Si Bawi Lian Mang Hrang Nawl Hi Ka Rak Mawh Chiat Tuk

Laica hi Dr. Van Bik nih a hmasabik a lehmi Bible in a rel ka cawn, a ruang cu Kawl ah a tthangmi ka si caah Laitlang i tangli tiang an rak cawn ah kei ka cawng lo. Bible telh lo, Lai cauk ka rel hmasabikmi hi “Ka Zahpi Lo” timi a si. Cu cauk a ttialtu pa Hrang Nawl ttialmi cauk dang ka rak kawl lengmang nain ka rak hmu lo i ka khuaruah a rak har ngai. A ruang cu Kawl Wutthuh (Novel), Taing le Cartoon ka rak rel ngai cang tikah catialtu pakhat nih uk tampi an rak ttial caah a si.

Cu ti lung hngiar ngaiin ka um bu cun 2005-2013 hrawng tiang vawleicung Laimi i fun biaruahnak Laiforum, Rungcin le YCCF te hna ah Hrang Nawl kong an rak ttialmi ka hun rel, cun a kong “Mi roling Hrang Nawl” an hun chuah hnu ceo in Lenhlawi le a dang Lawki (vawlei) kong a ttial ti lo ka hun theih. Muko editor nih siizung i a ihkhun ah a va ton i bia an i ruahmi a ttialmi ka rel tikah ka rak mawhchiat ngaingai.

“Laimi nan van a chia tuk. Cauk ttha le theihnak tampi ttial ka rak itim nain ka piangthar (Jesus dawtnak ka thei) i mah vialte cu ka ttial ti lo,” ti phun khin Muko Editor cu a rak chimh. Nunphung, ca le holh cu Pathian nih miphun pakhat kan sinak ah a kan pekmi pei a si cu, ziah pianthar pat cun cu vialte Laimi mit a deiter i theih le hngalh a kauhter ding ca cu a ttial lo ka rak ti. Jesus Khrih Khrihfabu a rak dirh i Thawngttha lawnglawng cu “Zahpi loin” a rak chim an ti.

Tuni rian ka ttuan pah ah khua ka ruat; Pathian dawtnak ka hngalh i ka nunnak ah amah rian thiang ttuan le amah ca lawng ah nun ding ai semnak a sau tuk cang ttung, asinain nifa ka nunnak ah hi vawlei he ai pehtlaimi Politik, chawleh, le minung hna kong pei ka rel in ka ttialdeuh hi. Bawipa biatakdeuh in naih ning, Amah he i hawikomhnak ngeideuh ning ti kai zuam nain nitin ka tuahmi cu Online le Facebook i vawleicung mithang hna, thawngpang, politik le Bawipa Bia he ai ralchanmi lawngte ah pei ka lung a umdeuh i mah cu pawl caah pei caan ka dih ko hi timi kha fiang ngaiin A hun ka hmuhter.

A caan lio a si. Sihmanhsehlaw, nihin i zumtu le Pathian nih a kawhmi a rian thiang ttuantu hna nih Social Media ah, zatlang ah le pumpak nunnak ah Orhlei in Bible i tlaih in kehlei in Vawlei kan beng sual maw? Fiang tuk in ka nunnak ah A ka hmuhter, Bawi pahnih sal nan si kho lo! Pathian rianttuantu hna Pathian nih hman an duh ko hna. Paul nih cun “Ka nun cu Khrih lawnglawng a si cang,” a ti bantuk kha a si. USA ah Evangelists le Pastor tampi nih an ram thimnak le politik ah caan an pekdeuh cang tikah hlan bantuk in Khrih thawngttha a karh ti lo, a ruang cu Khrih thawngttha chim nakin an president an ven/aukanhdeuh (defence), Khrih le Khrihfa aukaan le ven ah an caan a dihdeuh cang. Laimi zumtu, Pathian rian thiang ttuanmi hna zong cu bantuk cu kan si lo ding a biapi tukmi a si.

Hrang Nawl ka rak mawhchiatmi kha ka rak mawh lo nain a kedan ka hun i denh i ka nunnak nih a teh ve tikah cun ka upat cang. A si hi teh, ka ti. Politik zong a tuah duh ti lo i vawlei he ai pehtlaimi thilri ah a caan a rak pe ti lo i a rianhmi Bawipa Jesus rian lawnglawng kha uktu chia lak le sifahnak chung zong ah zumhtlak tein a rak ttuan. – Mah hi zumtu vialte paoh caah ka chim duhmi a si lo, Bawipa nih a rianthiang ttuan ding hrim ah a kawhmi an um i hi vawlei le a mi hna pawcawm kawlhawlnak caah thluachuah a pekmi hna a dangte in an um ve ti cu ka zumh.

Pathian nih thluachuah in pe ko hna seh.

Crd,

Be the first to comment

Leave a Reply

Your email address will not be published.


*