ZEITLUK HMANH IN BUAI SEH A TLING THIAMTHIAM KO LAI

US Thimnak hi abuaituk cu asi lo, Zeiti paoh in buai hmanhsehlaw Joe Biden hi atling thiamthiam ko lai. Tutan US buainak cu kumdang nain mipi thinlung ah avun buai ngaingai. Zapi nih kan dirpi mi Donald Trump zong adirhmun attha lo, Trump thatnak thawngpang vun langhter tikah amah adirkamhtu hna nih cun fak ngaiin aa kan soisel tawn.

Asinain President a si lai tiah ruahmi Joe Biden cu lawmhnak bia vawlei cung hruaitu tampi hna an chimh cang. Cu kong thanhnak le langhter zong aka huami tampi an um ti ka theih. Tutan thimnak aidannak aruang bik cu kan dirpi mi Donald Trump athianghlim ngai ah kan ruah i, Joe Biden lei hna cu Setan phoih pawl, nu le nu pa le pa adirpi mi hna cu tiah aphunphun bia chim asi.

Kanmah Chinmi hna nih biaknak hoih in US thimnak kan cuanh lio ah midang nih cun ramkheel mit in a cuanmi tampi hna nih cun Conservative le Liberalist hna i hruainak asi tiah an chim, Remnak le daihnak aduhmi hna le tukdohnak chuah zong apoi ah a chia lomi pawl hna an i zuamcawhnak asi tiah an ti. Ruahning atam, pom ning atam an ti bangin Muslim pawl nih cun anmah dirkamhtu le dirkamh lotu thimnak,

Ramdang kip in mipem hna caah cun anmah zalonnak a duhmi hna le akhamtu thimnak tiah an ti ko lai. Vawlei cung chawleh chawhrawlnak atuahmi hna zong nih an lam aphittu le akauhtertu thimnak tiah an ti ve ko lai. Asinain Joe Biden le aparty hna nih khuakhan lairelnak la hmanh hna sehlaw, aliamcia caan i atuahmi party thiamthiam kha an si ko lai.

US Party pahnih hna nih hin Foreign Policy le Economic scheme kalpi dingah phunglam attha taktak mi an ngei veve. Anmah le duh paoh in cawlcangh angah lonak dingah phunghrampi a um ko. Party pahnih hna hi an duhmi lam an zawh zongah US rampi hi vawlei cungah atthawngmi le i hruaining atthatuk mi a si i, Pathian tthawnnak aa bochanmi an si ko.

Thimnak ah tawlreltu Election Agency hna hi ramkheel lei ah pehtlaihnak angei lomi bak an si hna. Zawtnak ruangah cutin in vote peknak a um i, hi nih hin vote rel caan hi asauter hrimhrim mi asi. Hi hna pawl hi, thimnak nicaan ah a um lomi ralkap le ca cawngmi hna caah tuahpiak mi an si tiah an chim. Vote thlak ning hi thatein chinchiah dih an si hna i, ca in thatein an chiah dih.

Aharh asi ahcun Electoral college MP or Congress man hna nih President an thim hlan ah hin an relta dih lai. Hi thil hi tuanliopin an rak tuah cangmi asi. Palh sualmi maw asiloah pakhatkhat thil aum tikah sersiamnak caah timi asi. Atu ah hin result aa thlau lomi, tlawmpal in teinak a um zongah vote kip hi thatein an chinchiah dih i, cucu thatein ca in an chiah. Cucu aharh ahcun zohtthan dingmi asi.

Thimnak a himnak dingah hin abiapi taktak cu, thimnak tuah hlan ah thatein an zoh hmasa i, state kip nih vote an thlaknak thilri attha bak tihi dottletnak an tuah dih hnu ah an cohlangmi asi. Donald Trump lei nih complaint an tuahmi hi zeihmanh tehte an hmuhmi a um rih lo. Thimnak kongah hin state le Federal Supreme court ah thatein caihkhan tawn asi i, atu tiangah tehte fiang aum lo caah case zong cohlan lo asi.Thimnak kongah a cang lomi thil acang tiah zumh atlak lomi le biadik asi lomi biatak bantuk in an chimmi hi a um tawn ko. Cucaah US thimnak hi a him ko i, thimnak abuaipi mi hna hi zumh an thlak tuk ko. Credit: Tluanga CC

Be the first to comment

Leave a Reply

Your email address will not be published.


*