MIT THLI A HAI. MINDAT CDF CHUNGTEL PAKHAT NIH A TONMI A CHIM

Dawtnak Hmual (CDF-Mindat chungtel pakhat nih a tak in a tonmi). A tanglei ca hi rel tikah lungthin a hno, mitthli a hai. Zeitlukindah dawtnak hmual hi a thawn ti zong a langhter. CDF-Mindat chungtel pakhat nih a tak in a tonmi a si. Amah tialning tein ka vun leh. Ralhrang hna sinin an zam tiah ruahmi ralkap cheukhat kan tlaih hna hi thla khat hrawng a si cang.

Kan vua hna lo i hri zongin kan khit fawn hna lo. Zalong tein kan umter hna pinah ti le rawl tha tein kan pek hna. Asinine cawngtu cu kan chiah ve hna. Kuak le khawngzi zong kan si khawh tawk in kan damh piak hna. Cuticun kan sin an phak in zarhnak hrawngah Chi Chawng i CDF pawl cu Kanpetlet lei i raldoh kan kalnak ah ralhmai hmun thum in karceh kan tong i hnu kan tolh.

Cutikah khuami dihlak, tar in ngakchia tiang ralhrang hna tih ruangah an zam dih. Kan sinah a ummi ralhrang in a zammi hna zong cu kenzawi awk an that ti lo caah kan ngeihchun tangka chuah in minung pakhat ah 50000 cio kan pek hna i kan kalter hna. An mithmai cu a nuam lo ngai ti a lang. Cuticun hnu kan tolh i khua pakhat pawng i hmunhma kan lak lioah kan kaltermi hna kha kan hmuh than hna.

Ngakchia a puami an um, thiltom a pumi an um, meithal aa putmi an um, anmah nih cun khuami a zammi hna kha lam an hruai hna. Kan khuaruah a har tuk. Nan tlung rih lo maw tiah ka hal hna i “Ti le rawl an kan petu khua cu mahti men in kan kaltak kho hna lo, a himnak hmun an phak tikah kan tlung te lai” tiah an ka leh. Cu bia ka theih tikah ka ngakchia lio i ka zoh balmi Vietnam ral muicawl (movie) pakhat ka lungah a hung chuak.

Lemcang (Minta) cu Arnold a si rua ka ti. Vietnam lei a doh cuahmahmi US Marine ralkap pakhat nih amah a chanhtu Vietnam khua pakhat a chanh thannak muicawl a si. Dawtnak cu a kir than timi hi ka zumh. A hnu ah anmah theihternak ka rak tuah te lai. An kut chungah an meithal taktak kha tlaihter thannak caan a hla ti lo. TCP

May be an image of outdoors

Thawngpang dang: Ralhrang kawlralkap nih KIA, KNU, KNPP hna cu rampi buainak a chuahtertu minung training apetu an si tiah thanhnak an tuah. Tuni June thla ni 12 ah ralhrang kawlralkap lei nih media he I tonnak an tuah I cu ah cun rampi buaibainak a chuahtertu mipi hna cu KIA, KNU, KNPP hna nih bomb puahter ning cang le a dang raltuknak ah thiam a herh mi pawl cu tintan an pek hna tiah an chim.

KIA sin ah bomb puah ning le a dang a herh mi tintan a rak kai balmi minung 2 hna cu June thla ni 5 ah Yangon Htauh Cianh ah ralkap hna nih an rak tlaih hna. Cu minung 2 hna cu ralhrang kawlralkap lei nih bia an hal hna tik ah KIA brigade 3 nih a tuah mi tintan ah a dang minung 140 leng he kan rak kai bal tiah an phuan tiah ralhrang kawl ralkap lei nih cun an chim.

Cu pin ah KNU sin in tintan kai in a rak kir mi minung 3 hna zong June thla ni 8 ah ralhrang kawlralkap nih an tlaih hna I cu hna nih cun KNU nih a tuahmi tintan ah a kai mi kan si. Yangon hmun hnih ah bomb kan hmanh I kan puah tiah an phuan tiin ralhrang kawl ralkap lei chimnak nawlngeitu General Zaw Min Htun nih cun a chim.

KNPP sin ah tintan kai dih in a kir mi minung 70 leng zong April thla dih lai ah kan tlaih hna tiah Zaw Min Htun nih cun a chim chap. Tlangcung hriamtlai phu cheukhat hna nih rampi buaibainak a chuahter tu hna cu thaapek in tintan an pek len hna. Training an pek mi hna pawl nih cun sianginn le cozah zung a simi hmunhma pawl ah bomb an puah len.

Ralhrang Kawl Ralkap lei nih hibantukin an puhmi konghe pehtlaiin KNU, KIA le KNPP cu BBC nih pehtlaih khawh kan zuam lio hna asi. Kachin ram chung ah PDF pawl an cawlcangh ding asi ahcun KIO/KIA hruainak tang lawng in cawlcangh ding in KIA le chimnak nawlngeitu Buhmugyi Naw Bu nih a luancia mi ni tlawmpal ah thawng a thanh.

Be the first to comment

Leave a Reply

Your email address will not be published.


*