THAWNGPANGTTHA TUK A CHUAK CANG, HNANGAMTUK SI CANG

Thawngtha: Victoria LOCKDOWN A Dih Than Cang. Victoria Ramkulh, ni 5 chung erhkhumhnak (Lockdown) tuahmi cu tu zaan sml 11: 59 PM in a dong than cang lai. Thaizing thawk in lenkainak, tonnak, le pumhnak pawl tuah khawh a si cang lai i sianginn zong on than a si cang lai.A liamcia ni 5 chungah minung 212,000 test an si i zawtnak ngeimi hna umkalnak hmunhma le naihniammi minung 3,400 zong hngalh an si i midang he pehtlaihnak tuahter an si lo.

Cun, a liamcia sml 24 chungah minung 2 sinah zawtnak hmuh a si i atu ah Victoria Ramkulh chung zawtnak ngeimi hi 25 an si. Aa thlengmi asiloah zulh ding hna, Lengchuah khawhnak a ruang 4 a um ti lo – duh tik poah ah lengchuah khawh a si. 5km chung lawngah umkal ding timi a um ti lo. Hmaihuh (Face Mask) cu inn chung/leng zong, hlat deuh in umthut khawh lonak hmun poah i hruk ding, cun pakhat cu zaal chungah i ken peng rih ding.

Ni 1 ah mileng 5 tiang ngeih khawh a si. Khualeng zapi tlonlennak hmun ah minung 20 tiang i hmuhton khawh a si. Sianginn on than an si. Rawl/thil dawr le khual riah/umthutnak pawl zong on than an si. Biakinn pumhnak tuah khawh a si, minung rikhiah a um lo. Asinain mincazin (electronic) he 2 sqm hlat thutnak ding hmunhma a bitkauh zoh in a si lai.

Thihloh caan ruakhumh/ruakthlahnak le thitumhnak cu minung rikhiah a um lo, asinain mincazin (electronic) he 2 sqm hlat thutnak ding hmunhma a bitkauh zoh in a si lai. Sizung/siinn ummi cu chungkhar pakhat nih ni 1 voi 1 in vehvet khawh a si. Sammehnak, tamhnak le adangdang dawr phunphun hna zong on an si. 26 February ah thawng thar thanhnak a um than te lai. Credit: CBN

Relchih: Chin Ramkulh Uknak Lei Luzik ah Pu Ngun San Aung an Thim. Chin ramkulh Administrative Council Chairman ca ah ralkap cozah (SAC) nih Pu Ngun San Aung cu Feb. 16 ah an fehter, tiah MRTV nih nihin zanlei ah thawng a thanh.Tuan ah khan Pu San Mawi Nikhua cu Chin ramkulh Administrative Council Chairman ah rak thim a si. Nain ruah lo piin lung zawtnak in a nunnak a liam caah Pu Ngun San Aung tu an vun thim hi a si. Pu Thla Hre le Pu Ngun Maung zong ralkap nih rian pek ding in an sawm hna nain ralkap cozah kut tang ah rian kan ttuan kho lo an ti caah rian an pekmi hna cu an cohlang lo. Credit: TCJ

Be the first to comment

Leave a Reply

Your email address will not be published.


*