PU THLA HRE NIH AA TIMHMI A LANGHTER CANG. VOTE PE CIO HNA USIH

2020 Thimnak Ah Kaa Zuam Lai. Keimah cu Pu Thla Hre ka si. Hakha dawrhlun sang ah a chuakmi le a thangmi ka si. 2020 Thimnak ah Pyine No.1 me hmun in kaa zuam lai. Keicu party pakhat min aiawh in a si lo. Ka me hmun chung ka miphun vialte thleidan nak um loin a aiawh kho mi Independent in a si lai.

Mi Zaapi Caah (For Our People) 2020 Thimnak ah “Mi Zaapi Caah ( For Our People)” timi tlangtaar in kaa zuam lai. Pathian nih damnak le thawnnak a ka pek I rian ka tuan kho rih. Ka thinlung chung ah keimah caa timi hi samfa tia hmanh a um lo. Ka miphun caah thil tha ka tuah lai timi hi ka thinlung chung ah a khah in a khat. Acozah rian ka tuanlio ah tuahtuan khawh mi tampi ka ngei.

Mipi aiawh tu ka si ahcun thiltha tampi tuahtuan khawh kaa tim. Serding zong tampi a um. Hakha kan ser lai. A ningcang lo a si mi pohpoh kan remh lai. Zaapi zawnruahnak angei mi acozah tha kan ser lai. Ka miphun kan nunphung, kan caa kan holh ka kilven hrimhrim lai. Mizaapi caah lungawtawm lo tein ka tuan khawh hrimhrim lai.

Pom Mi le Doh Mi. Champion a co tu i a lamthluan a bawmtu cu a sungtu pa a si. Democracy lamthluan kalnak ah a bawm tu bik cu dohtu party a si ve. Keicu dohtu party le dohmi party cu ka si lo nain tlamtling mi democracy zauk phung kalding lamthluan ah cun pommi le dohmi ka ngei ve.Pupa vawlei aum hrimhrim timi hi ka pommi asi.Pupa vawlei ngei I an sungh zatlaknak aumnak hnga lo ka dirpi lai.

Kan khua, kan ram, kan miphun caah thiltha atuah mi cu ka bomh hna lai. Ziknawh le eihmuar nak nih kanram thancho nak a hrawh tuk caah ka doh hrimhrim lai. Santlailo le misifak zeihmanh a rel lo mi hruaitu, mizaapi caah a tha lo mi pi a tha ko a timi hruaitu, kanram, kan vawlei, kan khua, kan miphun a daw lo mi hruaitu cu ka doh hna lai.

Logo. Ka logo cu Chin Thantar hmai ah Thlapa le Sum a si. ThlaPa cu zaan ah ceunak nemte, daihnak, hnangamnak a kan pek. Ceunak nem a pek khawhnak thazaang cu Nikaa thawng in a si. Mipi thawng in zaapi caah ThlaPa ban tuk in thathnemnak daihnak hnangamnak pek khawh kaa zuam ve lai.

Thlapa chung I a ummi Sum cu laimi nih ngeih loah a si kho lomi pupa chan in kan hman mi asi. Laimi kan nunnak eidin rawl (fangvoi, facang, faang le khachuan, mehphek tiang in) eiawk tha in a chuah tertu a si. Sum cu in kipah cokaa kipah ngeih lo a si kho lo mi a si caah mikip nih Sum bantuk in ka hmang ve hnaseh ti ka duhnak a si. Cu caah ka miphun vial te nih hmanmi le fialmi (a tuantu) si ding kaa zuam lai.

Lung Awtawm Loin.Keimah caah ka miphun vial te lung awtawmnak a um lo. Zeiruangah ti ahcun keicu party min pakhat bunh le aiawh mi ka si lo. Me hmun I ka miphun vialte ka aiawh dih ko. Cu caah lung awtawm lo tein mipi caah rian ka tuan lai. Aphi chuak lakin ka tuan khawh hrimhrim fawn lai. Pu Thla Hre