RAM BUAI DIRHMUN IN CHIN MIPHUN LE RAM KILKAMTU CHIN FEDERAL A COZAH..

Tulio Ram Buai Dirhmun In Chin Miphun Le Ram Kilkamtu Chin Federal Acozah Dirh Khawh Asi Hnga Lo Maw?2005 April 17 ah Sao Hkam Hpa (Kawlram President hmasabik Sao Shwe Thaike a fapa upa bik) le Shan ramkhel riantuan pawl nih Interim Shan Government (ISG) an dirh i Shanram kha “Federated Shan State” (FSS) tiah vawlei pi theihin an rak thanh. Cu lio cu ralkhap cozah nih 2008 phunghrampi ser dingah “National Convention” (NC) a rak auh lio asi.

May 2004 ah NC hi an rak auh cang. Ralkap cozah nih tuahmi NC in a chuak dingmi phunghrampi kha Shan mipi le politician pawl nih an duh lo. NC zongah tel an duh lo caah ramkhel hruaitu minung pa 7 bak an rak tlaih hna. Hruaitu pawl an thlaih hna tlawmpal ah ISG an dirh i Shanram kha independence FSS ram asi cang tiah vawleipi theih in an thanh.

Cu nih Shan ramkhel hruaitu pawl an pical nak le an raltthatnak tampi khi a lannghter lawng siloin Federal or Self-determination kan ti lengmang mi mah tein khuakhan lairelnak hi Kawl cozah le Kawlmi nih pek te ding tiang hngah ding asi lo ti kha fiang tein an langhter khawh.February 1 ah ralkap nih rampi nawlngeihnak kha hriamnam hmangin hramhram in a lak. Mipi nih ralkap uknak duh lo ruangah CDM tuah cuahmah asi.

CDM cawlcanghnak ruangah ralkap cozah fek tein a dir kho ti lo. Kawlram pumpi thla 2 deng cozah loin kan um cang ti khawh asi. Committee Representing Pyidaungsu Hluttaw (CRPH) an hun dirh. Nain CRPH kan zoh set tikah NLD le Kawlmi rim deuh kha an nam. UN Special Rapporteur Yanghee Lee pumpak nih CRPH cu NLD deuh asi i inclusive asi lo caah UN nih Kawlrampi a aiawh khomi cozah takah cohlan dingin lam ahar deuh tiah a chim.

Nain 2008 phunghrampi ning tein tuahmi thimnak ah teinak a hmumi party an si caah 2008 phunghrampi nih a pekmi nawlngeihnak “legitimacy” cu an ngei ve. Nain tlangcung miphun cu an kan aiawh kan ti kho hna lo. Atu Kawlram kan zoh tikah fek tein a dir kho ti lomi cozah le ram “dysfunctional state or failed state” dirhmun kan phan ti khawh asi.Hi dirhmun ah a biapi ngaingai in ka ruahmi cu a fekmi cozah le ram dirh hi asi.

Ralkap uknak kan duh lo. CRPH zong kan rinh kho fawn hna lo. Nain kan ram zohkhen a herh i kan miphun kilkam a herh bik caan asi. Cu ruangah kan mah tein Acozah ser khawh ding kan ni zuam a hau. A herh ahcun Shan nih an rak tuah bantuk in “Interim Chin State Government” (ICSG) dirhin “Federated Chin State” (FCS) tiah Kawlrampi le vawleipi theih in thanh (declare) kan tuah khawh ve ding hi asi.

CNF, CNLD, NLD (Chin MPs), ZCD vialte khomh in ICSG cozah hna ser khawh asi. ICSG nih a herh ningin Chin miphun caah khuakhan tawlrelnak a tuah ko hnga. Chinram hruainak phunghrampi (Chin State Constitution) zong kan ngei cia asi ko. CRPH le ralkap nih Chin miphun he tonbiaruah duh zongah ICSG nih a aiawh khawh hnga. A tu ah CRPH nih tlangcungmi kan chonh hna lai ati zongah Chinmi ai a awh kho tak ding buu le hruaitu kan ngei hna lo.

Ruah awk khi a um ngai. Ramkhel lei in Chin miphun dih lak a kan aiawh kho tu ding political institution pakhat cu kan herh hrim. Cu bangtuk political institution pakhat sernak dingah a tu hi caanttha bik asi. Hi bantuk caanttha hi hmailei kan ngah tthan lai ti awk chim a har ngai. Cun ni hin kan dirhmun zoh tikah Chin miphun le Chinram a kilveng ding cozah asiloah buu pakhat kan herh hrimhrim. Kawl ralkap le cozah nih “tuah uh” ti hnu lawngah a cawl menmen ding miphun kan si lo ti lannghter dingah atu kan dirhmun hi caanttha bik asi ko in a lang. Credit: Rual Lian Thang

Be the first to comment

Leave a Reply

Your email address will not be published.


*