MINISTER PU SOE HTET NIH VICE PRESIDENT PU VAN THIO KONG A PHUAN CANG

2020 kum Myanmar ram party tling thimnak ah Thantlang Peng, Amyotha Hluttaw No.1 in aa zuam i teinak a hmu mi Pu Henry Van Thio hi tutan Cozah ahcun President dirhmun tiang an phakter theng ti lai lo tiah Minister Pu Soe Htet nih a chim. President taktak hi cu party ngan chung in i khinh a si. Vice President 1 hi ralkap lei in a rak lut mi a si.

Cun, tlangcung mi hna caah Vice President 2 hmun a um awk a si ca ah atu bantuk in Pu Henry Van Thio zong hi atu dirhmun an rak phakter mi hi a si. Vice President hi tlangcung miphun hna a changchang in tuanter le rian pekmi a si ca ah atu Cozah thar ahhin cun a tling theng ti lai lo” tiah Minister Pu Soe Htet nih The Hakha Post ah a chim.

Vice President-2 Pu Henry Van Thio hi tutan thimnak ah Thantlang Peng in aa zuam than i, amah he aa zuamcawh mi USDP in Pu Siang Lian Hmung le CNLD nih Dr. Van Hmun Lian hna an si. Pu Henry Van Thio mee a hmuh mi hi a dihlak ah 15,492, Dr. Van Hmun Lian 5,681 le Pu Siang Lian Hmung nih 5,579 mee an hmuh hna tiah Chin State Election Commission zung sin in kan theih.

Cun, Minister Pu Soe Htet nih, 2015 kum lio ahkhan NLD nih teinak hmu loin USDP nih teinak hmu hna sehlaw President dirhmun tiang an kan phakter lai lo. Ka theih ning ahcun 2015 lio ahkhan USDP nih a tei than a si cun, Mon le Kachin pakhatkhat hi pek ding in timhlamhnak an rak ngei.

NLD hi a kai ca ah Daw Aung San Suu Kyi nih Chin Ramkulh chung thanchonak tuah ding in aa timhlamh ca ah atu bantuk in president an kan pek hi a si,” tiah a chimchap. Minister Pu Soe Htet hi 2020 kum thimnak ah Paletwa Peng, Ramkulh Hluttaw mee hmun No.2 in aa zuam i teinak a hmuh ve tiah theih a si. Credit: The Hakha Post.

Be the first to comment

Leave a Reply

Your email address will not be published.


*