BAWIPA KAN I LAWMTUK. HAKHA AH COVID ZAWTNAK IN MINUNG 62 AN DAM

Hakha sii-inn ah COVID-19 zawtnak in aa thlopbul mi minung 62 an dam, sii-inn in an chuak. Hakha Sii–inn ah COVID-19 zawtnak a ngei i aa thlopbul lio mi minung 62 an dam than i, sii-inn in an chuak cang tiah kan theih. July 16 ni ah minung 41, July 17 ni ah minung 21.HBC Lakhu kan fale minung 7 zong an tum cang. A dam than mi dihlak minung 160 an si cang. Bawipa kan i lawm tuk. SLHL, Secretary, HCMF. THT

ASEAN Skyline - Hakha city in the winter is so lovely -... | Facebook

Cabia dang: Buu le Biakinn Tello Zumhnak:Biakinn ah kan i pumh khawh ti lonak a kum in a si cang; mibu hme tete hmanh in kan i pum ngam ti lo. Caan sau kal rih dawh a si fawn. Hi lio caan ah Baibal chung i Abraham, Isak, le Jakob nih Pathian an rak biakning kha thukpi in mah le pumpak, innchungkhar cio in, chungkhar biakttheng ser in Pathian kan biak a herh ko lai.

Mit in hmuh le tongh khawhmi biakinn hi kan biakmi a si lo cu zapi nih kan hngalh. Moses chan khan Pathian nih puan-thlam biakinn phun in amah an biak i rai an thawi khawhnak ding kha hmuhsak a si; David thinlung ah biakinn thiang sak piak a duh, asinain Solomon chan tu ah saduhthah a tling; Jerusalem Biakinn kha miphun zumhnak ah an hun i funtomnak cu a si taktak ko. A ttha hnem maw ti ahcun a ttha hnem tuk ti khawh a si.

Asinain buu (denominations) le biakinn tel lo in Israel miphun kha Izipt ram ah kum 430 fai an um; Babilon sal an taan kha kum 70 a rau i pumhnak inn timi synagogue ah Pathian an biak; Daniel nih Jerusalem hoih in nikhat ah voi thum lengmang thla a cam; profet Malakhi chan in kan Bawipa Jesuh a rat tiang ah kum 400 leng a rau i cu chung vialte profet biaphuan a um ti lo, muihnak caan a si an ti;

Asinian Baibal hrilhfiah phun a hun chuak kho ngai i an zumhnak hriam a ttha lehlam. Kannih atu lio har kan tonnak ahhin chungkhar pa bik le nu bik cu tlangbawi nan si ve kha philh lo in khrihfa zumhnak kha mah le inn cio te ah cawmchuah (nurture) a herh ko. CACC ah siseh, IBC ah siseh inn chungkhar pumh nan hruainak ah bawmtu hrilhfiah cauk phunphun le thlarau lei thazaang peknak cauk cawk awk kan ngei, IBC nih cauk zeimawzat cu a tthenh zong kan in tthenh khawh hna.

LBC, Yangon zong ah Nifatin Thlarau Rawl timi (Our Daily Bread) cauk pawl cah khawh a si ko lai. Google zong ah cauk rel awk ttha tampi a um ko. Kan zumhnak kha khat le khat hawikomhnak sung kan ngeih khawhnak biakinn ah ngei kho ti hmanh hna hlah u sih, thachia lo in chungkhar biakttheng sernak in kan zumhnak a tthan kan cawm cio hna lai. Aizawl ah Baptist nih an chuahmi cauk “Chungkhar Maicam” timi cawk khawh a si fawn, ni 366 ca in ttialmi cauk a si i chungkhar pumhnak kuttlaih caah a ttha hnem ngaingai. Kan thiamning cio le a lamkip in kan zumhnak cu veng cio ko hna usih. Credit: Rev. Dr. Lalpeklian

Be the first to comment

Leave a Reply

Your email address will not be published.


*