SOISEL NGAM DING HRIMHRIM ASI TI LO, CUNG LE TANG BAK IN AN I THLAU

CNLD Chairman Pu No Than Kap Interview kha a dih dongh tiang nan ngai cio hna lai tiah zumhnak ka ngei. Aruang cu tulio caan ah Pu No Than Kap cu aliamcia a konglam thar chuah le a phunphun in soisel le zawmhteihnak cabia social media ah a vun khat ngai caah pumpak cio zong nih zeibantuk dah adir hmun asining timi interview ah achim lai tiah i ngaihtuk caah asi.

Pu No Than Kap interview an tuahnak ah abiachim holh rel kha soisel awktlak pakhat hmanh aum lo. Chin Pasalttha taktak asinak siseh upat atlaknak siseh a zeizong kip in micung cuang asinak fiangtein hmuh khawh le theih khawh asi. Na konglam an chimmi ahhin zeitindah asining tiah biahalnak ah lehnak atuahmi hrimhrim kha uar aum tuk hringhran.

Kei cu mitlamtling ka silo, Pathian hmai ah khakha cu ka palh deuh ko timi zong chim ding ka ngei. Aliamcia caan cu aliamcia caan asi ko cang. Ka konglam attialtu hna nih a chia an ttial ahcun achia in ka konglam an theih ko lai. Attha in an ttial ahcun attha in asi ko lai. Pumpak konglam cu tuanbia attialtu cungah aa hngat mi asi. Napolian zong a thatnak in an ttial atthatuk. Achiat in attialmi an um an ttialmi achiatuk.

Pumpak konglam cu kan tuanbia attialtu cungah aa hngatmi asi ko tiah a chim. Kanu nih aka chimh pengmi cu ka fale dawtnak lei hi ba hlah uh tiah aa kan ti peng e tiah a chim. Cun CNF he hin hmunkhat ah remte in kan um ko e tiah a chim rih. Salai Lungthlitum nih online in atthuat mi cungah a chimmi hrimhrim uar aum tuk hringhran.

Midang cu sihnaseh an i tuar kho lai lo i, lehnak an tuah hrimhrim ko lai timi hi chim khawh asi. Asinain Pu No Than Kap cu alungput uar a rak um tuk timi hmuh khawh asi. Ha caah Ha timi lehrulhnak hi zeihmanh san atlai lo. Lung THli Tum cu Lungthlitum asi ko. No Than Kap cu No Than Kap asi ko. Tlang cung kan kai ahcun thli atam deuhdeuh ko asi lo maw?

Miphun pakhat caah rianttuantu dingin kan i thok tikah dohtu an um lai. Cu dohtu le thangchiat soiseltu hmurka hmanh kan in khawh lo ahcun zeitindah asi ko lai. Amah belte cu chungkhar angeimi kan si tikah pumpak tuk hnursuan hi cu Keimah caah cun apoinak pakhat hmanh aum lo. Ka in khawhtuk. Nain chungkhar catu ah ai dawh deuh lo i a si ko. Lehrulhnak cu lehrulhnak asi i, san atlailo cucaah daitein umhi attha bik tiah a chim.

Cun Chin Capital City cu Falam ah tthial atimh timi kong zongah fiangtein a chim tthan rih. Keimah nawl in khuapi tthialnak nawl a um lo. A tthial lai an timi hi cu asi ko lomi thil asi. Falam nak in Hakha cu apawngkam asining khuapi caah attha deuh si tiah a chim rih. Achimmi tampi an um rih nain asau lai caah mah vialte in atawinak tein kan vun langhter tthan.

Tutan ah CNLD Chairman Pu No Than Kap nih interview ah a chimmi vialte in a sining zumhtlak pasalttha asining fiang tein hmuh le theih khawh asi. Lunghrinh ding pakhat taktak hmanh a um lo. Amah nak in milung thiang hi an um ti lai lo ti uhsihlaw kan palh lai lo dah. Alungput hi zumhtlak taktak mi asi. Adonghnak ah chim ka duhmi cu CNLD lutlai hna hi dirkamh phu lawngte an si timi hi ka chim duh. By Jacob Ceu

Be the first to comment

Leave a Reply

Your email address will not be published.


*