AMAK KHOTUK. BAWIPA PATHIAN HI KHUARUAHHAR TAKTAK PATHIAN ASI

Bawipa Pathian Hi Khuaruahhar Taktak Pathian Asi. PATHIAN nih Paletwa ralzam har tongmi hna ca ah rian a ka fial bang in mitthli he lung lawm te in ttuan kaa tim. Ka ca rianttuan ah sawm ve hna law a duh takmi nih in bawm hna seh tiah zahan zan ah a ka chimh. An in bomh lo zongah KEIMAH nih kan ttuanpi lai i na tlaamtlinh ko lai tiah a ka chimh chih fawn.

PATHIAN nih bia a ka chimh ti hi ka chim ngam lo. Cu cu a tu har tongmi hna ca ah rua tung le danih ngaidii hmang lo in thing tung le canphio cih in inn na sak piak hna lai, a ka daw mi nih in bawm hna seh a ka ti mi a si. Ngeih lo bu in thing tung le canphio cih in inn 18 sak cu a fawi bak lo. Ka ngeihlah nawn kha BAWIPA nih a theih i phanghlah bawmtu kan thlah ko lai tiah a ka ti chih.

Ni hin cu an inn tthial ah kan kal tthan. Ruatung le danih dii in cih kan timh lio ah BAWIPA nih minung a van thlah taktak hna i ka ning a zak tuk i mitthli he thla tu ka cam. BAWIPA nih canphio inn in inn hnih sak ding ttuanvo lak ding in a van thlah mihna an si i tangka ting 10 ( 1000000 MK ) an van Kan peek taktak. BAWIPA hi khuaruah har PATHIAN taktak a si. Bomh le tel a duh vemi inn khat saknaak ah ting 7 ( 700000 MK ) in i tel khawh a si. BAWIPA nih thluachuahnaak in pee ko hna seh. Credit: JP Biak Tin Sang.

Thawngpang Dang Relchih:Thantlang sii-inn quarantine a chuah thaizing ah a thimi Pi Biak Sung cu siibawipi Dr. Tun Pwar nih a thlop duh lo tiin chungkhar an lung a fak. Thantlang sii-inn ah i thlop dingin Mizoram Thekte khua in an ratpi mi Pi Biak Sung, kum 70 cu quarantine a luhnak in a chuah a thaizing December 15 chun ah a thi. I, quarantine a um lio ah siibawipi Dr. Tun Pwar nih a thlop duh lo tiin chungkhar an lung a fak.Hi kongah Pi Biak Sung i chungkhat Thantlang um Pi Khual Dim nih “Kan Pi hi a lung le a kal le a thluak lei dam lo in a zual ngai.

Mizoram COVID rai ruang ah Aizawl lei ah kalpi awk a that lo ca ah Thantlang sii-inn ah an van ratpi. Lampi zong ah keimah nih ka va don i thi in a luak. Ramdang mi an si ti in quarantine ah chiah a si. Cutluk i mizaw a si ko mi cu quarantine ni hleili a um chung ah siibawipi Dr. Tun Pwar nih a thlop duh lo, i a zoh lo. Cucaah a chuah thaizing ah Dr. Hmuh Thang sin ah kan kalpi i thlop manh lo in a kan liamtak. Dr. Tun Pwar nih hin kan pi quarantine a um lio ah hin a thlop awk a si. A thlop duh lo mi cung ah kan lung a faktuk, ngaihthiam a kan hal lo ahcun aa tlak ning in taza ka cuai lai,” tiah The Hakha Times ah a chim.

Pi Khual Dim nih a chim ning ah cun, Quarantine a luhka ah a thi le a zun an check mi lawng a si. Sibawipi Dr. Tun Pwar nih a zoh lo. Quarantine a chuah lai zan thum chung lebang cu a it kho lo.Lian Lian pa sin kan phanh pi a thih ah Lian Lian pa zong nih ‘A thi baan in pei nan van ratpi cu’ a ka ti,” tiah a chimchap. Hi kong ah Thantlang Sii-inn siibawipi Dr. Tun Pwar The Hakha Times nih a hal i a lehnak ah “Amah hi Thantlang sii-inn ah hin i thlop ding in a ra mi zong a si lo. Ramdangmi an si i, voi hnih tiang kan cah hna. Nan rat lo ahcun taza kan in cuai hna lai tiah kan ti hnu ah an ra i quarantine ah kan chiah mi hna an si.

Sii thlop ah a ra lo i thlop awk an tha lo,” tiah The Hakha Times ah a chim.Pi Biak Sung quarantine a um chung ah na zoh maw? tiah The Hakha Times nih hal mi a lehnak ah “Keimah nih a tlawmbik voi hnih ka zoh. Hihi Thantlang COVID Committee nih a phung ning in kan tawlrel mi a si. COVID Committee ah hin khuami upa zong an i tel ko. An chuah hnu ah sii hi thleng in sii dang zong ding sehlaw hngalh a si lo.Hi bantuk lungzawtnak cu zeitik caan poh ah ruah lopi in thih khawh a si,” tiah The Hakha Times ah a chim. Sibawi dang nih an zoh maw ti mi kong ah Pi Khual Dim nih “Dr. Ly Ly nih ‘Voi hnih ka va zoh. Rian hi sii-inn mizaw le quarantaine lei ti in kan i then hna’ a ka ti,” tiah a chim. Hi kong ah Dr. Van Lian Hum nih “Hi kong he pehtlai cun kei cu ka theih mi a um lo. Siibawipi Dr. Tun Pwar nih a theih lai, amah hal ulaw a tha,” tiah The Hakha Times ah a chim.

Chungkhar lei in Pi Khual Dim nih “Ramdang in mizaw zual lampi hmanh ah thi in a luak mi kha ni 14 chung quarantine ah thlopbul lo in an chiah i quarantine chuah a za ti in an chuah mi hi cu, kan lung a faktuk. Dr. Tun Pwar hi kanmah chung lawng si lo in Lai miphun an kan neek hrimhrim bia a si. A rian cung ah a mawhbak. Ngaihthiam a kan hal lo ahcun taza ka cuai hrimhrim lai,” tiah The Hakha Times ah a chim. Pi Biak Sung ruak hi Mizoram an khua Thekte ah an tlunpi i December 15 zan ah Zaangtlang khua in Tio tan in an khua leiah Zaangtlang khuami nih an kalpi. Credit: The Hakha Times

Be the first to comment

Leave a Reply

Your email address will not be published.


*