KHUARUAHHAR TAKTAK THING AN TANNAK AH JESUH AN HMUH

Khuaruahhar ngaingai cu asi ko. Thing an tannak ah Jesuh thlapahle, Jesuh muicuang mi a lang. Aliam ciami zarh cawn ningani ah khan Itaquirai, Brazil Mato Grosso do Sul timi ah Municipal Maintenance Worker hna nih Willow timi thing cu Chingsaw (Chainsaw) in an tan.

Cu an thingtan mi ahcun Jesuh muisam kengmi thla pahle a cuang tiah an chim. Hi thawngpang hi atu Brazil ram ahcun alar ngaingai ti asi.Hi konghe pehtlaiin thawngzamhnak nih an langhterning ahcun Odimar Souza nih thing an tanmi cu inn ah a lawipi i, hman a thlak hnu ah mipi ah alanghter ti asi.

Thing an tan cuahmah lio a cheu hrawnghrang an tan ahhin Palep bantuk in alang ti a si. An vun tan khawh hnu ah cun Jesuh mui sam ken bantuk in alang tiah an chim. Hi thil social media ah langhter a si hnu ah minung tampi hna nih cun Jesuh rat tthannak dingah hmelchunhnak asi tiah an chim.

Nan sualnak vialte mertak cang uh Jesuh ratnak caan anai cang tiah a chimmi zong an um. Culawng siloin Coronavirus zawtnak kan ton cuahmah lio caan ah Jesuh nih aa kan zohpeng ko timi alang tiah an chim. Asinain hi konghe pehtlaiin minung thenkhat hna nih cun an zumh lonak an langhter ve ti asi.

Hi thil a cangmi he pehtlaiin thil a cannak hmun Itaquirai kulh chungah a umi Catholic hruaitu pawl hna nih cun zeibia hmanh an chimmi a um lo. Nain Biologist pakhat a simi Fabiano Izidoro nih a timi cu hi thing hi a fat lio ah hliamhma a tuar asi loah Chemical thil ruang zongah a si khomi a si i cubantuk asi ahcun atubang in hnawmtam aa sermi mi zong asi kho tiah a chim ve.

Hi konghi na zumh le zumh lo cu nangmah nawl bak a si ko. Minung tampi an zumhmi asi i, minung tampi nih an zum ve hlei lo. Asinain thawngzamhnak nih alanghter mi a si ko caah kan vun langhter ve. Chimcia bangin khuaruahhar pakhat thil asi caah zumh le zumh lo cu mah pumpak cungah aa hngat. Ref: G1 GLOBO