USDP LE NLD A TTANHMI PAWL CU NAN RAK CHANBAUNAK ALANG CANG HIH

Miphun party a um ko nain rampi huap in party sermi hna NLD or USDP ti bantuk hna sin ah vote a thlatu ding pawl cu citizen leadership a pemh kho rih lo mi le a thei kho rih lomi an si tiah, fiangte in ti khawh an si. Ram a ngei cangmi miphun pakhat nih mah ram cu ttha tein ser le mahte in i uk le i tawlrel a duh ko mi miphun nih cun pakhatnak citizen leadership timi pemh le hngalh fiangnak tampi ngei a herh ning kan vun langhter hmasa lai.

Vawleicung ram tthawngthawng hna nih siseh cun ram fate zong si ko hna seh, an ramchung uknak an i tuah cio mi a hrampi taktak cu Bible,chung an lak mi a si, tiah, chimh khawh a si. Bible chungin kan vun lak ta lai, Moses le Aaron hna hruainak tangah a ummi Israel mi vial te hna cu, Bawipa nih Moses sin ah a rak pek mi zulh phung le zulh ding le tuah ding phunglam vialte cu an chimh hna tik ah Israel mi nih kan miphun caah zeidah tuah ding a si timi an rak i theih cun an i fiangtuk tik ah ram hmanh a rak ngei lo mi an rak si nain Israel ram tiah nihin vawlei pi theih mi ram ah a cang.

Hihi citizen leadership pemh le i fiang cu a si, cun ramdang a ummi Israel mi hna a hlei in USA ah a ummi hna nih Israel miphun kan si caah tiah, fimnak he thiamnak le chova he an ram an dihpi tik ah a huatu ram innpa nih an tei khawh lo. Bible cathar ah Zisuh nih zultu minung12 aa thim hna i ttha te in rak cawnpiak hna tik ah Zisuh pennak chungah zeidah tuah ding a si timi fiang te in an rak pemh i cu chungah cun Peter timi nih citizen leadership a rak pemh bik tiah chim khawh a si.

Cucu zeidah a si kan ti ahcun Zisuh zultu ka si caah ka zulh mi pa hi ka runven a hau hrimhrim timi aa rak i theih tik ah Zisuh an rak tlaih lio ah pakhat pa cu a hnakho petlak rak in vainam in rak samh timi nih zeitluk in dah a tuah ding aa fiang i a pemh khawh timi a lang; zeiruang ah kan ti ahcun a zulhmi A Bawipa runven cu a tuah ding a rian hrimhrim khi a si caah a si.

Cun Zisuh Pennak caah zeidah tuah ding a si timi a tuah ding aa fiangtuk tik ah thih tiang in Zisuh nih a cawn piak mi lam cungah a nunnak tiang a rak pek tik ah citizen leadership timi rak thiamtuk tiah kan tinak cu a si.Vietnam ral 1955 – 1975, khi lio caan ah citizen leadership an rak pemh tuk i an rak i fiangtuk tik ah kan ram caah tiah nunak a rak i pemi “Viet Cong (VC) le People’s Army of Vietnam (PAVN) minung 44,400 nih an ram himnak caah an nunnak an rak i pek.

Cu long si lo, citizen leadership a rak pemhtuk i aa rak fiangtuk mi pawl nih ka ram le ka miphun caah tiah minung 62,700 bak nih nunnak a rak thaph ve, hi pawl nih nih an mah le an umnak cio in an rak doh ve hna ti a si, Lo a tuah mi nih lo an riahnak hmun le an tuhmui le an namtawn cu dawr a tuah mi pawl zong nih an ti le an rawl in maw pakhat khat in maw kan ram le kan vawlei ciacai ah cun maw kan duh bak lo tiah an si khawhnak lam cio in American ralkap pawl cu an rak doh ve hna tik ah American ralkap nih zeihmanh an rak rel hna lo nain an ralkap minung 28,200 bak an rak thah hna ti a si. Hihi citizen leadership a pemh i a fiang mi cu an si.

Chins miphun chungah citizen leadership timi kan miphun le kan ram caah kan tuah ding hrimhrim a si mi, kan rak i fiang lo tik ah CNF/A support ding zong theih hlah mah miphun party hi dirh pi ding le vote ding a si, ti mi zong theih hlah! Chin miphun cu kan zapi te in Chin Citizen, kan si dih, Kawl citizen kan rak si hrimhrim lo bantuk in zungzal in Myanmar Citizen kan si ding hrimhrim hi duh ding a si lo.

Hihi Chins mivialte nih kan theih dih ding le kan i fiang dihnak ding caah cun CNLD ah vote thlak dih ulaw, an mah CNLD longlong hi citizen leadership a auhpitu le mipi sin ah chimh phuannak tampi an tuah khawh lai. 2008, Constitution thlen hmasa lo ahcun tiah a ruah mi um pah a si caah, 2008, phunghram pi thlen hlan ah Chin Citizen Leadership, kan pemh hmasa le kan i fiang hmasa a ho caah, Chin Citizen, ka si a timi poahpoah nih cun CNLD ah na vote na rak pe ve ko.

2020, thimnak ah aa cuh ding mi hna interviews an tuah mi tete hna, Salai Van Bawi Lian, Saya Run Kaw le CNLD caah rianttuan aa timh mi Salai Mang Hre Lian, hi hna an chim mi pawl khi ttha te in mipi sin ah kum 5 chung mipi sin ah an chim khawhnak lam cu 2020, ah MP, kan tlingter hna hrimhrim a hau. Citizen leadership timi cu anmah hna le an hawi le hna CNLD pawl nih an chim mi khi a si. 2008, Kawlram phunghrampi thlen khawhnak ding caah cun tlangcung mi kan mah le kan ram kan miphun chung cio ah lungrual hmasa kan hau hna.

Hruitu ttha i chuahnak ding caah pakhatnak citizen leadership pahnihnak personal leadership hi hna hi a herh hmasa bik mi a si caah hihi pahnih kan i fiang lo i kan thiam ttung lo ahcun hruaitu zong ttuan ko law, na hlawh a tling hrimhrim lai lo i leadership training zong tampi tuah ko law, pakhat hmanh hruitu ttha na chuah kho hna lai lo.

Cun leader le leadership timi hi tthen thiam le hngalh a ho, mitampi cu kan i fiang lo, leader cu hruaitu sinak a si, leadership timi tu cu mipi a hruaitu na si lai lo nain na ttuan mi le na dirh hmun in ka innchungkhar caah hruaitu ka si ding a si timi i fiang in innchungkhar tthanchonak rian ttuan ding cun ka miphun le ka ram caah ka si khawhnak lam paoh paoh in ka ttuan ve hrimhrim lai i kan miphun luahnak le kan himnak caah tiah chim khotu si nak hna khi a soh mi cu a si.

Leadership training a tuahtu nih a cawnpiak hna tik ah amah nih a cawnpiak mi hna pawl vialte cu an mah le an umnak an kalnak kip ah leadership training an rak kai mi kha mipi sin ah a pe tthan khotu sinak ah an dir ahcun cucu leadership training a rak kai mi cu a hlawhtling tinak a si. Credit:Amang Ling

Be the first to comment

Leave a Reply

Your email address will not be published.


*