TUTAN PU NO THAN KAP CABIA CU A TURU BAK KO

NA tomi Lâwng FIMKHUR AW. A hnuaiah Party cu Lâwng (ship, boat) thawn tahṭhim a si.Shan le Kachin party ih um cu Shan le Kachin Lâwng (ship) to vek a si. Kawl party ih um cu Kawl Lâwng to tluk a si, Chin party ih um cu Chin Lâwng to a si.Ziangahtile Rampi pakhat ih um miphun kan sinan, Luahmi ram, Dinhmun, Biaknak, Calai, Zinledan, Nunphung le Hnamzia pawl bangaw lo kan si ruangah, kan miphun Lâwng cio ih fehnak le thlen tumnak an bangaw lo.

Theih ringring dingah,Kawl cu mipum tam le ‘hnamdam zo’ an si ruangah, an Lâwng khal a tum in a mawi cuang. ASINAN an Lâwng khaltu (mawngtu) cu Kawl hotu an si ruangah an feh tumnak hmun khal “Kawl miphun damnak tikulh (island)” a si; cucu kannih hrangah “hnamhlo cannak tikulh” a si.

Kawl Lâwng kan to asile Kawl thazang kan ritter in kan cakter sinsin ding; khatlamah, Chin miphun thazang kan ṭumsukter sinsin ding. Ziangahtile, Kawl Lâwng cu Chin miphun damnak tikulh lam panin a feh lo hrimhrim. Feh vekin an langter ṭheu nan bumawknak men a rak si ti kum 70 sung an fehdan zohin hmuh theih a si.

Chin cu mipum maldeuh le miphun damlo kan si bangin kan Lâwng khal a fate, a danglam. HMANSEH, a khaltu cu miphun kilhim ih cawisan duhtu Chin upa kan si thluh ruangah, Lâwng feh tumnak khal “Chin miphun damnak tikulh” a si.Curuangah, Chin Lâwng na to asile Miphun damnak tikulh a lo thlenpi tengteng ding (A rei le rei lo cu thuhran).

A tawinak in, Zakhaing Lâwng (Party) cu Zakhaing hrangah a ṭha, Shan Lâwng (Party) cu Shan hrangah a ṭha, Kawl Lâwng (Party) cu Kawl hrangah a ṭha. Chin Lâwng (Party) cu Chin hrangah a ṭha.Himi thudik an theih fiang tuk ruangah zovek Kawl khalin an Kawl Lâwng si lo hnamdang Lâwng an to duh dah lo (Kawl mimenmen leilet pa tiangin hrilawkah Chin party vote an pe duh hrimhrim lo. Zakhaing le Shan khal anmai miphun Party lawng tha an pe, an vote).

Kannih Chin lawngin, hnamdang Lâwng to cu sunlawinak, lennak le hlawhtlinnak umsun ah kan ruat a bang. Hivek ruahnak cun, thei nan thei taktak lo, hmu nan hmu fiang lo, thukpi le hlapi thuruat thiam lo hnam tenau thinlung nei ah in cangter thei. Cuvek milai cu si hram hlah uhsi. Kawl le Vai bangin Hnam U le milungfim kan sizia langer thiam ve uhsi.

Mai miphun Lâwng to thiam hi miphun duhdawtnak thinlung pitling langter a si, rethei le farah kan si hmanah hnamdangin in upat le in zahnak khal a si.Hnamdang ih zohniam le nautatmi miphun si hi khawp thlang uhsi, ning neknek thlang uhsi, huat thiam thlang uhsi.Hiruangah HNAMDANG (Kawl) HUAT ding tinak a SILO, Ukmi (sâl) lungput neih hrimhrim LO ding, tinak a si sawn.

Miphun zaten niam can le san can nei thluh, uktu le ukmi si thei thluh kan si ruangah, Kawl ukmi, mirethei le farah kan si sung khalah, zah le upat tlak “mipitling lungput” nei tum hram uhsi. Cuvek lungput hi tulaifang Chin miphun in kan ṭul mamawh bik a si.Kum 70 lai bum tuar ruangah Chin miphun cu hnam damlo kan si phah. Hmanseh, Chin miphun hi ka zahpi lo.

KEI CU Thir thawn sakmi Kawl Long tumpi le mawi to ih “hnamhlo tikulh” pan rero “hnamvai Chin pacang” si hnakin, Thing thawn sakmi Chin Vokkuang Lâwng fate toin “Hnamdamnak tikulh” pan rero “mirethei Chin pacang” si ka hril sawn. NANG TEH? What about you? Pu No Than Kap