TUTIANG KAN FARNU SUI HLEI TIAL BULHNAK ACHUAK MI ZAT

Chinmi dawtnak kan rak ngeihning hi cu asunglawi tuk hringhran. Tutan ah kan tonmi kan farnu Sui Hlei Tial kongcu khuaza ramkip a ummi Chinmi vialte lungfak in kan um cio hna. Hi konghe pehtlaiin kan farnu Sui Hlei Tial bulhnak caah tiah ramkip Chinmi hna nih kut samh cio asi. Bulhnak hi tutiang a chuakmi vun zoh tikah ruahnak lengin bulh nak a chuak.

Kan naunu Sui Hlei Tial bulhnak caah tiah khuakhang laireltu hna hi minung pathum an si hna. Cu pathum hna cu US um Falam Christian Church of Indianapolis an pastor Dr Hre Mang le, Chin Broadcasting Network, Cun The Chinland Post hna hi an si. Atu hi cabia kan ttial tiangah bawmhnak tangka a chuakmi hna cu atanglei bantuk hi asi.

Dr Hre Mang nih Sui Hlei Tial bulhnak atuahmi a chuakmi hi dollar in thong 16 a tling deng cang. India cun atutiang bulhnak a chuak mi hi Rs. 1,116,031 asi. Kawlram tangka in vun tuak ahcun ting 200 renglo khi a si. Atang ah hmanthlak in kan vun langhter chih mi hi a si.

Cun Chin Broadcasting Network nih Sui Hlei Tial bulhnak atuahmi ah atutiang a chuak mi hi dollar in thonghnih zathum sawmrukkua 2369 asi. Hi tangka hi india tangka in kan thlen a si ahcun tingkhat le thong sawmruk renglo khi asi. Kawlram tangka in vun thlen tthan ahcun ting 30 renglo a si cang. Atangah hmanthlak in kan vun langhter mi hi asi.

Culawng siloin The Chinland Post nih Sui Hlei Tial bulhnak atuahmi ah a tutiang a chuak mi hi dollar in thongkua zasarih sawmriat pariat, $ 9788 a si. Hi tangka hi india tangka in kan thlen asi ahcun tingruk le thongsawmkua renglo asi. Hihi kawlram tangka in vun tuak a si ahcun ting 125 renglo a si. Atangah hmanthlak in kan vun langhter chih.

Adihlak in vuntuak tikah kawlram tangka in ting 350 renglo asi cang. Cun bulhnak hi pumpak tete zongin a pemi tampi an um cang hna i, a buu zongin apemi an um hna tiah theih asi. Acunglei kan vun langhtermi tangka thlen rate vun langhter mi hi abuak tlak in tuahmi asi. Atlawm lei in tuahmi asi.

Kan farnu Sui Hlei Tial, kum 21 cu aliamcia September 29 zaan ah a umnak Malaysia, Sungai Buloh khua ah inn dot 9 cungin a tla sual i a nunnak liam. A chungkhar umnak Thantlang khua ah alu phum dinngin Malaysia um chungkhat le Myanmar Tanzung tawlrelnak in a ruak cu October 3 ah Myanmar ah an kuat.

October 4 zaanlei 4:30pm ah Thantlang khua cu an phakpi nain Thantlang COVID-19 Committee nih khua luh lai Laipawng Lung ah a kham hna i khua chung luhpi a sian hna lo. Khua chung luhpi loin khua helnak lam in kan kalpi lai i hawi vuinak thlanmual ah kan vui lai an ti zongah a sian hna lo. khua luh lai lamkam ah khor a cawh i a phumter hna.

Mah ruangah vawleipumpi um Chinmi vialte kan lung a fak dih. Kan lungfahnak kan langhter ciomi an theih hnu October 7 dei hlan 12:20am ah an chuahter áš­han hna i thlanmual ah an vuiter hna.Hitin Lai nunphung a serhsat i limhang ngei lo le saram nak niam deuh in a kan tuahtu Thantlang COVID-19 Committee hi Kawl lawngte an si, Laimi an i tel lo.

Be the first to comment

Leave a Reply

Your email address will not be published.


*