THAWNGPANG TTHATUK HAKHA AH A CHUAK, LAWMHNAK IN NAN KHAT CIO LAI

Thawngpang tthatuk vun theih hi cu a sunglawituk hringhran, Lawmhnak in nan khat cio hna lai. Bawipa nih kan huppeng zungzal hram ko seh, Tutan ah Hakha ah thawngpang tthatuk a chuakmi cu Covid in azawmi pakhat hmanh Hakha ah an um ti lo tiah theih asi. Hi konghe pehtlaiin Chin Broadcasting Network thawngzamhnak nih a tanglei bantuk in thil sining an langhter.

Hakha Ah COVID-19 Mizaw An Um Tilo. Chin Ramkulh, Hakha khuapi chung ah COVID-19 zawtnak ngei Case-127951 le Case- 127942 hna cu zawtnak an hmuh hnu voi hnih tiang an chek than hna nak ah an zawtnak a thiang cang i sii-inn in an chuahter cang hna ca ah Hakha ah zawtnak ngei pakhat hmanh an um ti lo tiah theih a si. Atu Case-127951 le Case- 127942 hna cu sii-inn in chuahter an si cang ko nain, Ngandamnak Zung nih nawl a chuah ning in ni 7 chung Home Quarantine in an umter rih hna lai tiah theih a si.

Hi kong he pehtlai in rian ngeitu pakhat nih, “Minung pahnih nih damnak an hmuh cang ca ah sii-inn in chuahter an si. Atu ahcun Hakha ah zawtnak ngei pakhat hmanh an um ti lo. Kan i runven khawh nakhnga ca ah tiin Hakha khualuhnak hauka in caan tling tein cheknak kan ngei cuahmah,” tiah a chim. Atu Hakha zawtnak hmuh mi hna hi a tam deuh cu hmun dang in a rak tlung mi motor mawng le motor a hnu a zul mi hna an si deuh tiah theih a si. Credit:CBN

Atulio alinsa taktak mi: Russia nih vawleipi cu hmaichia in atuah cang hna. Caan zeimawzat chung Russia cozah adohtu Alexei Navalny cu Tur in thah an timh i, damtein a um hnu ah Russia ah akir tthan i, Russia cozah nih an tleih colh. Hi an tleihnak ruangah vawlei pi nih Russia cu fak an tthuat. Asinain Russia nih fiang ko in lehnak atuah colh hna. Alexei Navalny tleih asinak kongah atanglei bangin an langhter. Russia cozah thiltuah mi cungah US siseh Europe ram hna nih biatak tein sual an phawt i, rianrang in chuahter dingin an duhnak an langhter.

Asinain Russia cozah nih atimi cu kan ramchung buainak kongah ahohmanh i thlak hlah uh tiah ramdang pawl hna cu a hro hna. US secretary of state Mike Pompeo nih atimi cu Russia ram hruaitu hna nih hin President Vladimir Putin le a hruaimi cozah asoiseltu hna cu an ci hmih an timh hna. Cun Navalny hi thlah colh uh tiah a chim. US President elect Joe Biden nih, national security adviser ah a thimmi Jake Sullivan zong nih atimi cu Navalny cungah Russia cozah cawlcanghnak hi human rights phungkalh lawng siloin Russia mipi hna tukdohnak asi tiah a chim ve. Navalny chuah colh dingah France le Italy cun UK le EU member ramdang hna le European Council president hna zong nih an duhnak an langhter cio.

Alexei Navalny cu Tur in thah an timh i, Tur an pek. Germany ah aa thlop i, Zarhpini ah khan Russia ah akir tthan. Asinain a phak bak in Moscow i, Sheremetyevo Airport ah police hna nih an tleih colh. Russia Prison service nih atimi cu cozah dohtu hruaitu nih hin voitampi phung akalh cang i, Nikum December ni 29 thok khan tleihnak nawl ngeih asi cang tiah a chim. Navalny cu biaceihzung nih biachahnak atuah hlan cu hren asi lai ti asi.Cu lawng siloin Russia Prosecutor hna nih an ti tthan mi cu Navalny hi a dirhmi Foundation, Anti-Corruption Foundation le Charity dangdang caah tangka an hmuhmi zong amah pumpak caah ahman tiah case an tuahpiak rih.

Navalny cu nikum August 20 ah khan Seberia in Moscow panh in vanlong acuan lio ah lungfim loin a um i, Seberia sizung ah nihnih zohkhanh asi hnu ah Berlin, Germany ah kalpi asi.European Expert hna nih an timi cu Navalny hi Tur phunkhat asimi Novichok nerve agent an pek tiah an chim. Asinain Russia nih cun ahman lomi asi tiah an ti lawng siloin tehte rak langhter uh tiah Germany official hna cu Russia nih an ti hna. Cun Germany kalpi asi hlan ah hin ataksa ah Tur nehnang pakhat hmanh a um lo tiah an ti rih. Thlop dam asi hnu ah Navalny nih tleih asi hlan ah hin kan ram ah ka kir cang lai tiah a rak chim cang.

Zarhpini ah khan Russia panh in akal i, Airport aphak bak in an tleih colh. Amah he atlungmi a nupi tucu an tlai lo. Alexei Navalny nih Russia ah ka kir lai tiah arak chim cu biataktein vuleipi arak cul, Airport ah Journalist le amah adirkamhtu minung tampi hna nih an don. Asinain attumnak ding airport cu an thlenpiak i, Vnukovo airport ah attum dingmi asi nain Sheremetyevo airport ah an ttumter.

Be the first to comment

Leave a Reply

Your email address will not be published.


*