A POITUK E, MAH BANTUK THIL ACHUAH HI CU, PU SI BIK HI PATHIAN ATHEI MI ASI

Breaking News: Thantlang ah Thangzang khuami pakhat nih a nu pi a thah. Hakha Pengkomh, Thantlang khuapi ah khua a sa mi Zahnak tlang Thangzang khuami Pu Si Bik nih a nupi Pi Bik Hnem cu namtong in a hngawng ah a tuk i a nunnak a liam tiah Thantlang palek sakhan in thawng kan theih. Hi kong he pehtlai in Thantlang khuasa upa pakhat nih, “Atu thil cang hi zaanlei suimilaam 4:00 le 5:00 karlak hrawng ah a si.

Kanmah nih hi thawngpang kan theih hi cu suimilaam 5:00PM tluk ah a si. Atu an umnak hi Thantlang palek sakhan he aa naih te mi zong a si fawn. Cun, amah hi a tling pah lo mi a si, a thah hnu zong ah a zaam lo. Palek nih thawng an theih le cangka in an kal i an va tlaih colh. Atu hi Palek le rian ngeitu hna nih Thantlang sii-inn ah a ruak an chiah,”tiah The Hakha Post ah a chim.

Hi i thahnak kong he pehtlai in Thantlang Palek sakhan le rian ngeitu hna sin ah pehtlaihnak kan tuah ko nain, kan pehtlaih kho rih hna lo. Pi Biak Hnem hi a chuahkehnak khua cu Thantlang Peng, Hmunlipi khuami a si. Pu Si Bik he hin fa pasarih an ngei i Thantlang khuachung ah khua a sa mi an si. Cun, Pu Si Bik hi Pathian dawtnak a thei tuk mi le Pathian bia loin a um kho lo mi a si. Asinain, 2020 kum Christmas hrawng in khan a lung a tlau pah bantuk in a ummi a si tiah kan theih. The Thantlang Post

Thantlang ah an pa nih an nu namtong in a tuk i a thi. Thantlang um Thangzang khuami Pu Si Bik nih an nu Pi Biak Hnem cu January 21 zanlei 4:30 hrawng ah namtong in a tuk i a thi tiah thawng kan theih. Namtong in a hngawng ah a tuk i sii-inn zong ah kalpi manh lo in an inn chung ah a dihcolh. Zei ruang ah dah a si ti zong theih a si rih lo,” tiah innpa upa pakhat nih The Hakha Times ah a chim. Pu Si Bik cu palek nih a phung ning in an kalpicolh.

Cun Pi Biak Hnem ruak cu a phung ning in a hma check ding in sii-inn ah an kalpicolh ve. Cu hnu ah inn ah a ruak suan a si te lai. Pu Si Bik kong he pehtlai in innpa nih a konglam an theih tawk an chimnak ah “amah hi Pathian dawtnak a thei i Pathian a duhtuk mi a si. Pathian bia kha i umpi kho lo in khuakip ah Evangelist bantuk in thawngtha a chim mi a si. Asinain nai Christmas hrawng hnu khan a lung a tlaupah bantuk in a um,” tiah an chim.

Pi Biak Hnem hi a chuahkehnak cu Thantlang peng Hmunlipi khua a si. Pu Si Bik he hin fa pasarih an ngei i Thantlang hlan lio Ruakhua sang rak ti mi Palek sakhan thlang ah khua an sa. Pi Biak Hnem ruak cu thaizing January 22 chun ah thlaan a tlai tiah khuami sin in thawng kan theih. Credith The Hakha Times

Be the first to comment

Leave a Reply

Your email address will not be published.


*