Salai Bawi Lian Mang September 18 Hi Ka Caah A biapi Tuk Mi Ni A Si

SEPTEMBER 18,September 18 hi ka caah a biapi mi ni asi. Keimah he chan ai rual mi mitampi ca zong ah philh awk a tha lo mi ni asi ve hrimhrim lai.Zeica tiah 1988 September 18 ni ah General Saw Maung le Brigadier Khin Ngunt nih hruai mi kawl ralkap (Ba-Mah-Tat-Ma-Ttaw) nih Ne Win hruaimi Socialist cozah sin in uk nak an lak ni asi.1987 September i Ne Win nih phaisa a rak thah ka in Chin Sianghlerun sianghngakchia nih Socialist cozah kan rak doh lengmang mi cu, 1988 ah cun ram pumpi democracy cawlcangh nak ah a vun i cang.

Cu 1988 democracy cawlcangh nak nih cun hruaitu thar tampi a chuah pi hna.
Pi Suu Kyi zong kum tampi hnu ah ram dang in Burma ah a rak kir i Burma Democracy cawlcangh nak ah hruitu hmai suang ah a vun i chuah.Vawlei cung ah a um ballo mi sianghngakchia nih dirh mi dothlengbu All Burma Student Democratic Front (ABSDF) zong a hung dir.

Union of Burma ram i politics lohma um tu ning phundang pi in a vun I mersan.
Keimah pumpak zong ralkap nih uknak an lak hnu in ram ri ka phan.CNF ah ka lut.CNA ah ralkap ah kai cang. Kachin ram ka phan. Karen ram ka phan, Mon ram zong ka phan, Shan ram, Karenni ram le Naga tlangsang tiang ka cul. Hi vialte ka kal nak ah an khua pi chung pakhat hmanh pal lo in ramtang lawngte in ka/n kal.

Cauk le cafung karak sanh tawn nak ka zal cu zenthong sanh nak ah ai cang.
Zal ka rak bei tawn nak ka liang cu meithal bei nak ah ai cang.Siangin khan chung i ca karak cawn tawn mi kha, fing le tlang kip, horkhuang thuk hna le nelrawl hna cu thih le nun ri nun cawn nak hmun ah an cang.Mi phun kip ka ton hna. Hruaitu tha tam pi ka ton hna. Mi depde tampi zong ka ton hna.

Mi raltha tampi zong ka ton hna, Ka lawng chim thiam ka daak pawl zong ka ton thiamthiam hna.Rian tuan pi hawi “comrade” caah mah zawn ruat lo thih ngamh pasal tha le nusal tha tampi zong ka ton hna.1988 Rangoon Sianghleirun lam kan rak zawh lio ah khan Democracy le Human Rights caah kan rak au.Thantlang i lam kan rak zawh lio zong ah democracy le human rights thiamthiam kan rak au.

Ramtang i hriamnam kai tlaih zong ah democracy le human rights ca thiamthiam.
Ramkip ka phak hnu cozah kip sin, Washington DC, London, Ottawa, Brussels zong ah democracy le human rights ca thiamthiam.New York le Geneva i vawlei cung pumpi hmai UN zong ah democracy le Human rights theu cu chim rel peng asi ko.A tu zong democracy le human rights lam thiamthiam cu ka zul peng ko.Kumpi kum 28 hi a sau ngai. A si na in a liam cia thil a cang mi tete vun ruah than ah hin nizan tihni a cang mi thil a lo mi tete le thinlung i a thar mi tete an um lengmang.Rak ton lio i a har bik mi hmanh khi a hnu vun ruah than ah cun thluachuah lawngte an si.1994 tiang ah Marnepalaw, KNU an hmunlipi hi Burma ram dothlennak hmunlipi a rak si. Mah cu hmanthlak tlawmpal ka vun tar. mah cabia hi Salai bawi lian mang nih a tial mi si i kan hrawmh ve hna.

Crd Salai Bawi Lian Mang

Be the first to comment

Leave a Reply

Your email address will not be published.


*