SAYA VAN TUM NIH MIPI THEIH DING AH FIANG TEIN ARUANG ACHIM CANG

Party le thimnak ah a cuhmi minung kan ttanhning cio aruang theih awk.Atu tan US thimnak cu miphun dang le Laimi telh in atu tiang buai lulh cio a si rih ko. Aruang cu Trump nih ka sung cang a ti duh lo, tei a fahsak. Mah zawn ahhin Trump hi Laithluak Lai ruahnak a neimi a lo ve. Khrihfa biaknak cu a ttanhter ngaimi le a dawtter ngaimi a lo nan US mipi nih an thimmi Biden cu buai hnawh a timh cang.

Buainak fak piin chuahpi a tim cang. Bible nih a kan cawnpiakmi cu vawlei cungah daihnak le remnak le dawtnak a phurtu le a dirpi tu siding lawng a kan cawnpiak. Atu tan US thimnak hi buaiphu ngai a si ko. Aruang cu atu kan buaimi pawl hi Khrihfa kan biaknak le cawnpiaknak he tampi pehtlaihnak a neih ruangah a si. Refugee lak kongah kan buai lem lo I sipuazi kong zongah kan buai lem lo.

Fimcawnnak le ngandamnak kong zongah kan buai lem lo. Foodstamp a ei lengmang mi Laipawl zong foodstamp kongah an buai lem lo. Kan buaimi cu neihkhat umh, nauhrawh, Trump cu Khrihfa ttha a si lo pin ah a policy le a kalpi mi hi Khrihfa cawnpiaknak he a kalh, Biden nunzia dawh le a lungput le a policy cu Bible cawnpiaknak he a kaih/a tlak ti pawl ah kan buaimi hi a si. Adang zong tampi a um ko lai.

A poi ngaimi pakhat cu Trump a dirpi tu pawl nih hin Biden a ttanhtu pawl cu nu le nu, pa le pa umh nan lungtling ve I nauhrawh zong nan hna a tla ve tiah nan kan ruahmi hi a si. Mah ruahnak nan neihmi cu za ah za nan palh. A takte cun Biden a ttanhmi pawl nih hin neihkhat umh (same-sex marriage) hi kan pom hlei ve lo. Nauhrawh (abortion) zong kan pom hlei lo.

Biden kan duhnak le kan ttanhnak aruang tampi a um ve ko. Democratic party kan ttanhnak a ruang tampi a um ve ko. Biden a ttanhtu pawl karlak zongah kan ttanhning le kan duhning aruang a dang cio rih ko lai. Politics ahcun kan ttanhmi hna party le minung I an policy le an manifesto poah khi kan pom dih/kan duh dih/ kan lungtling dih tinak a si hlei lo. Party le minung cu Pathian an si lo tikah chambaunak tampi an nei cio ko hna lai.

US ah Republic party le Democratic party hi a nganbik an si tikah mah hna pahnih I an policy le an manifesto pawl kha kan zoh tti lai I cuai kan thlai tti hna lai. Cun president a cuh ding pawl I policy le manifesto zong cuai kan thlai tti hna lai/kan zoh tti hna lai. US ram cu zatuak 100 ah 70 tluk cu Khrihfa kan si tikah Khrihfa mit le cawnpiaknak in a cuh ding minung pawl I policy le manifesto cu zoh lengmang asi. Anmah minung pumpak tuanbia (history) zong zohchih lengmang a si I biaknak ah an fel maw fel lo ti zong zohchih an si fawn.

Mah hnu ah a cuhmi minung I a policy le a nun ziaza le a thiltuahmi pawl cu Khrihfa biaknak le cawnpiaknak ning in tamdeuh a kalmi poah kan thim ko hna lai/kan dirpi ko hna lai. Cu lawng silo, vawlei cung ramkip le minung kip caah san a tlai dingmi poah kan thim ko hna lai/kan ttanh hna lai.Pu Trump a duh lotu pawl nih a policy le a ziaza, a lungput le a thiltuahmi pawl hi kan duh lo I Khrihfa biaknak le cawnpiaknak he zong a kalh bak kan ti.

Amah Trump kongcu a dang tein ka rak ttial tthan te lai. “Trump bantuk lungput le ziaza a neimi Pathian nih a thim bel hna lo” ti tlangtar in ka rak ttial te lai. Biden a ttanhtu le a duhtu pawl karlak zongah I dannak a um cio ko lai. Biden le Democratic party cu an ruahnak a kau I miphun kip dawtnak an nei. Misifak miharsa bawmh an duh. An nun a nem fawn. Mipem le Refugee zawn zong an ruat fawn.

Ramdang he I pehtlaihnak ah remnak le daihnak an duh. Raldoh an duh lo. Buainak a um tik zongah cabuai cungah I ceihtti an duh. Biaknak dang zong an upat fawn. Minung le miphun kip hi Pathian muisam in sermi kan si zia an I fiang tuk. Nu le nu, pa le pa umh cu President hlun Obama nih a fehtermi a si. Democratic party nih fehter mi zong a si lo I an policy zong a si fawn lo. Nu le nu, pa le pa umh hi Biden he a san lo/a pehtlai lo.

Obama nih a fehter cangmi cu Trump zong nih a hrawk kho hlei lo. Obama le Trump, US president an ttuan hlan piin nu le nu, pa le pa umh cu a rak um diam cang/a ummi an rak tamtuk cang tihi philh hlah u sih. Trump zongnih neihkhat umh hi a do kho hlei lo I a hrawk kho hlei lo. Kawlram hmanh ah nu le nu, pa le pa a ummi le a duhmi an tam ngai cang khi, kan cozah nih a pom lo nan. Nauhrawh balte cu Democratic party an cohlan ko nan Republican party nih cun an duh ve lo/an pom ve lo.

Nan Trump a ttuan chung zongah nau a thatmi an um thiamthiam ko. A tlang piin Republican party hi raldoh duhmi an si. Raldoh le nauhrawh cu an ttha veve lo. Nan nauhrawhnak in raldoh cu tamtuk in a ttha lo deuh ti khawh a si. Raldohnak ah phaisa tamtuk a dih I ralkap tamtuk an thi. A thimi chungkhar nih ngaihchiatnak le lungfahnak an tuar. An va tukmi ram nih rawhralnak tamtuk an ton. Refugee an karh.

Minung tamtuk nunnak a liam. Raldohnak ruangah sifahnak a chuak. Raldoh ruangah hngakchia thinlung put a rawk dih. Raldoh ruangah sianginn zong an kai kho ti lo. Raldohnak nih thil ttha lo tampi a phun2 a chuahpi. Bible zong nih mi nunnak lak le mithah cu a duh lo. US ahhin Democratic party si hna seh Republican party sihna seh a ttanh I a dirpi tu vialte hna hi a tambik cu Khrihfa lawngte kan si ko hna.

Atak te cun US ram ahhin Republican party nak in Democratic party a ttanh deuhmi le a dirpi deuhmi milu an tamdeuh. Billionaire mirum, minta mintami, hlasak thiam, university tamdeuh, mifim minthang, biaknak hruaitu upa, mipem le refugee lak zongah a milu cun Democratic party a ttanhtu an tamdeuh zungzal ti khawh a si.Mah nunnak ah Khrihfa sinak hmuh awk um lem ttung lo I lenglei lawng in Khrihfa biaknak ttanh ngai zonghi pialsual/kalsual phunkhat a si ve.

Kanmah nih kan tuah lomi sualnak pakhat te fak piin doh I sualdang vialte hehtiah tuah fawn cu a tlamtling lomi/a chambau ngaimi Khrihfa dirhmun a si. Trump ttanhtu tampi nih nan I ruahnak ahcun Trump nan ttanh thawng in Khrihfa ttha deuh le piangthar deuh kan si nan I ti men lai. Nan nan rak si hlei nemmam lo. Atak te cun mah nunnak ah Khrihfa nun ziaza dawh um hleng ttung lo I a ttanh lawng hi ttanh hi a phungcaang men Khrihfa pawl le a min men Khrihfa le Khrihfa thathu pawl riandeuh a si.

Trump ttanhtu pawl nih Bible nan relning le nan I fiang ninghi nan palh. Trump a ttanhmi Khrihfa pawl hi ruahnak bituk in a kalmi nan si, Khrihfa biaknak le cawnpiaknak I a muisam le a sullam nan hrawh I nan bitter tuk. Biden le Democratic party a ttanhtu pawl cu kan ruahnak a kau deuh I Khrihfa biaknak le cawnpiaknak hi kaupi in kan kalpi a tak zong in kan nunnak ah kan hmang/a muisam le a sullam zong kan dawhter.

Bible nih Khrihfa a ttanhmi le a dawmi lawng nan dawt hna lai a tinak a um lo. Khrihfa mi ca I rian a ttuanmi lawng ttanh ding le dawt ding ti zong a kan cawnpiak fawn lo. Atak te cun Bawi Jesuh nih kan ral dawt ding a kan fial lehlam. Kan ral caah thilttha tuah ding tuk a kan cawnpiak. Trump ttanhtu pawl nan ruahnak le nan duhnak cu Khrihfa mi lawng hmunkhat I um I Khrihfa a si lomi poah hmundang te um ding tiphun khi nan saduhthah a si.

Cu bantuk ruahnak cu Bawi Jesuh I a mission rian zong a si lo. Khrihfa a si lomi nih zeitluk an tuar zongah kan zei a poi lo tiphun khi nan ruahnak a si. Kanmah kan him ahcun a za tiphun. Trump le a ttanhtu pawl nih nu le nu, pa le pa umh, le nauhrawh hi nan do kho hlei lo I nan zorter kho hlei lo. A dohdan zong nan thiam fawn lo. Zu, neihkhat umh, ritthaisii ti bantuk pawl hi tlau ko in dohkhawh phun an si lo. A luancia kum 1920-1930 hrawngah, US ram ah biatak tein zu an rak doh nan nihin ah zoh ko uh law US ram ah zu dawr a tamning le zuding mi an tamning hi nan I fiang ko lai.

Mah lioah inn pakhat an rak sakmi le bang cu atang dot ah zu thuhnak/chiahnak khan an ser I mah ka cun zu thawl tamtuk an thuh hna. Mah cu naite lawngah an hmuh (VOA Burmese News: 12/29/2020). Mizo kan unau zongnih ritthaisii le zu hehtiah an doh len nan zeihmanh a hlei lo/amah ningkel a siko. Ritthaisii an dohnak ah an YMA zong nih minung tiang an thah hna. Nan, zu le ritthaisii cu zorlei a panh hlei lo Mizoram ah. Nawlneihnak le thazaang hmang in mah bantuk thilttha lo le sualnak hi doh khawh an si lo timi hi Khrihfa tampi nih nan I fiang tawn lo.

Ka ttial te lai tiah ka ruahmi cu “Trump ttanhtu Khrihfa pawl nih sualnak dohdan an I palh/sualnak doh ningcang an thiam lo/sualnak an doh ninghi Bible he a kalh” ti hi a si.Trump nih Khrihfa a kan dawt I a kan dirpi nan ti ruangah nan ttanhmi nih khin US Khrihfa pawl caah zeital a miak le a tthathnemnak a chuahpi mi a um maw in ti hna uh sih law zei ngai chim ding nan nei lai lo/nan thei lai lo, a fiang ko. Trump nan ttanhnak ruangah nan Khrihfa nun ziaza a rawk dih cang.

Nu le nu, pa le pa umh, le nauhrawh kan doh nan tinak ah sualnak ngan a dang tamtuk nan tuah cang. Mittanh dan zong nan thiam fawn lo. Trump ttanhtu pawl tamdeuh cu Trump nan ttanhning phun hi zoh tik ah ISIS misual pawl nih Muslim ram kan dirh lai an ti bantuk phun he a lo/a khat bak. Trump a ttanhtu pawl nih cun Khrihfa ca le US ram ca lawng in nan ruat lai nan Biden a ttanhtu pawl nih cun vawlei cung pumpi zate ca le biaknak kip ca ruat in kan ttanh lai.

Bawi Jesuh I a kan cahtak bantuk in miphun kip kha Bawi Zisuh hnuzultu ah ser kan timh hna I vawlei cung khua zakip ah Pathian tehte ttha si kan I tim/kan si fawn. Trump nih Khrihfa caah a tuahmi cu US embassy cu Jerusalem khuapi ah a tthial I Jerusalem cu Israel ram khualipi ah a fehter I cu lawng cu a tuah khawhmi a si ko. Mahcu Pathian duhnak he a kalh. Pathian le Khrihfa caah santlaihnak zong a nei hlei lo. Zei ngai santlaihnak a um hlei lo ti khawh a si.

Trump nih hi hnu US president kum 30/40 hmanh ttuan seh law nu le nu, pa le pa umh, le nauhrawh zong a zorter kho hlei lai lo. Amah ning si ko lai. Aruang cu Trump le a ttanhtu Khrihfa pawl nih sualnak dohdan nan thiam lo. Bible nan rel tthan I Bawi Zisuh nih sualnak a dohning cang zong nan rel tthan a hau lai. A biapi mi cu kanmah nih kan tuah lo kha a biapi ko I kan pawngkam a ummi pawl zong kha tuah lo ding in kan cawnpiak hna ding kha a biapi mi asi ko. Khrihfa mi nih cozah le uktu/ram hruaitu hmang in sualnak doh phung a si lo.Kum 2021 nih a chuahpi dingmi daihnak, remnak, dinnak, luatnak, ruahchannak, le dawtnak vialte nan cungah um ko seh.Amen. Credit: Van Tum

Be the first to comment

Leave a Reply

Your email address will not be published.


*