THIM RESULT KONGAH PU ZOBAWI NIH THIL SINING APHUAN CANG

Interview tete an ka tuah mi ah ka chim lengmang mi tutan thimnak ah a tlawm bik zatuak 80% in kan tei lai, ka ti mi kha zatuak 94% in Chin Ramkulh ah NLD nih kan tei taktak, tiah Chin Ramkulh NLD Chairman le atulio Hluttaw Speaker Pu Zo Bawi nih November 9 ah a chim. Kei cu ka chim tawn ko kha. Kaa lawng in chim tham cu a fawite.

Tuahsernak hi a biapi ka ti lengmang. Thimnak result a chuah tik ah nan fiang te ko lai, ka ti mi kha a si ko. 2015 kum thimnak lio ah khan zatuak 78% in kan rak tei. Tutan cu zatuak 94% in kan tei ko. Hakha le Tonzaang lawnglawng ah thutdan 3 kan sung. A dang poh kan tei dih ko. Chin Ramkulh huap lawng si loin Myanmar rampum huap zong in kan tei thiamthiam ko lai (Rampum huap hi news kan tial tiang ah an rel dih rih lo).

2015 kum nakin kan cak deuh thiamthiam ko lai,” tiah Pu Zo Bawi nih The Hakha Times ah a chim. Tutan thimnak ah Chin Ramkulh Hakha le Thantlang in teitu hna cu; Hakha in Pyithu Hluttaw Palai ah Pu Tial Ling (NLD), Amyotha No. 11 ah Prof. Dr. Aye Aye Ngun (NLD), Amyotha No. 12 ah Pu Ngun Vung (NLD),

Pyine No. 1 ah Pu Sonny Thang Cung (NLD), Pyine No. 2 ah Pu Siang Mang (CNLD) hna an si i Thantlang in; Pyithu ah Pu C. Za Cung (NLD), Amyotha No. 10 in Pu Henry Van Thio (NLD), Pyine No. 1 in Pu Chan Ham (NLD) le Pyine No. 2 in Pi Ni Sui Lian hna an si, tiah kan theih. Credit: The Hakha Times.

Salai Lungthlitum Cabia: CNLD an lor tuk cang i ‘kan ram caah tihnung an si’ ka ti caah an sungh dih nak ding caah ka sining dihlak i pek in cawlcangh ding ah kan hnu May thla ah biachahnak ka tuah. July ah keimah pumpak zong thimnak ka lut chap fawn.

Thimnak ka luh hnu zong ah CNLD thuat le sunghter hi ka rian ngan bik ah ka chiah zungzal, aruang cu CNLD an tlin ahcun kan miphun hrawktu le buaitertu an si kho tiah ka ruah caah a si. Keimah mee ngahnak ding caah ca ka tialmi nakin CNLD mee sunghnak ding caah ca ka tialmi tam deuh(teinak hmuh le ramrian tuan ka duh lo tinak si lo mu).

CNLD caah an coronavirus ka hun cang. NLD nih 92% bak Chinram ah teinak an hmuh khawh. CNLD cu an lor tuk ko nain sungh cikcek in an sung. I cei ko hna seh, an lungfim deuh cang lai. NLD lila nih an duh theng lomi Pu Suithio zong a sung fawn. Tutan cu kei ka saduhthah a tling ngai ko, keimah zong ka sung ve ko nain. Credit: Salai Lung Thli Tum

Be the first to comment

Leave a Reply

Your email address will not be published.


*