THAWNGTHAR, SALAI NGUN SAN AUNG NIH FIANTERNAK ATUAH COLH

Good News taktak. Chin pasalttha Salai Ngun San Aung nih Chinmi vialte sin ah thawngpang a vun langhter cang. Bawipa nih hup pheng in, ram le miphun caah a saduhthah vialte tlamtling atuah khawhnak dingah lam hruai in umpi ko seh. Tuchun ah Salai Ngun San Aung konghe pehtlaiin thawngpang a chuakmi cu kan theih dih cio hna.

Tuchun thawngpang kongah Chinmi or Laimi tthenkhat thinphang thlalau ngai in a ummi zong kan um hna. Kan mawh hrimhrim lo kam khat lei cun, a ruang cu tulio thil a cangmi konghi social media ah langhter lo ding tiah ralrinnak an tuah lengmang caah a si. Abik in tulio kawlram buainak ah cun thawngpang langhter zong hi tthenkhat caah theih aphu ngaingai mi asi nain tthenkhat caah ruah dingmi tampi a um.

Tuchun zongah a cunglei langhter bangin Chinram or Laimi caah biatak tein kawlralkap thiltuahmi ralttha taktak a dohtu Salai Ngun San Aung kong vun langhter asi. Cu chungah tthenkhat nih thawngthanhnak atuahtu cungah lungtlin lonak tampi an ngei hna. Hi konghe pehtlaiin bochanmi pasalttha Salai Ngun San Aung nih mipi sin ah thawngthanhnak atuah cang.

Tuchun thawngpang konghe pehtlaiin Salai Ngun San Aung nih a chimmi cu Dear upat mi ka miphun hawi hna, Mizapi nan lungrethei in nan khuaruah a har sual lai tiah keimah nih himnak hmun tiah ruahmi ka phak cang ko caah tubantuk in The Chin Journal sinah thawngthanh dingin bawmh ka rak halmi hna asi. Cucaah The Chin Journal cungah mawhphurhnak rak ngei hrimhrim hlah uh tiah nawl kan duh hna.

Cun nan thlacam piak cionak thawngin ka him i, keimah zong ram le miphun nih a herhning hoih in ka rak kir tthan lai i khuazei ram hmanh ah luphum ding kaa tim lo. Pathian nih a ka chiah i kilven ding tuanvo a ka peknak Chin miphun umnak Chin ram ah ka luphum ding hi zeitik paoh i kaa ruahmi a si. 2021 Rampi dothlennak ah aa telmi dihlak cungah upatnak he, Salai Ngun San Aung.

No description available.

Relchih:Kawlralkap taza an cuainak kong thanhnak an tuah cang. Kawlralkap zong nih ningzah celh loin mipi thimmi cozah cu ralrinnak an pek ve hna. Thimnak ah kawlram mipi hna nih an thimtlin mi cozah Hluttaw aiawh asimi CRPH nih kawlralkap hna cu taza kan cuai hna tiah tuchun ah an langhter. Kawlralkap taza kan cuainak phunglam cu Penal code section 122(1) le 124(a) hmangin a si tiah an chim.

CRHP nih kawlralkap taza an cuainak hmun cu Napyidaw i, Supreme Court of the Union ah a si i, hi taza an cuainak ca cu a liamcia kan hnuzarh March Ni 4 ah khan kan chiah cang tiah thanhnak an tuah. Theihcia le thanhnak tuah cang lengmang bantukin Kawlralkap nih February nikhat ah Kawlram pumpi cu hramhram in uknak lak hram an rak thok.

Kawlralkap nih uknak an lak lio ah Rampi president U Win Myint le State Councellor Daw Aung San Suu Kyi hna nih an hruaimi cozah cu phungning lo le hramhram in uknak an rak lak. Hi bantukin Kawlralkap hna nih uknak or nawlngeihnak an lak ruangah taza cuai an sinak hi a si tiah tuchun March nikua ah CRPH nih thanhnak an tuah.

Hi konghe pehtlaiin Kawlralkap hna nih ningzah celh loin thanhnak order an chuah ve tthan. Kawlralkap cozah nih an timi cu CRPH hi mizei hmanh nih rian ttuanpi hna hlah uh, rianttuan pi hna lo dingin kawlralkap nih cathanh an chuah pin ah an ti tthan rihmi cu CRPH attuanpi mi vialte hna cu kumpi kum 7 thongthlak nan si lai an ti tiah Mizzima thawngzamhnak nih alanghter.

Mizoram Luh Ahar Ngai Cang Lai:Kan unau Mizoram, Champhai nih ralrinnak order an chuah cang. A mipi vialte hna zong ralrinnak a pek cang hna. Chinram he neihte in a ummi Mizoram Champhai nawlngeitu nih a ram mipi vialte hna ralrinnak atuah cang hna. Atu bantukin ralrinnak atuahnak aruang cu tulio kawlram buainak ruangah thil a cangmi ralzam kong ah deuh ah amipi ralrinnak apek nak hi asi.

Tulio kawlram buainak ruangah ramchung ah a um ngamlomi Mizoram ah zam aa timmi hna nih hi konghi theih aharh ngaingai ko tiah kan ruah caah kan vun langhter mi a si. Acunglei ah chimcia bangin kawlram buainak ruangah atu bantuk in Mizoram Champhai nawlngeitu nih nawl a mipi sin ah a chuahmi asi i, nawl a chuahmi cu atanglei bangin a si.

Order: Nai hrawnghrang ah kan ram innpa, Kawlram buainak ruangah ralzam le Sungthoh hna zong a lut khomi an si caah ramri hngak dingah cunglei cozah nih Assam Rifles a chiahmi hna nawl a pek bangin khualtlawng mi hna an i citnak Sumo hna cu biatak tein check nak an tuah hna i, Kan muisam le holh zong khawchak (Chinmi) kan unau hna he aa khah ruangah buainak kan ton lonak dingah Voter ID maw asiloah Aadhaar Card, Aizawl tlawng aa timmi hna nih i ken dih dingin kan in nawl hna in theihternak kan in tuah hna tiah an langhter.

Mizo ca in order an chuahmi asi i, a cunglei kan langhtermi hmanthlak hi a si. Hmanthlak in cabia rel aa harh mi caah an mah ttialning tein kan vun langhter. Order. Tun hnaiah kan ram thenawm, Myanmar buainak avanggin raltlan le spy te pawh lo tuk thei reng an nih avangin Border veng tura Sawrkar laipuiin Assam Rifles a dah te thupek a pek angin zin thin te chuanna Sumo te check uluk em em an si ni a. Kan hmel leh tawngte khawchhak unaute nen a inan vangin buaina kan tawh loh nan Voter ID emaw Aadhaar Card emaw Aizawl zin tumte chuan keng theuh turin kan ngenin kan hriattir a che u.

Be the first to comment

Leave a Reply

Your email address will not be published.


*