SALAI VAN DAWT LIAN:KUM 5 CHUNG NLD RUANGAH CHINRAM KHRIHFA AN ZOR

Zumh ti bak lo dingmi NLD Party/ Kawl ram party vialte lakah NLD lawng nih 2008 Phunghram athlen khawh lai (or) 2008 Phunghram a remhkho tu ding cu NLD lawng asi timi hi lih taktak asi. Hluttaw ah Majority an si lio cozah kum 5 an tlaih chung hmanh ah a pelte hmanh an thlen khawh lo mi cu ram mipi mithmuh kuttongh asi pinah cu Phunghram thlennak dingah NLD MP lila anmah le anmah hmanh hluttaw meeting ah an ruahnak aa cheu dih.

Election lai poah ah mipi vote hmuhnak menmen ah an chim sawhsawh mi zumh awk ttha ti lomi lih bia asi. 2020 election ah ahcun 2015 lio bantukin teinak a hmu ti lai lo.NLD nih Federal ram kan ser lai timi hi an kaa chungah le an dictionary chungah cun a um ko nain an policy taktak ah a um hrimhrim lo, tlangcung mi akan dehhlen nak bia ttihnung taktakmi asi.

Election lai ah political bargaining an tuahnak mutthai tom asi. Kawl mi nih tlangcungmi ankan foih khawh tawnnak cu federal timi biafang hin asi caah federal biafang an hman poh ahcun hlennak bia asi ti theih colh ding asi.Election lai poh ah federal kong an chim nan theih lengmang lai. Aruang cu kawl nih federal an khel lo, tlangcungmi lawng nih kan khelmi asi caah asi.

A ngaingai te tiah NLD nih Federal hi duh taktak sehlaw cozah an tlaih cangkaa 2015 bakin NCA peace process cu luhlinh ten akalpi colh hnga hi kum 5 chungah ahcun 80-90% atlamtling cang ding khi asi.Chin Ram le Miphun caah kum 32 chung an nunnak thap in dothlennak atuahmi CNF kan nupa hna zong NLD nih cozah an tlaih chung 2015-2020 kar ah an zaalong lo.

An mipi he bia lungduh an iruah kho ti lo. Kawl nih an firmi an laak tthanmi kan ni sunglawi Chin National Day koko hmanh ah NLD nih biachim a onh hna lo. Apoi ngaingai. Kan ram ciacia chinram ah kawl nih ram ngeitu CNF cu mikhual tuah in akan tuah. Kawl NLD nih chin mipi tthek dih le vaivuanh dih akan timh. Biaknak lei ah Buddhist cu inntek ah an iruat in Khrihfa cu khual akan can ter.

Kan ram ciacia ah kawl nih nam in akan sawh i thingtan in akan tuk nakin a thi mi kan tlawm ti lo. NLD chan ah Kan far le an tleihhremmi hna an tam chinchin.Cozah le mipi kar ipehtlaihnak a hlat ter tu cu NLD hi asi. Mipi hmunhma le inn le lo asi ningin tein hal le a ngeitu hna lunglawmhter timh loin hruhru hranghrang in a thlehboh piak hna tikah kan khualipi Hakha ah mithli tam tuk aluang i mi tamtuk an ai hram.

Hakha khuathar pupa thlanhmun zong khua nu pa chimh ta hmasat loin NLD nih a hrawh piak dih hna tikah zeitik hmanh ah philh khawh ti lo dingmi tuanbia dawh lo asi. Eihmuar le Ziknawh kan doh lai tiah ASSK pumpaak hrimhrim nih 2015 election lai ah siseh, election hnu ah siseh faak ngai in a au. Asinain NLD cozah chan 2015-2020 kum 5 chung zoh tikah eihmuar a tam cem kum asi. 2010-2015 USDP chan nak hmanh in a tam deuh suamau.

Cozah rian soknak ah ziknawh a pe kho lomi cu rian an pe duh hlei hna lo. Central Cozah bawmhnak budget tiang zong a tingco tu hna khua sin a phak tikah cun a cheu bang lawng a phanh tam. A bikin chinram NLD an MP hrimhrim cu Eihmuar nak kha hmai ah a chia mi lawngte an si caah kan ram caah rinh awktlak le bochan awk tlak pakhat hmanh an um lonak kong an hruaitu pa tiang nih mipi theih in a chim cangmi asi.

Kawlram chung MP zatuak kan zoh tikah ram le miphun caah santlaihnak a ngei lomi MP an tam cemnak cu NLD ah asi. Cucaah tuah an duhmi an tuah kho tawn lo. An chim cia an philh colh lengmang caah election lai poh ah eihmuar kan doh an timi zong an philh colh tawn i anmah lila eihmuar a tuahtu an can tthan tawnnak asi.

Cucaah zumh awk a tlak lomi NLD MP candidate pawl vote ve pek ding cu a hrutmi dah lo nih cun an pe ti hna lai lo. NLD nih cozah an tlaih hnu ah Chin ram ah khrihfa biaknak zalennak a zor i Buddhist zalonnak tu a karh. CBC nih chin mipi lungrualnak caah a tuahmi Mindat ah tonnak zong NLD nih hramhram in a khar ter hna. Chin mipi lungrualnak caah biaknak lei hruaitu vialte, ramkhel hruaitu, dothleng tu hna, mifim thiamsang, iton in khuakhan tti ding cu kawl party NLD nih a duh lo.

Fiang ko in chim ahcun chin mipi lungkhat in kan dirtti ding, Pathian kan thangtthat tti ding cu attih bakin an ttih timi alang ngaingai. NLD nih kum 5 cozah an tlaih chungah Chin ram ah Khrihfa milu a zor i Buddhist milu akarh. Vailam a tlau i pura le milem akarh. Lungfah awk ngai ding kan si. Kan ram ciacia ah khual kan si ko lo.Credit: Salai Van Dawt Lian

Be the first to comment

Leave a Reply

Your email address will not be published.


*