SALAI LIAN LUAI NIH KUM 5 CHUNG AH AHAR BIKMI A CHIM

Chin ramkulh cozah kum 5 chung kan i hruainak ah sangthar samh mi hi tuan a har cem: Salai Lian Luai. Chin ramkulh cozah kum 5 chung kan i hruaikainak i kan tuah ttuanmi chungah Sangthar samh mi (Town plan) kong hi tuan a har cemmi le tleih a har cemmi asi tiah Chin ramkulh Minister Salai Lian Luai nih a chim.

Kum nga chung kan i hruainak ah hin harnak kan tonmi tampi a um. Cu harnak kan tonmi chungah ahar khun tiah ka ruah mi le ka tonmi pakhat a um. Cucu zeidang siloin Hakha sangthar samhmi kongah hin a si. Hakha cu Chin ramkulh chung i, kan khuapi a si.Kan khuapi a si caah khuadang le hmundang ramdang hna nih zohchun awktlak serding ah rian kan ngei.

Hi asi caah sangthar hi kan samhnak zong asi. Hi sangthar kan samhnak ah khuanu khuapa lei sin ah nawlharnak le bia i ruahnak tete zong kan ngei ko. Nain kan vun tuan taktak tikah khuanu khuapa lei in soiselnak le thangchiatnak lawngte a chuah tik ah ahar khun ko tiah Salai Lian Luai nih a chim.

Cun Cozah lei kap nih Upadi ning loin hmun le hma kan chunh mi a um lo. Khuanu khuapa hna sin ah ruahnak halta le bia i ruah ta hnu ah kan tuah ttuanmi asi tiah Salai Lian Luai nih a chimchap. NLD party Chin ramkulh cozah i, kum nga chung an hruainak ah Falam peng Sangli samh tthennak ding caah vawlei hmun Area a thongleng timh a si.

Cun Hakha ah Vawlei hmun Area 676 zong mizapi sin ah an pek i, minung 400 nih camhcawhfung an i zuh i, an zuarh hna tiah kan theih. Chin Minister Salai Lian Luai hi kum 2020 Myanmar ram thimnak ah Falam peng NLD ramkulh No 2 in aa zuam tthan lai tiah thawng kan theih. By. Salai Tluangte (The Hakha Post Vol 15 No.59 )