RELCIO UH, CHINRAM CM CAAH CUN A TLINH DIH KO HIH, AI TLAK BAK

Chin Ramkulh CM Ttuan Dingah Aa Tlakmi: A tu term cu Halkha nih CM ttuan caan a si ko cang ka ti dawh dawh in Pyine hluatdaw pawl an thimmi hna an konglam ka theih tawk ka hlathlai hnu ah Halkha in NLD in thimmi Sonny Thang Cung nih hin CM ca ding a tlinh cem ti in ka hmuh. A tanglei hi rel ve hmanh,

Pakhatnak, Sonny Thang Cung hi thlanglei Laitlang a ceu tertu hmasa bik mithi zipeng bawipa F. Za Hoe fa pa a si. Pahnihnak, A mah hi upadi lei LL.B a awng i Chin ramkulh upadi zung bak ah lutlai director can saupi a ttuanmi a si. Pathumnak, NLD cozah nih an zumh i Pension a laak hnu ah a tu Atony General of Chin State ah ttuanvo an peek i a tu a ttuan liomi a si.

Palinak, A mah hi miding, mifel a si i Acozah rian a ttuannaak zong ah min tthatnaak a tu le a tu a hmumi a si. Panganak, Chin miphun hunchonaak caah fim cawnnaak, pehtlaihnaak lam le sul sersiam lawng hi si lo in zuu le sa nih a hrawhmi mino hna kilven le hun cho ter hi ka duh ngaingai a timi a si zungzal.

Paruknak, Kan Chin ram huncho khawhnaak caah dawn tu pakhat cu ei hmuarnaak hi a si ve hrimhrim a ti tawnmi a si ca ah ei hmuarnaak hi a doh hrimhrim lai tiah ka zumh. Pasarihnak, A mah hi Khrihfa ttha PATHIAN aa bochanmi pakhat a si. Cu ca ah Sonny Thang Cung nih hin Chin State C M ttuan ding ah a tlinh bik i aa tlaak bik bak a si tiah ka zumh. By JP Biak Tin Sang

US Kong relchih: US Election 2020, Trump Nih Hnahnawh Apek Len Bu Ko Zongah Georgia I, Vote Reltthannak An Tuahmi Ah Biden Nih Atei Thiamthiam. Trump a mithi lalaang pawl nih Trump a sunghmi cohlanpiak duh lo in state 3 ah tazacuainak an tuah ko bu zongah cun, Georgia i vote relthannak an tuahmi ah Biden cu buanco a si, tiin fehter a si thiamthiam ko. State law nih a tuahter hna ning tein vote relthannak an tuah i, vote 12,284 in Biden nih Trump a tei, tiah fehter a si cang. Tei lai lo hi Trump nih ai theihtuk ko. Cucaah, a tuah hnga rian a tuah duh lo,” tiin Biden nih a chim. January i avoi 46nak US President tuanvo lak dingin Biden cu an timhlamh lio pi a si. Public vote in Biden nih Trump hi 5.9 million tluk tam in a thlau, a hleih.

President tuan khawhnak lam lai a reltu Electoral College (270) ah Biden nih 306 a hmuh i, Trump nih 232 a hmuh. Georgia Ah Zeidah Acang? Kut bakin vote relthannak kan tuahmi nih Georgia i cuhlan Biden a dirhmun a hnursuang kho hlei lo, tiah state secretary Brad Raffensperger nih Thursday ah khan a chim. Tutan i Georgia pumpi culin vote relthannak tuah hi Georgia tuanbia chungah avoikhatnak bak a si i, paper ballot voting system an hmanmi nih in an vote vialte hi thatein a rel hnu ah a phichuak a thanh hi a si,” tiah Georgia Secretary of State Brad Raffensperger, Republican, nih a chim. Kan county pawl an i zuamnak thawngin le caan tawite chungah khulrangtein tuanvo lim kho dingin kan state election officials pawl thazaang an chuah khawh ruangah a tu bantukin tlamtlingtein rian kan tuan khawhmi hi a si,” tiin Raffensperger nih a chim.

Georgia chungum county kip i vote thlak ai palhmi hi 0.73% hrawnghrang lawng an si cio i, Biden le Trump an i thlau ning cu 0.5% tiang a si. Election results cu Friday ah khin namhnehnak tuah a si lai. Kan zumh cia ningtein vote relthannak an tuah taktak. Phungninglo in thlakmi (illegal) ballots an relchih,” tiin tehte um lo piin Trump campaign senior legal adviser Jenna Ellis nih a chim. Minung kut theng tein vote relthannak nan tuah tikah nan i hmaithlakbik dingmi thil pakhat a si mi cu, vote catlap (ballot) cung i na hmuhmi thil (min le ai dehmi tete) le computer nih a langhtermi ai khat le khat lo, ti a hi a si,” tiah Georgia voting system manager Gabriel Sterling, Republican, nih CNN ah a chim. Minung thengte nih zohfelnak an tuahnak a ruang cu, nan theih bangin, sehthilri nih hin vote hi a thlennawn khawh, asiloah a nawnnok khawh, asiloah pakhatkhat a tuah tawn.

Asinain, Georgia ah cun cu bantuk cu a um lo. A um lo zia tehte kan langhter ko cang,” tiah Sterling nih a chim. Tutan zarh i vote relthannak an tuah mi ah vote 6,000 dengmang hmuh chap an si. Hihi fir bia a si lo i, ninung nih kan i palh sual mi in a cang sualmi a si, tiah Sterling nih a chim. Hi kong he pehtlaiin, Floyd County officials nih election manager a rian in an phuah lawlaw, tiah media nih an chim. Biden Nih Zeidah Achim? Online in Republican le Democrats governors pawl he meeting a tuah hnu ah, Biden nih virus kong a chim. Trump a lung a thumh duh lo nak kong Biden an hal i, hi ti hin a leh hna. “Democrasy phung le lam kongah vawleicung mipi sinah President i a lung a thumh duh lonak nih hin rawhralnak thawng faaktuk in a thanh bantuk a si cang.

Cucaah cun, American president tuanbia chungah a rian ai tlinh lo bikmi president pakhat ah theihpeng a si ve cang lai,” tiin Biden nih a chim. Hi mipa nih zei ko dah khua a ruah, ti hi theih a har ngaingai. A thil tuahmi hi a ing lawng a puang ko cang,” tiah Biden nih a chim. Election result hi phungning te a si ko, tiah a tamdeuh kan mipi nih an cohlan mi a si,” tiah Biden nih a chim. Republican Senator Mitt Romney nih Biden bia hrawm in twitter ah ca a thlah colh ve. Vote dehhlennak kongah zeibantuk baiceihzung hmaka hmanh ah cohlanpiak awk tlak ngaingai Trump nih a chuahpi mi a um lo tikah, election a khutthal leh duh in le mipi an lung vaivonhter dingin state kip le local officials pawl a au hnawh hna” tiin Romney nih a tial. American President a tuan lio mi pakhat nih chiakhatuk in le Democracy muisam a kenglo mi tuahsernak a kalpi mi hi lung lei khi a piang lo, tiin a tial.

Tazacuaimi Hi Zeiko Dah An Si? Georgia, Arizona le Pennsylvania ah cun Trump mipi pawl nih tazacuainak an kalpi mi an hlawh a tling kho lo. A ra lai mi Friday i election results namhnehnak tuah an timh cang. Republicans pawl nih tuah lo dingin kham an i timh caah tazacuainak an kalpi. Asinain Georgia baiceihzung nih an hnonpiak hna. Ni kum tein khan biachahnak a tuahtu biaceihbawi cungah Trump a lung a rawk bal cang. Arizona ah cun Maricopa County ah a thar in vote relthannak (avoihnihnak) tuah than dingin state Republican Party nih an hal ko nain biaceihbawi nih a hnonpiak hna. Hi County hi state khualipi Phoenix pawngte ah a ummi a si.Pennsylvania ah cun Post Office in a phanmi vote 2,000 lenglo cohlan lo dingin Trump campaign nih an halmi cu biaceihzung nih a hnonpiak hna.

Vote an fir, tiin hrih le hram ngei lo piin Thursday i biachimnak an ngeih lio ah Trump a sihni Rudy Giuliani nih a chim. Trump team pawl nih tazacuainak an tuah mi an hlawh tlinglo, tiin thawngpang a thangmi kongah a thin a hung i, “media pawl nih hin luantuk lehpek in Trump an huatnak rumro an langhter,” tiin a chim. Michigan i tazacuainak kan tuahmi lawng a tang cang. Cucaah hi tazacuainak hi kan let than lawlaw cang lai. A biapimi county pakhat ah vote result nemhnehnak tuah lo dingin kan kham ko cang, tiin a chim. Kan county i result namhnehnak Republcain member 2 nih an khammi hi sullam a ngeih lo caah, namhnehnak tuah dingin kan i timhlamh ning tein kan kalpi ko lai,” tiah Wayne County’s canvassing board nih an chim.

Vote namhnehnak an tuah hnu pi ah khin, “Buanco ka si a fiang khawhnak dingah cawlcang ko,” tiin Trump nih pumpaak in a Republican nu pakhat a hei chonh. W County ah Biden nih tamlak in a tei i, Michigan pumpi ah hin Biden nih 146,000 hrawngin Trump hi a lonh, tiah official in cohlan a si theng rih lo mi result pakhat nih a langhter. Trump I A Nehnung Cawlcanghnak Hi Zeidah Asi Tthan Rih Lai? Media tampi nih an zumhmi cu, votepetu pawl duhthimnak merhpiak kho dingin (the choice of voters), key states ah a ummi a Republican hawitha state legislatures pawl hi ai sawm hna lai. Cun, amah a dirkamhtu deuh dingah a ruahmi hna US Electoral College memebers pawl a vun i thim te hna lai. Friday ah khin White House ah tonnak ngei dingin Michigan’s Republican lawmakers pawl a sawm cang hna.

Khi tikah khin tactics ai thlenmi a lang te kho men, tiah ruah a si. US hi democratic in ai hruaimi a si. Popular vote a tei theng lo zongah, president pakhat nih hin state pakhat kip ah an pekmi vote mark a tam u a tei hrimhrim a hau. State tamdeuh nih cun popular vote ah teinak a hmumi zulh in vote an pek ve. Asinain, state nih duhthimnak a tuah khawh lo ah cun, statehouse legislators nih electors thim khawhnak nawl ai ngeih ve lai, tiah federal law nih a chim. Vote firnak kong tehte a langhter khawh rih lo caah le million tamtuk nih vote an thlakchia mi vun hnonpiak a si tikah mipi thinhunnak a chuak ding a si caah, caan rauh dawhdang cu a si ko rih. Trump nih hin legislators (policebawi) pawl pumhkhomh ai timh lio pi a si,” tiin source pakhat nih a langhtermi cu Reuters news agency nih a langhter chin.Legislature nih electors thimnak a tuah lai” tiimi cu a um taktak lai lo,” tiin tutan zarh thokka i White House lei a kalmi Michigan lawmaker Mike Shirkey nih a chim. Credit: Chelsea Bawi.

Be the first to comment

Leave a Reply

Your email address will not be published.


*