APOI KO CANG, KAN CHUNGKHAR KHAT CHIM CIO USIH,RALRING AHAU CANG

Thailand ummi vialte caah iralring taktak ahau cang. Thailand ah Kawlram mi minung pasarih hna cu Lam kam ah an chiahtaa hna ti asi. Thailand ngasa zuarnak market ah Kawlram rianttuantu chungah zawtnak angeimi an um hnu in kawlram mi caah dirhmun attha lo ngaingai cang. Tutan zongah minung pasarih hna cu lam kam ah an chiahta hna tiah an langhter.

Thailand hmun laili asimi Samut Sakhong province, Maha Chai khuapi ngasa or ngaikuang zuarnak hmun ah kawlram mi rianttuantu chungah zawtnak angeimi an um tiah thawng an rak thanh. Cu an thanhnak arauh hlan ah Kawlram minung pasarih hna cu atubantukin lamkam ah an chiahta hna asi tiah an chim. Kawlram mi 7 an chiahta mi hna hi Chonbur provice timi ah asi tiah tuchun ah ACC Spokesman Ko Ye Min nih a chim.

Hi konghe pehtlaiin bawmhchanhnak atuahtu acunglei upa nih a chimning ahcun tuzing ah khan permit angeilomi le document zong angei lomi Kawlram mi hna cu Van motor in an rak phurh hna i, Chon Buri province ah an chiahta hna tiah a chim. Tutan hi avoikhatnak zong asi tilo, a voihnihnak thil acangmi asi cang tiah a chim chih. Cun tutan ah kawlram minung sarih hna cu thatein chiah an si cang.

An ngandamnak attha maw ttha lo timi zong zoh an si tiah police lutlai nih a chim. Thailand cozah nih thanhnak arak tuah mi cu zawtnak a um lio ah ramdang mi permit angei lomi rianttuantu hna cu tleih an si lai lo tiah an rak chim. Asinain caan sau arauh hlan ah atubantuk in Kawlram minung hna cu lampi ah an chiahta hna hi asi, Police nih an timi cu ramdang minung kan tlai hna lo. Cucaah ttihphan ruangah tlikzam zong ahau lo, umnak hmun te ah um peng ding tiah an chim.

Biapeh, Hi konghe pehtlaiin tuan deuh ah Kawlram mi huatnak bia le hla hi social media ah a chuak ngaingai, Tthenkhat le bang nih cun kawlram minung cu hmuhnak paoh ah kahthah ding tiah atimi zong an rak um. Kawlram mi huatnak konglam vialte hna cu nawlngeitu hna nih an delete ter dih hna ti asi. Thailand aummi hna nih iralring tein um cio hna usih.

Thawngpang Dang:Donald Trump hnawmtaam vialte ka thianh dih lai tiah Joe Biden nih a chim pin ah fak ngai in amawhchiat rih hna. President elect Joe Biden nih Donald Trump cozah hruainak tangah aummi Defence Department, office of management and Budget hna cu fak ngaiin athuat hna. Ram ven himnak kongah ttuanpi hawi transitional team cungah lamphittu an si tiah achim. Cun US Foreign policy konghe pehtlaiin Joe Biden nih a chim tthan rih mi cu Donald Trump nih amah pumpak ruahnak in akalpi mi hi attha lo taktak mi asi. Donald Trump nih ahnokter mi vialte cu thianh dih ka timh tiah a chim.

Donald Trump hruainak tangah rampi kilvengtu agency hna chungmuru ah chiatnak taktak a chuak tiah president elect Joe Biden nih apeh chap rih.Hi konghe pehtlaiin Acting Defence Secretary Christopher Miller nih lehnak atuahmi cu zarh thum chungah official 400 hna cu interview voi 164 tuah cang an si i, document tlap 5000 tluk chah kan theihter cang hna. Hihi Joe Biden transition team nawlnak nakin atam deuh tuk. Transition team hi kan ttuanpi peng ko lai, theih an duhmi paoh lehnak kan tuah peng hna lai tiah a chim.

Tutan ah Joe Biden nih hibia achimnak hi Kamala Harris le attuanpi hawi hna he Wilmington, Delaware ah virtual meeting an ngeih lio ah a chimmi asi. Hi konghe pehtlaiin Donald Trump cu attuanchung ah America ram ttuanpi hawi NATO asoisel lengmang, Paris Agreement on Climate Change, Iran nuclear deal siseh WHO hna cu a chuah tak hna. Biden nih atimi cu kan ram hi dirhtthan ahau i, sersiam tthan aharh, Foreign policy le national security hna cu kan remh tthan dih lai tiah a chim.

Be the first to comment

Leave a Reply

Your email address will not be published.


*