kaa kau ngang in a holhmi an um. Refugee a kan lak lai ti le thleidannak a ngei lo ti lawng an ruat.

Palhnak ngei lomi pawitu a nu nih zalonnak a hmuhnak hnga a pawimi naute an thah kun lai mi hi thleidannak ngeih lo maw a si? Cubantuk in nau thah le vawlei cung nuamhnak Bible nih a lehkhan lomi a pomtu hi Siangpahrang tha an si maw? Si nemmam hlah e. Cubantuk minung cu zeicadah an hlawh a tlin kun? Pathian hi a um lo caah le, a silole zumtu hna thlacamnak hi a dik lo caah maw a si hnga? si fawn hlah e. Pathian bia tlinnak pei a si cu.

Siangpahrang Thalo Kong.Danial 11:21. Siria siangpahrang a hun changtu cu Mithalo a si lai. Siangpahrang siawkah aa tlak lomi a si lai i, asi nain daihnak caan lio ah pennak chungah cun a holhnalnak thawngin aa sawh aa sawh lai i hlennak in uknak kha a laak lai.22 Amah dotu ralkapbu kha a tei thluahmah hna lai i Pathian tlangbawi hmanh kha a hloh lai. 23 Hrawkhrol in Ram dang he tantinak kha a ser duahmah lai i amah a zultu hna kha tlawmte hna hmanhsehlaw amah cu nawl ngaihnak kha a hun ngei lai i daihnak caan lio ah khan fekthup in aa hmung lai a ti.

Hi siangpahrang tha lo siangpahrang i a can khawh hi Bawipa khua khaaning te a si ko. 28 le bangah cun Pathian mi hna an biaknak phung kha hrawh hrimhrim kha aa tim lai a tuah duhmi paoh a tuah ko lai a ti. Kum 2021 in Biden nih uktu le nawlngeitu a siawk ah hram a hun i thawk hi Bawipa nih a dawt ca le uktu siawk ah aa tlak a ti caah a si lo Caan dongh lai nak ca i hmelchunhnak tu a si ko.

Paul nih damnak a hmuhnak hnga caah thla a cam ve ko. Asi nain Bawipa nih a thlamcamnak a let lo i damnak a pe fawn lo. A lehmi cu mah ti hin a si, a ti. 2 Korin 12:9 A ka lehnak cu, “Ka vel hi na caah a za ko, zeicahtiah ka thawnnak cu derthawmnak ah hin a lang,” ti a si. Cucaah cun Kri thawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang, a timi ah hin i lawm ko. Trump caah siseh amah tanh in thla a cam piaktu vialte hna caah siseh Bawipa Pathian vel hi kan caah a za ko.Amen! Credit: F Bawi Khamh

Relchih:Tuuphaw a aihmi, cenghngia bantuk, le Biathlam cauk chung i sahrang bantuk hruaitu pawl. Psychology lei a cawngmi ka si lo nan Donald Trump i a thinlung put le a ziaza, a muisam, a umtu hoiher, mi a chawnhbiak ning pawl ka zohtik ah Kawlram a hrawk dihtu, Than Shwe, North Korea ram cu uknak ttha loin atu tiang a uktu, Kim Jong-un, Philippines ram an president, Rodrigo Roa Duterte, Cambodia ram caan saupi a hruaitu, an prime minister, Hun Sein, le Lybia ram, uktu ttha lo, Muammar al-Gaddafi (athi cang), le Iraq ram a rak uktu, Saddam Hussein (a thi cang ve) hei ti pawl he a khat bakte an si/an i lo bak/unau rual an si hna.

Anmah bantuk uktu ttha lo, ttih a nungmi an tampi rih ko, Africa ram lei zongah. Mah bantuk uktu pawl hi an ram le an miphun caah ttih a nungtuk mi an si hna. An biachim an holhrel a fum pah lai. An mithmai ah nih thlam a leng tuk lai lo. Mihing phun an si lai. Mi zeiah an rel lai lo. Mizei rel lo ngai phun in mi an chawnbia lai. Anmah calawng an ruat lai. Mi zaangfahnak thinlung an nei lai lo. Anmah ca tthatnak asi ahcun zeithil poah tuah an ngamh ko lai. Biaknak lei ah an i biatak fawn lai lo. Anmah duhnak le timhtuahnak lawng in zeithil poah kal seh ti an duh fawn lai.

Anmah chambaunak le santlaih lonak kha biapi in an ruat lai lo. Nawlngeihnak an duh tuk lai. Mi cungcuang an duh tuk fawn lai. Mi ruahnak cheuh zong an i nautat fawn lai. Din lonak tuah an duh fawn lai. Khoimaw caante ahcun a ttha ngaimi le mi bawmh a duh ngaimi an i lawhter caan a um ve lai. Mah bantuk hruaitu phun nihhin fawh midang caah harnak, buainak, thih lonak, sunghnak le hnahnawhnak tampi an chuahpi tawn cu. Mah bantuk hruaitu, minung pawl hi Biathlam cauk chung i sahrang he an i lo hna/an i khat hna.

Mahti cun Harvard University i ca a chimtu, Biakam thar cauk, professor pa zongnih a ti ve. Trump zonghi tuuphaw a aihmi, cenghngia bantuk a si ve.Khrihfa ttha ngai le a fel ngai bantuk in a umter i, Khrihfa pawl vote duh ruah ah, mahcu Khrihfa tampi nih atu tiang an theithiam kho lo. Pathian thimmi le hmanmi ah an ruah sual diam ko. An palh bak ko. Tuukhal, pastor Franklin Graham zongnih Trump i cenghngia bantuk in tuuphaw a aih cu a thei ve lo i hehtiah a dirpi i a ttanpi.

Mifim le khuatuak kho Khrihfa pawl nih Trump i tuuphaw a hruk/a aih cu an theih khawh/an hngalh khawh. Matthai 10:16 chung i a chim bantuk in Biden le a party pawl, le amah a ttanhtu pawl nih cun Trump nih cenghngia bantuk in tuuphaw a aihmi cu kan hngalh khawh, rul bantuk in kan fim ruangah le tthuro bantuk in kan nun a nem ruangah. Trump cu Biathlam cauk chung i sahrang bantuk a si ve ko. Credit Van Tum

Be the first to comment

Leave a Reply

Your email address will not be published.


*