TUTAN THIMNAK AH ATLAK BAK MI HNA AN KONGLAM TAWI

2020 Thimnak Ah MP Ah Thimtlak Mi Hna 4: Atu tan cu 2020 thimnak ah MP ah thimtlak an si ko nain an dirhmun aa laklawh ngaimi hna kong kan rak langhter. Hleikhatnak. Pu Zo Bawi. Chin ramkulh NLD party hotu a si. NLD ah ralkap uk chan lio tein a rak cawlcang pengmi a si. 2015 thimnak ah NLD nih teinak a hmuh tikah Chin ramkulh Chief Minister a si lai tiah rak zumh ngaimi a si.

A ruang cu NLD ramkulh hotu tam deuh cu Chief Minister rian an pek cio hna caah. Asinain Pu Pu Zo Bawi cu Hluttaw hotu sinak tu an rak pek diam. CM an pek lonak a ruang pakhat a si kho mi kong zong U Win Htein nih a ttial. 2020 tal ah NLD nih teinak an hmuh tthan i, amah zong nih Chin ramkulh thimnak ah teinak a hmuh tthan ahcun CM sinak caan ttha a um te ttheo lai tiah rak ruah pah a si nain, kum 5 chung ah thil tampi aa thleng.

Chin ramkulh NLD hotu a si caah le Hluttaw hotu a si caah, NLD mawhchiatnak tam deuh cu amah sinah tlunter a si. Hruaitu si cang ah cun amah sinah an tluntermi zong cu an mawh ruam lo ti ding te khi a si nain, Cozah a tlaitu hna mawhchiatnak zong amah cungah tlunter a si.Amah zong nih biachim aa ralrin tawn ve lo tikah, Chin ramkulh NLD cozah tlamtlinlonak a chim tawnmi kha, NLD thangchiatnak lawng si lo in amah thangchiatnak zong ah a cang tthan tawn.

Chin ramkulh NLD cozah a tlaimi hna nih eihmuar an hmannak kong an chim tikah Pu Zo Bawi chimmi hna kha chirhchan ah an lak tawn i, amah lila zong kha a hnu ah eihmuar an puh pah tawnmi dirhmun bantuk a lo mi ah a hnu ah a cang tawn mi a lo. Surcheh thiam lo mah lukhuh ti hna a lo pah.

2020 thimnak ah Hakha peng NLD EC nih Chin ramkulh palai caah an thim nain NLD cunglei upa hna nih Hakha peng aiawh Pyituh Hluttaw hmunhma ca tu ah an thim diam tikah, ruah lo dingmi thil hna ruah cio ding ah minung tampi thinlung chungah a chuahter.2020 thimnak ah Pyituh Hluttaw hmunhma ah teinak hmu sehlaw, Chin ramkulh NLD hotu dirhmun in Pyituh Hluttaw ah bia a chim ding a si lai tikah, zeidah a dirhmun a si te lai timi kong ah a laklawh ngai mi a lo.

A nun kum tampi ramkhel lei ah a rak i pe cangmi le Hakha khualipi tthanchonak ah saduhthah a rak ngei peng mi a si caah, Hakha peng aiawh in MP ah thimtlak tuk a si rih. 2020 thimnak bel ahcun a dirhmun aa laklawh ngaimi a lo. Cu zong cu cattialtu hmuhnak sawhsawh a si.

Hleihnihnak. Chin Chin Pekthang: 2020 Chin ramkulh thimnak ah a lutmi nu hna ah cun nusal ttha taktak a si. MP ah thim tlak taktak zong a si.A rianttuannak pawl zoh tikah Chin ramkulh MP ah si lo in Kawlram huap Pyituh Hluttaw le Amyotha Hluttaw caah sisehlaw aa tlak chinchin ding mi a lo.Hakha-Thantlang le Falam peng upa hna nih an theih dih pah ngawtmi Vanzaang khuami Pu Pek Thang fanu a si.

Asinain amah bel cu Falam ah a ngakchiat lio in a tthangmi le Falam ah inntung bunh in khua a sa cangmi a si. Cucaah amah zong nih Falam peng aiawh deuh ah a lungchung cun aa ruah khawh men? 2015 thimnak zongah Falam peng in a rak i cuh bal. chuahkehnak khua ah Hakha peng a si lo nain Hakha peng aiawh in MP a rak si mi hna zong an tampi. Asinain Hakha ah inntung bunh in khua a sa cangmi an si hna.

Tahchunhnak ah Pu Lian Uk, Pu Zo Bawi, Pu Sui Thio tbk.Asinain Laimi cu pale chuahkehnak khua kha kan khua ah a chia mi kan si caah, Thantlang peng thimfung pe mi hna nih kanmah pengtlang mi te a si ko tiah khurkhua hna fak deuh in an ruah khawh ahcun a ttha dom ding khi a si.MP ah thimtlak tuk a si nain a dirhmun bel aa laklawh ngai ve mi a lo.

Hleithumnak. Pu Sui Thio:Chin ramkulh Minister a ttuanmi hna lakah eihmuar kong ah purhdah a tong bikmi si dawh a si. A bik in Hakha-Thantlang lei ko nih an purhdah khun mi a lo. Thimnak lai lawng si lo in tuan deuhpi khan eihmuar an puhnak kong ah a dirhmun rak fianter lengmang sehlaw a ttha tuk hnga.MP le Minister a si hlan piin Hakha khuasa nupa ahcun rak bochan lengmang mi a si.

Zion Khrihfabu ah, a umnak Keisih sang zong ah upa dirhmun in dingfel tein a rak um pengmi a si.Lamsul lei Minister a ttuan chung zongah chim awltlak le mithmuh in rian tampi a ttuan. Asinain Chin ramkulh Cozah lutlai hna eihmuarnak kong an chim tik paoh ah amah min hi telh zungzal a si ve mi nih a dirhmun a hrawh ngai.

Asinain eihmuarnak ah dingfel tein a umnak kong kha zapi theih in chiatserhnak tuah tiang in thimnak lai ah a fianter. Tuan piin fianternak rak tuah tawn sehlaw a ttha tuk hnga. A hlan a sining le kum 5 chung lamsul lei vuanci a ttuan chung a tuahmi zoh tikah MP ah thim tthan tlak tuk a si nain eihmuar kong ah an phurhdah tukmi nih a dirhmun a laklawhter ngai.Credit: Nathan Pa LD Hmung.

Note: Pakhatnak in Pahranak tiang attialmi cu amah timeline ah zoh le rel khawh asi. Hika tu ahcun kan vun langhter lo. Ahnu bik a ttialmi 11nk tu in kan vun langhter mi asi.