Australia Ah Myanmar In Sianginn A Kaimi Hna Cu Ralhrang Cozah Nih CDM Ah I Tel Lo Dingin A Hro Hna! Australia ahhin Myanmar in sianginn a kaimi siangngakchia tampi an um i cu chungah cozah riantuan a simi, cozah bawmhnak in a kaimi zong an tampi. Cu cozah bawmhnak in Australia ah sianginn a kaimi hna cu ralhrang cozah nih CDM ah i tel lo dingin hronak ca a kuat hna tiah theih a si.
Cu cakuat cu Australia hrambunh ABC News sinah a phan i cuticun ABC News nih Myanmar siangngakchia pahnih cu biahalnak an tuah hna. Ralhrang cozah cakuat ah cun nawl na ngaih lo i CDM ah nan tel ahcun fak piin dantat nan si lai tiah an tial. Midang zong i tel dingin sawm hlah u, an ti fawn hna. CDM ah kan i tel lai lo timi biakamnak cu a tlai bik July 7 ah kuat ding ti a si.
Biakamnak tuah cu an duh lo tuk, asinain an tuah lo ahcun Myanmar ah a ummi an chungkhar nih an tuar sual lai ti an phang fawn. Cozah bawmhnak in Australia ah sianginn a kaimi hna cu lungrethei le thinphang in an um ko.Australia cozah nih ralhrang cozah cungah a cawlcangh ning a nem tuk, fak piin dantat phihkharnak tuah seh tiah Australia hlutdaw le Myanmar siangngakchia hna nih biatak tein an forh peng.TCP
Thawngpang dang Good News: Ralkap siibawi Bogyi Min Maung Maung cu a rian chuahtak in mipi lei ah a dir cang. Atu cu ramri a himnak hmun ah a phan cang. Ralhrang nih mipi cungah an tuahmi thatlonak vialte siseh, an tlaihmi hna mah saram bantukin an hrem hnanak vialte a hmuh tikah dinnak a tanhmi mipi lei ah dir lo awk a tha lo tiah aa fiang.
Siibawi (Surgical Specialist) Bogyi Min Maung Maung nih cun ralhrang ahhin phu 3 in an um. Phu khat cu MAH lei ah lungthin dihlak in a tangmi an si. Phu khat ve cu ralhrang uknak duh loin mipi lei ah tan/dir a duhmi an si. Phu khat cu teinak a hmumi lei poah dir aa timmi an si tiah a chim. Ral hmun ahhin meithal kah thiam lawng a za lo, engineer le sii lei a thiammi zong an biapi tuk. Cucaah atu bantukin ral hmun i siibawi a simi Bogyi Min Maung Maung nih mipi leiah a dirmi cu thawngpang tha taktak a si. TCP
Leave a Reply