MP KA TLIN CUN VOTE A KA PETU CAAH KUM KHAT HLAWH KA HMAN LAI

MP Ka Tlin Ahcun Part 1. Kum khat chung MLA thlahlawh man ka hmuh ding mi cu thimfung a kapetu mizapi caah ka hman dih lai.Kaa zuamnak hmun i mizapi he naihniam tein rian ka ttuan lai. An caah thilrit chaangtu “LIANGDAN THA” ka si lai. (To serve not to be served)

Kan miphun he aa tlak mi, kan nunphung he aa tlak mi upadi ser khawh kaa zuam lai. A bikin Chin Act upadi thlenremh le hman awktlak in nunter, a thawchuahter kaa zuam lai.Chinram vawlei, hmun le ngunkhuai kong he pehtlai in Chin miphun caah a tha mi le a fek mi customary law ser le nunter kaa zuam lai.

Ramkulh (State) nih tuah khawhnak nawl a ngeih mi Table 2 (Zayar 2) khi Chinram cozah le hluttaw nih man ngei tein kan hman khawh nakding kaa zuam lai.Hakha thar le Chinram chung cozah nih innhmun a pek mi hna cu megram (105/106), မြေ ပေးမိန့်, license a hmuh khawh nakhnga kaa zuam lai.

Nunphung le caaholh thanchoternak caah budget tamdeuh chiahpiak dingin kaa zuam lai. Lai thilthuam, nunphung laam, hla tibantuk hna khi kilven, thanchoter le miphun dang sin tiang hmunhma la kho ding cawisan kaa zuam lai. Lai caa chimtu hna zong thlakhat 30,000 in an pek hna ti ka theih. Lungfah awk ngaingai a si.

A dang sianginn cachimtu bantukin thla hlawh man an hmuh khawh nakding kaa zuam lai. Chin nunphungLai paih (Chin Wrestling) khi kan miphun chungin miphun dang sin tiang phan in a thangcho mi zanglek celhzuamnak a si khawh nakding kaa zuam lai. Postscript: Peh tthan ding. By Van Chan Ceu

Relchih:Myanmar ram ser a si tikah Chin miphun hi Burma miphun sinah a vaa FONH mi kan si lo. Aa KOM mitu kan si.Myanmar timi dum a um khawh nakding ah Burma thingkung ah aa peh mi miphun kan si lo. Kanmah Chin timi miphun thingkung ning tein, a dang tein cinthlaak mi kan si. Theipar ngei ve ding cinthlaak mi kan si. Dum chungah vawlei tihaang dawpkhawhnak tinvo ngei dingin cinthlaak mi kan si.

Niceu dawh le ruahti hna cu Burma thingkung he aa tluk ruang tein tingco ve dingin cinthlaak mi kan si.Chin miphun cu Burma sinah peh chom mi thingtleng a si lo. Thingtleng pakhat menmen bantukin kan i ruahnak thinlung hi kal taak a cu cang. Thinkung pakhat dirhmun ah i ruah caan a si cang.Thingkung hmanh ah Burma thingkung thladem tangah thi lo nung loin; theipar ngei loin a nung dingmi thingkung kan si lo.

Thladem cu a ṭha kan ti. Sihmansehlaw thladem a ṭhattuknak tangah zeibantuk thingkung hmanh an ṭhang kho lo.Chin miphun hna nih Myanmar ram timi dum chungah kan par ve a herh cang. Thei kan tlai ve a hau cang.Kan nunphung hram tharchuah in vawlei tihaang kan dawp ṭhan a herh. Kan caaholh hram tharchuah in vawlei tihaang kan dawp a herh cang.

Kan hram thuk chin in vawlei chungah hram kan sih a herh. Burma thingkung ah i pehtonh dingin kan i timh awk a si ti lo.A ṭha tuk cia cang mi Burma thingkung thladem ṭhawnnak cu ṭhawnter chin a hau lem ti lo. Kanmah tein kan par caan a si. Thei kan thlai caan a si cang.Thingkung pakhat nih a nun khawh nakding caah tanglei ah vawlei tihaang le cunglei ah ni ceu a herh bantukin, kan Chin miphun nih tanglei ah Chinmi kan zaapi a kan herh i, cunglei ah Pathian he i pehtlaih kan herh.

Chin miphun kan dihlak hi kan miphun thingkung i a hram bantuk kan si.CNLD cu thingkung a hnah bantuk kan si. Ni ceu dawh cu Pathian zangfahnak le dawtnak bantuk a si.Chin miphun thingkung pi i a hram a simi Chin mipi hna nih thazaang kan chuah lo ahcun CNLD cu hnahro bantuk a si ko lai.

Cucaah kan Chin miphun hi pangpar bantukin a par khawh nakding ah le, theipar ṭha a tlai khawh nakding ah CNLD hi thazang pe usih law, thladem ṭhawnnak ngei ve usih.Myanmar ram chungah a ummi Chin miphun hi thlaici ṭha bantukin kan tlai a si ahcun dum dang (ramdang) ah a phan mi Chin miphun hna zong thlaici ṭha tiin auh an si lai i; miphung dang hmai ah upatnak an hmu lai.Chin miphun cu amah tein hram a ngei mi a si.Kawl mi sinah aa peh/fonh mi a si lo.Myanmar rampi aa dawh nakding ah Chin miphun kan sinak in a par ve ding mi kan si. Credit: Van Chan Ceu