PI VAN BAWI HNEM LE HAKHA SINPIN KARLAK AH KA HMUHNING

Hakha Sipin Le Pi Van Bawi Hnem Kar Ah Ka Hmuhning.Tuhi ramkhel kong aukhuan lio si caah zeithil paoh hi kap khatlei lawngin cuanh a fawite. Zei party hmanh an ttha thlu lai lo i, an chia thlu lai lo, ti cu zapi hngalh a si.Tutan hi thil kongah micheu nih NLD cozah mawh an phurh hna; micheu nih Pi Van Bawi Hnem palh si phung pei a buar cu, ti si ve.
Kap hnih biachuakmi cuaithlai tikah zeitindah hibantuk thil hna hi kan remh khawh lai, ti lei siloin Political Campaign lei rumro kan hoihtermi lawng hi a si awk si rua lo, ka ti. Tch: Australia ram ah bill phunphun pek ding kan ngei cio. Ti bill, Mei bill, Gas bill, Phone bill le a dangdang hna an um. Bill pek ding ni le thla khiahmi an um dih.

Cu khiahmi nithla ah pek lo ahcun aitlak ningin dantatnak a um.Bill pek caan a phanh i kan pek khawh lo ahcun phone in chawnh hna i, a ni thawnpiak deuh khawh a si; silole zarh khat ah tlawm tete pek ding tibantuk zongin an tuahpiak tawn hna. Sinain, pek awk a ngei bak lomi cu mizeihmanh theihthiam (Free) ti a um lo. Bawifa zong fa lo zong nih pek hrimhrim ding.

Mizeihmanh nih bill cu pek lo a ngah lo caah bill peknak kongah harsatnak a ngeimi tu kha zeitindah a pek khawh lai, timi lam tu an kawlpiak hna. Zeitindah dan kan tat lai, tiah mi an bawh lo; an si khawh chungin mipi bawmh an i zuam kan ti lai cu. Cucu, dawtnak in mipi caah rianttuanmi cu an si cu. Cucacun pei, Public servants (Mipi Rianhtu) ti zong an ti khawhnak a si cu.

Atu Pi Van Bawi Hnem nih a tonmi thil kongah pumpak in kanmah i siter cio ah lung a fak bak. Laimi cu rethei le harsa ciomi kan si caah mi pakhat hibantuk harnak le zatlaknak an ton tikah kan tuarpi cio hna.Hika zawn ahhin Sipin lei an mawh deuh ko rua, ka ti. Sipin lei ti zongah Sipin dihlak huap zong si loin hi market hmunhma a ttuanmi (Area Sipin) kan ti lai cu.

A aithing thengmang hrawhpiak loin ai tlak ningin phaisa zong liamter khawhnak lam zong a um hnga lo maw? Mi pakhat nih phung a buar tikah dantat le sualphawt lawng bawh loin phungkalh loin (Phungning tein) zeitindah kan bawmh hna lai, ti lungput ngeih ding tu khi a si. Phung tu cu mizeihmanh nih buar phung a si lo; anmah sipin bawi zong nih buar phung a si lo. No one is above the law, ti ding khi si ko.

Cu bantuk dawtnak le zawnruahnak te he mipi a riantu cu pei mipi riantu taktak cu an si tawn cu. Kannih Khrihfa ca lebang ahcun a fawi ngai ding hmanh si lehlam nain. Kan Pastorte le Thawngttha chimtu nih, “bawi zong nih Pathian dawtnak kan hngalh hrim a herh,” an kan ti tawnmi hi, a si khe hi teh, kan ti cio lai ka zumh. Credit: Cacungbik Tlumang

Be the first to comment

Leave a Reply

Your email address will not be published.


*