PU LAI KUNG USA INDIANA AH A UMMI A NUN A TTAP RUANGMANG EE

Tuchun cu ka nun a ttap:Vawlei hmun ka kip in aa tthenmi CHINMI le kan ram chung CHINMI chung in tu lio zawtnak ruang ah thih le loh nihin tiang kan ton hraw lo caah kan Pathian a min thangtthat in um ko seh. WHO le kan umnak ram cio hruaitu hna thawng thanhning le kanmah le ti khawhning cio te in iralrin cio kan si bang,

LAIMI tampi kan umnak Indiana state zong thaizing kip in cun khar cikcek asi lai caah tiah ka fa le eidin ding tete le BBQ hna ka dangh tuah hna lai tiah zinglei 11:30 am in kaa chawk i, zanlei 2:30pm ah inn ka phan tthan. Chun nitlak bia kaa halmi cu inn ngei lo veterans kutdawh pawl hi khoikadah an um hnga timi nih ka nun a ttahter.

Walmart phak lai ah minak veteran pakhat, county line le Madison aa tonnak ah pakhat, le Tomson le Madison aa tonnak ah pakhat ti in kaa chawk tinte ka hmuh ton hna. Keimah lawng kaa chawk ah cun zeimawchel ah cun ka lanhtak ton hna i, ka fapa he kan kal ah cun ka pa ka hmuhmi na hmuh ve maw? ti le tuah awk na ngeih tiah a ka ti tonmi te kha tuchun an mui a de ti lo. Ka ngaihchiat ka celh hrim lo na in kawl awk an ttha ti lo.

America ah kanmah pawl hi sifakbik lei kan si na in inn tang te ah thli lum le thli kik chuahter khawhmi inn te ah kan um hna i, $ a thong dih in tirawl kanmah le tikhawh tawk te in kan i zalh hna i, hihi minung lei kan ti khawh tawkte cu asi ko. Sihmanhsehlaw hi hna hi ho nih dah a cawm hna lai i, thingtang le lungkua tang ruun rep lo ah thilpuan ttha hmanh ngeih lo in zei caan tiang ko dah nithla an rel te hnga ti ka ruat.

Zu le va hmanh rawl lo in a chiah lotu kan Pathian tal nih zohkhenh hram hna seh ti hi ka saduhthah le ka thlacamnak asi. Kut dawh dirhmun hi kanmah duhthim kan thiam lo ruang ah a chuakmi le ti awk theih lo thihnak in nun a ttha deuh tiah mi hmaikhap lo in hal dirhmun a phanmi hna an um. Azei bantuk ruang zong ah va si ko sehlaw minung fa asi ve komi sifah hlehlei ah hi bantuk zawtnak tthat lo le kokek ral nih a zuldawi hna hi cu lung a fak I ngaih a chia ko.

Cheukhat lebang cu a fiang rih lomi bomhnak hmuh te ding in saduh phunphun kan thah lio ah hi hna nih hin zeibantuk saduh dah an va thah ve hnga! An caah ruahchanhnak nganbik hi rawl voikhat ei le dinti tholkhat hna a va si ah cun aw Bawipa khuakhan hi theihthiam a va har dah ti hlei chimh awk a um lo khi a va si ko hnga! Motor mongh cu ka si i, indiana kutdawh an um tonnak hmunhma vialte ka mitthlam ah a thar in an cuang tthan.

Tuzan le thaizing ca eidin ding a ho nih dah a damh piak hna hnga! Kanmah nuva ca le ka fa le caah kaa zalhmi tirawl ka hmuh ko ah hin ka thinlung ah an cuang khun. Kan tirawl ka zoh ah ka ngaihchiat a zual. Bawipa kan caah ni ceu thar tlanter hram ko. Bawipa nangmah an zumtu hna thong tampi kan thlacamnak hi kan theih piak hram ko.

Vuitu ngei lo le hramtu ngei lo minung hna cung ah na zangfahnak le na dawtnak langhter hram ko. Na sermi minung hna kan cung ah na zangfahnak a thar in langhter tthan hram ko. Miphun ah ka unau hna kanmah le chungkhar , chungkhat, le miphun ca lawng si lo in a ttamhalmi minung hna ca zong ah kan thlacamnak te ah tenh cio hram hna usih tiah sawm bu in ka ca ka donghter.Credit:Lai Kung (GRCM)