Tikir Ram Ah Um Mi Tikir Dam Khi Pu Henry Van Thio LawngTe Nih A Ser Siam Mi Si Tiah Nan Ruah Ah Cun Rak Rel Uh

Mitam deuh nih cun Damkir khua le ram tham cu Henry Van Thio lawng te si an ti Ka hin Pu Ramkhar aniha ttial mi hi rak rel. Pu Ram Khar: Tikir Dam Ai Thokning. Tikir Dam hi thenkhat ruahnak ah cun Vice President Pu Henry Van Thio rian a tuan hnu lawng in tuanchuahmi ah kan ruah. A rak I thok ning tak cu mah ti hin a si. 1998 Kum lio hin Tikir khua pawngah a ummi “Tikir Kual“ timi hmun hi hmunhma rem, hmuntha, hmundawh a si caah hi lio ah Pah Wa Tah (Ohkathah) a rak tuanmi ralbawi Bohmuci Tan Aung nih a ke bak in ni 4 la kal in a rak zoh hmasa ti a si. Hi lioah hin Motor lam zong a um rih lo. Cu hnuah amah a chawngtu, Pa Wa Tah (Ohkathah) a si vemi Bohmuci Tan Win nih a rak zoh i Tikir Kual (Tikir dam tuahnak hmun) hi ka hmuhmi hmunhma vialte ah hmunhma dawh, hmunhma tha bik a si tiah a rak chim ta ti a si.

Hi lio ah hin Tikir hi Thantlang peng chungah pehtlaihnak lam le sul leiah a rak chiat lio bik caan a si. Cozah lei zong nih hnu rak chit mi khua a si . A ruang cu pehtlaihnak a chiat tuk caah a si. Tikir Dam tuah khawhnak dingah cun hawi hlan cem ah lam a pem hmasa a hau ti a si caah, 2003 kum ah Natalah zung lei in Tikir le Hriangkhan khua kar lam cawhnak ah tiin Kyat Sing (272 ) an rak thlak. Cu zong cu an rak chuh than hna. Cu lawng si lo, 2013 kum ah Myat Nu Thu Company nih Tikir le Hriangkhan kar lam cu A lak (Free) in an rak cawhpiak than hna I an lim hlanah an ngol than hoi. Cu hnu cun a hung um than i Pu Henry Van Thio (Bohmu) nih Pensen a lak hnuah Cozah sinah Tikir Dam tuahnak ding halnak ca a rak chiah.

Cu hnu ah Kawlram President zung in 2013 kum ah Tikir Kual ( Dam ) tuahnak a tha maw tha lo timi Servey tuah ding ca an rak chuah. Mah hnu cun USDP cozah kai hnu 2013-2014 Budget kum ah Tikir Dam tuahnak ding caah tiin Phaisa sing 2000 an rak thlakpiak hna. Cu zong cu Tikir Dam tuah lo in Thantlang peng Lautu lei khua (4 ) ah Sing 2000 cu Lei Ti lam tuahnak ah thenhphawt than an si. Dam tuahnak ah hman a si hoi lo.

A liamcia caan zei mawzat ah hin Thantlang peng ah pehtlaihnak Lam le Sul lei ah hin Mara Tlang le Bualpeng hi hawi hnu ai thlaimi, a chia bikmi pengtlang an rak si.Kum 2015, NLD Cozah a hung kai hnu in kan pa Pu Henry Van Thio nih a liamcia caan zeimaw zat lio I Tikir Dam tuahnak dingah timhtuahmi vialte cu a thar in a van peh zulh than caah nihin ni ah hi DAM cu tlam a hung tling.

Tikir Dam tuahnak hmun cu hmunhma tha /rem a si caah Japan ram in a rak tlungmi Mr. TERUMI TAKA OKA nih Tikir Dam le a pawngkam a zoh tikah hmailei thil a hmuh colh. Hi hmun hi hmailei caan ah cun ramchung ramleng khual an ngamnak (Tourists Attraction) hmunnuam ah a cang te kai ti hi a hmuh colh. Amah pumpak in Kawlram ah a um bal lomi thingkung Maple kung (3000) le Japan Cherry kung 1400 cu Japan ram bak in a rak phurh I amah bak nih a rak cinpi hna. Nihin ni ah cun duhnung ngai in an nung dih. Zeitluk lunglawm dah a si.

Thantlang peng Bualpeng hi NLD cozah kai hlan a sining ruah ah cun lungfak tuk a si. Hawi hnu ah rak kaltakmi peng le tlang a rak si. Voitampi cu thanchonak lei nih kaltak a rak si. Nihin ni ah hi dirhmun an phakmi hi Pathian thluachuah a si hrimhrim ti hi kan theih awk a si.Tikir DAM kongah hin bia vaivuan tampi a chuak tawn. Kan pa, Pu Henry Van Thio zong a si lo ningpi in an tinak a um tawn. A ngaingai ti ah cun Tikir Dam hi Tikir khua ca lawng a si lo. Bualpeng ca lawng zong a si fawn lo, Thantlang peng kan dihlak ca a si.

Chinram ca zong a si fawn. Nihin ni ah cu ruahnak cu kan hmuh khawh rih lo hmanh ah a ra laimi caan ah cun kan hmuh te hrimhrim ding si.Tikir DAM bantuk hmunhma rem le a thami hmun a um si cun rak chuahpi cio uh. Hal khawh le tuah khawh I zuam hna usih. Thantlang peng Farawn khua zongah hmunhma an rak zoh nain a rem deuh lo an ti. Hmunhma dang theimi le hmumi nih ruahnak zong rak chuah cio dingin kan sawm chih hna.

Kan Chinram, Thantlang Peng, Bualpeng, Tikir khua hna i Tikir DAM pi a hung um khawhmi hi kan biak Pathian thawng a si, ti tu hin kan ruah deuh ding a si. Pathian thluachuah a si ti in ruah khawh tu hi a biapimi cu a si.Catialtu: Pu Ram Khar. Thantlang Siipin Lutlai

Be the first to comment

Leave a Reply

Your email address will not be published.


*