NLD NIH COZAH SERTTI DINGAH CNLD AA SAWM HNA LAI MAW?

NLD nih cozah serti dingah CNLD a sawm lai maw? NLD policy tampi lakah a biapi bikmi ah a telmi cu 2008 phunghrampi kong a si. 2015 thimnak a um lioah NLD nih teinak a hmuh ahcun 2008 phunghrami kan remh lai tiah an aupi. Teinak a hmuh taktak ve. Cozah a vun kai i remhnak kongkau ah a hngalh deuhmi le a thiam deuhmi U Ko Ni kha an thah cang caah holh tam ding a tha ti lo an ti i an dai than nain policy pakhat a si ve caah 2019 chungah 2008 phunghrampi remh dingah hma an lak.

Ralkap caah hi phunghrampi hi zungzal caah sermi a si bantukin NLD nih remh ding a timi cu ralkap nih a duh lo caah remh khawh a si ti lo. Lungfimmi Kawlram miphun vialte nih a herh bikmi ah kan ruahmi cu ralkap uknak 2008 phunghrampi donghter ding a si. Kawlram chung political party (90) hlei chungah NLD lawng nih hi 2008 phunghrampi hi remh ding, a thar ser ding tbt. policy a ngeimi a si.

Party dang vialte ralkap sermi 2008 phunghrampi hi ka hna a tla ko, ralkap uknak tangah um ka duh ko a timi lawng an si.(Party Policy ah 2008 phunghrampi kong a tel lomi pohpoh ka hna a tla tinak a si). NLD nih Term (1)nak ah a remh kho ti lo caah term (2)nak ah lam dang a kawl cang lai. Phunghrampi kong hi biapi ah a chiahmi a si.

Party hruaitu cheukhat nih political tactics an hmang i tukum thimnak ah NLD nih cozah a ser kho ti lai lo, party dang a kan sawm lai i tukum cu Coalition Government (party-komh cozah) lawng a dir lai an ti. Zeiruangah NLD nih cozah a ser kho lai lo timi source cu chim ding an ngei lai lo. NLD cozah hruainak duh lo ruangah party thar tampi an chuak ti zong sullam a um lo. NLD cozah kut tangah cawlcang kho lomi cheukhat nih party an dirh ruangah NLD caah a zorh deuh ding a um lo.

Kawlram chungah party tam deuhdeuh NLD caah Vote tam deuh tinak si ko. Party thar pawl hi anmah te lawng Township pakhat ah a ummi an si lo. NLD minung thawng tampi lakah party thar minung zong a telmi an si. Anmah caah teinak hmuh ding cu a si kho lomi a si. NLD cozah a peh ding duh lo ruangah Tactics chuakmi a si.

2015 usdp cozah a tlaih lio hmanh thimnak ah usdp nih mp 41 te lawng a hmuh i nld nih 390 a hmuh ahcun term (1) a kan kalpi cang, a thiltuahmi a tha le a chiat cu mipi nih kan hmuh dih ko. Cozah sernak cu mp 333 a si ko. NLD caah mp 333 hmuh cu a har lo. Miphun party an tam ruangah NLD caah teinak a har lai a timi an um bantukin tlangcung miphun party an tam tuk caah NLD caah teinak a tlawm cang lai tiin a zumhmi zong an tam ve.

Party hruaitu pawl hi milu tlawmte lawng an si.An membar zong thawng khat, thawng hnih an si kho men. Pawngkam hmuhnak ah cun anmah party hi minung an tam ngaingai, teinak an hmuh kho men ti khawh a si. MP pakhat tlinnak caah Vote 1000, 2000 nih san a tlai lo. Khuate lei ah cun vote 4000, 5000 hmuh lawngah teinak hmuh a si. Khuapi ah cun Vote Thawng tampi hmuh a herh.

Cucaah tukum hi party tam ruangah nld sungh deuhnak lam pakhat hmanh a um lo.NLD cozah kai ding duh lo ruangah chim sawhsawhmi bia a si.Kan hnulei ah ka langhter cangmi CNLD tel in party (29) nih USDP cu Kawi (Alliance) an sermi kha zapi hmuh a si cang. Hi party (29) le August 14 ah Ralbawizik Min Aung Hlaing he tonnak a ngeimi party (34) vialte cu 2008 phunghrampi hi ka hna a tla, ralkap he pumkhat kan si lai i NLD dohnak zongah hmun khat ah kan dirti lai a timi an si dih.

Ralkap uknak 2008 phunghrampi dirkamtu caah usdp cu dirhmi a si. Cheukhat nih usdp tanh ahcun 2008 phunghrampi hi remh khawh a fawi deuh lai an ti. Usdp le ralkap thluak a hngalh lomi mihrut pawl bia a si. CNLD hruaitu pawl nih Ralbawizik Min Aung Hlaing he tonnak an ngei lioah thluak in an tuahmi NLD nih cozah a kai kho lai lo, party dang he Alliance a tuah lai, kanmah pawl he cozah kan serti lai timi bia kha atu hi an dirpimi a si.

A hmasa ah CNLD hruaitu pawl nih kannih party cu party dang he komhnak kan ngei lo, kanmah te lawng a dirmi kan si an ti nain thup khawh a si ti lo. Atu cu a lang thluahmah cang. Falam peng ah CNLD mp a cuhmi mp nih kannih cu mp (7) nih teinak kan hmuh ahcun Chin cozah kan ser khawh ko lai a ti i mipi nih ralkap (6) he anmah (6) fonh in Chin cozah ser an timhnak kha fiang tein an hngalh cang i an tintak dih timi Falam upa pakhat sinin kan theih.

2008 phunghrampi remh (or) a thar ser a duhmi NLD nih 2008 phunghrampi dirkamtu caah dirhmi usdp he Kawi (alliance) a sermi Party vialte cu cozah serti dingah a sawm naisai lai lo. CNLD hi Ralkap uknak fektertu 2008 phunghrampi dirkamtu caah dirhmi USDP he Kawi a ser lawng si loin Ralbawizik he pumkhat in a dirmi a si ve caah NLD nih cozah serti dingah CNLD cu a sawm kho lo timi hi mipi dihlak kan hngalh dih dingah ka vun langhtermi a si. Credit: Laiki Chozah

Be the first to comment

Leave a Reply

Your email address will not be published.


*