ZASANG CINZAH: VAKOK LE AWTAW KONG ABUAIMI CAAH KA VUN THAI

US nih National Symbol ah Mupi/eagle an hman. Chin miphun nih kan National Symbol ah Vakok kan hman ve. US ah Political Party ngan pahnih an um i Republican Party nih Vui/elephant an hman i, Democratic nih Donkey/laa an hman ve. Tulio hi Vui Party nih US/Eagle an aiawh tinak a si.

US ah Vui Party (Republican) nih US Ram/Mupi an aiawh bantuk in Chin State ah Awtaw Party(NLD) nih Chin Ram/ Vakok an aiawh lio a si ve. Cucaah, Political Parties nihcun, an duhmi Symbol le logo paoh an hman khawh. Chin State ah Palitical Parties tampi an um cio i, an logo ah an duhmi cio an hman ko. Tilim sia le Vakok a hmanhmi CNLD hi, an logo ah Vakok an hman ruang ah Chin / Vakok an aiawh khun tinak a si lo.

An Parties le a chung ah hruaitu hna hi, Chin mizapi nih an zumh hna ahcun, Chin Ram/ Vakok aiawhtu ah an thim hna caan a phan ve te lai. Vawilei cung Sovereignty State umtuning mit in zoh ahcun, NLD/USDP tbk Union Pi a huapmi Party hi National Party an si i, State le region te lawng a huapmi Party paoh hi “Regional Party” tiah auh le hngalh an si. Political Party paoh hi, a min a biapi lo. A logo/Symbol zong a biapi lo. A dirhtu le a chung ah a ummi hruaitu hi biapi an si.

Hruaitu an biapit nak cu: Chin miphun chung in Chinmi hremtu/hrawhtu dictator an chuak kho i, Chin miphun chung in hruaitu lila hi Chin Ram hrawktu an si kho ve ko. Vawlei cung tuanbia ah Dictators tampi hna khi, anmah miphun lila cung ah ningcanglo uktu an si. Cucaah Political Party cu, a min le a symbol a biapi lo. A chung ah a ummi hruaitu upa hna khi biapi an si.

Cucaah, NLD an si ah an symbol awtaw a biapi lo. Ahodah hruaitu a si i, a chung ah MP a tling hnga dingmi upa pawl hi biapi in zoh an herh. Cun, CNLD zong hi an symbol Vakok a biapi lo. A chung ah hruaitu le MP a tling hnga dingmi upa khi biapi an si ve. Zeibantuk Party ahdah hruaitu ttha an um? A dingmi an um? An minung hi zumh awk an tlak maw? tbk hi biapi in zoh ding an si deuh. Note: Awtaw le Vakok tbk Symbol ah a buaimi “lukmalak” caah ka von thai ta. Credit: Zasang Cinzah

Be the first to comment

Leave a Reply

Your email address will not be published.


*