VAN CEU UK KHENGLAWT: HNANGAM DEUH SI CANG

Hnangam Deuh Si Cang: Zahan January 6 i Vawleicung Democracy ram vialte i pa bik ah ruahmi US cozah innpi (Capitol) chung tiang i hnahnawhnak (Choas) an chuahter hi cu a poi hringhran ko. Hmai a hngal lo taktak. Iran, North Korea le Kawlram te pawl hmanh nih an van nehsawh len ding ruah ah ka celh lo. A poi ko ti hlei chim ding um lo.

Sinain, US cu phunghram fek tuk le hruaitu ṭha tamtuk umnak ram si hraat kaw mob rule le tharuum hmang (violent) in kum 200 renglo a nung cangmi democracy uknak an teiter khawh lo zia an langhter khawh ṭhan i hna a ngam i thawpi a chuak. US cingcing a si ko. US ram hruaitu (lawmakers) pawl hi suimilam 6 hnu ah Congress innpi ah an lut ṭhan i zanṭim le khuamang tiang biaceihnak (debate) hi an ngei ṭhan.

Bia an i al dih hnu le vote pekmi a zoh dih hnu ah US president ding ah Electroral College nih vote sin pekmi cu an fehter (certified) i Vice President Mike Pence nih Joe Biden le Kamala Harris hi US rammi le Electroral college nih an thimmi cu a si tiah a phuan. Congress nih Electroral college vote an fehter (certified) khawh in President Trump zong nih a lungsi lo ngai bu’in,

US president nawl ngeihnak (power) i peknak ding hi a sining dingte in ka tuahpi ko hna lai tiah a chim ve cang i buainak dang a um hraw ti lai lo tiah zumh a si. (Foxnews: Trump recommits to transfer of power as Congress certified Biden’s Win). Cucaah, hnangam deuh a si ka hei ti ko. A dong taktak cang. Credit: Vanceuuk Khenglawt

Relchih:US President Caah Congress nih Joe Biden cu cohlannak atuah cang. US Senate le House fonhkomh Congress meeting nih Joe Biden cu US President caah cohlannak an tuah cang. Nizan ah Donald Trump adirkamh tu hna nih Congress khuakhan lairelnak cu buainak an chuahter i, caan zeimawzat an ngolter hna. Asinain pehzulhnak an tuah hnu ah atu bantuk in Joe Biden cu cohlan asi cang.

Congress nih cohlannak Joe Biden an tuah hnu caan tlawmpal ah Donald Trump nih atimi cu a ralaimi January ni 20 ah tlamtling te le tluangtlam tein pekchanhnak tuah ka duh ko tiah a chim colh ve. Tutan ah Joe Biden cu president ca dingah fehternak an tuahmi ah Congress i, House le Senate palai hna nih Trump dirkamhtu Republican tthenkhat hna nih Joe Biden tlinnak Arizona le Pennsylvania i, electoral vote pawl thumhthlak an timhmi cu cohlan asi lo.

Cu hnu atubantuk in Congress nih Joe Biden cu thimnak ah a tling tiah cohlannak an tuah hi asi. Tutan vote thlaknak kongah hin State pahnih i, electoral vote tthumhthlak dingah Republican minung zakhat hna nih vote an thlak ko nain Democrats minung zahnih nih vote an thlak tikah teinak ding lam a um ti lo caah atubang in Joe Biden cu teinak ahmumi asi tiah an thanh.

Biatak tein ceihkhannak or khuakhan lairelnak biapi caan zeimawzat an tuah in an ngeih hnu ah Joe Biden cu US president caah cohlannak an tuah hi asi i, fehternak an tuahnak hi asi. Tutan ah thimtlin mi Joe Biden le Vice President asi dingmi Kalama Harris hna nih Electoral vote 306 an hmuh i, Trump nih vote 233 a hmuh. Electoral vote hmuh ning vun tuak tikah Joe Biden hi atlingica mi asi.

Be the first to comment

Leave a Reply

Your email address will not be published.


*